Kakarakaya Kobbari Karam in Telugu : సాధారణంగా మనం కాకరకాయతో ఉల్లికారం, వెల్లుల్లి కారం చేస్తే ఎంత బాగుంటాయో తెలిసిందే. ఓసారి ఇలా కొబ్బరి కారం కూడా ప్రిపేర్ చేయండి. టేస్ట్ మాత్రం ఎంతో బాగుంటుంది. వేడివేడి అన్నంతో తిన్నా కొద్దీ తినాలనిపిస్తుంది. ఈ కొబ్బరి కారం వారం రోజుల వరకు నిల్వ ఉంటుంది. అలాగే ఈ రెసిపీ కోసం కాకరకాయలను ఆయిల్లో డీప్ ఫ్రై చేయాల్సిన అవసరం కూడా లేదు. మరి సింపుల్గా కాకరకాయ కొబ్బరి కారం ఎలా చేయాలో ఇప్పుడు చూద్దాం.
హోటల్ దోసె పిండిలో వంట సోడా వేయరు - కానీ, కిటుకు అంతా అక్కడే!
కాకరకాయ కొబ్బరి కారం తయారీకి కావాల్సిన పదార్థాలు
- కాకరకాయలు - అరకేజీ
- ఉప్పు - రుచికి సరిపడా
- ఎండిన కొబ్బరి - 1
- టేబుల్స్పూన్ - ధనియాలు
- టీస్పూన్ - జీలకర్ర
- వెల్లుల్లి - 6
- కరివేపాకు - 2
- పసుపు - సరిపడా
- తగినంత - కారం
కాకరకాయ కొబ్బరి కారం తయారీ విధానం
- ముందుగా కాకరకాయలు శుభ్రంగా కడిగి లైట్గా పైన చెక్కు తీసుకోవాలి. ఆపై సన్నగా గుండ్రంగా ముక్కలుగా కట్ చేసుకోండి.
- ఈ కాకరకాయ ముక్కలను బౌల్లోకి తీసుకోండి. ఇందులో అర టీస్పూన్ పసుపు, టీస్పూన్ ఉప్పు వేసి కలిపి మూత పెట్టి అరగంటపాటు పక్కన పెట్టుకోవాలి. ఇలా చేయడం వల్ల కాకరకాయల్లో నుంచి నీరు వస్తుంది. అలాగే ఎక్కువ చేదు కూడా ఉండవు.
- ఈలోపు ఎండుకొబ్బరి గ్రేటర్లో పెద్ద రంధ్రాలున్న వైపు తురుముకోవాలి. ఈ కొబ్బరి తురుము చిన్న బౌల్లోకి తీసుకోండి.
- అనంతరం కాకరకాయ ముక్కలను గట్టిగా చేతితో పిండుకొని ఒక ప్లేట్లోకి తీసుకోవాలి.
- కొబ్బరి కారం చేయడం కోసం ఒక మిక్సీ జార్లో టేబుల్స్పూన్ ధనియాలు, టీస్పూన్ జీలకర్ర వేసి మెత్తగా మిక్సీ పట్టుకోవాలి. ఆపై ఇందులో ఎండుకొబ్బరి తురుము, తగినంత ఉప్పు, కారం, వెల్లుల్లి వేసి కచ్చాపచ్చాగా గ్రైండ్ చేసుకోవాలి. ఈ కొబ్బరి కారం చిన్న గిన్నెలోకి తీసుకొని పక్కన పెట్టుకోవాలి.
- ఇప్పుడు స్టవ్ వెలిగించి పాన్ పెట్టి 5 టేబుల్స్పూన్లు ఆయిల్ వేసి వేడి చేయండి.
- ఆయిల్ వేడయ్యాక కాకరకాయ ముక్కలు వేసి మీడియం ఫ్లేమ్లో వేయించుకోవాలి. వీటిని మూత పెట్టకుండానే కలుపుతూ దోరగా వేయించుకోవాలి.
- కాకరకాయ ముక్కలు క్రిస్పీగా వేగిన తర్వాత కరివేపాకు వేసి నిమిషంపాటు వేయించండి.
- ఆపై ముందుగా గ్రైండ్ చేసిన కొబ్బరి కారం వేసి బాగా కలపండి.
- ఓ రెండు నిమిషాలు వేయించుకున్న తర్వాత స్టవ్ ఆఫ్ చేయండి.
- అంతే ఇలా సింపుల్గా ప్రిపేర్ చేసుకుంటే కమ్మని కాకరకాయ కొబ్బరి కారం రెడీ!
- వేడివేడి అన్నంలో కొద్దిగా నెయ్యి వేసుకొని కాకరకాయ కొబ్బరి కారంతో తింటుంటే టేస్ట్ అద్దిరిపోతుంది.
- ఈ కమ్మని కాకరకాయ కొబ్బరి కారం నచ్చితే మీరు ఓసారి ట్రై చేయండి.
ఈ ఆదివారం "మృగశిర కార్తె" - చేపల పులుసులో 'ఈ మసాలా' వేస్తే గిన్నెలు ఖాళీ చేస్తారు!
"రవ్వ దోసెలు" క్రిస్పీగా రావడం లేదా? - పిండిలో "ఇవి" కలిపి చూడండి - ఎంతో బాగా వస్తాయి!
