కమ్మని, రుచికరమైన "జొన్న లడ్డూలు" - పాకం పట్టాల్సిన అవసరం లేదు - రోజూ ఒక్కటి తింటే ఆరోగ్యంగా!
-నోట్లో వేసుకోగానే కరిగిపోయే లడ్డూలు! -ఈ పద్ధతిలో చేస్తే పిల్లలు చాలా ఇష్టంగా తింటారు!
Published : May 13, 2025 at 1:54 PM IST
Tasty and Healthy Jowar Laddu at Home: ఆరోగ్యానికి జొన్నలు చేసే మేలు గురించి ప్రత్యేకంగా చెప్పక్కర్లేదు. ఎందుకంటే ఇందులోని పోషకాలు షుగర్, బరువును తగ్గించడం, జీర్ణక్రియను మెరుగుపరచడం, మలబద్ధకాన్ని తగ్గించడం సహా ఎన్నో ఆరోగ్య ప్రయోజనాలను అందిస్తాయి. అందుకే ఈ మధ్య కాలంలో వీటి వాడకం పెరిగింది. మరీ ముఖ్యంగా జొన్నలతో ఇడ్లీ, దోశ, రొట్టెలు, పొంగలి చేసుకునే వారి సంఖ్య అధికమైంది. అయితే జొన్నలతో ఇవి మాత్రమే కాకుండా కమ్మని లడ్డూలు కూడా చేసుకోవచ్చు. చాలా టేస్టీగా ఉండే వీటిని అలా నోట్లో వేసుకోగానే ఇలా కరిగిపోతాయి. పాకం అవసరం లేకుండా చాలా సింపుల్గా ప్రిపేర్ చేసుకోవచ్చు. పిల్లలకు రోజుకొకటి ఇచ్చారంటే చాలా హెల్దీగా తయారవుతారు. మరి లేట్ చేయకుండా ఈ జొన్న లడ్డూలు ఎలా చేయాలో చూసేయండి.
కావాల్సిన పదార్థాలు:
తయారీ విధానం:
- ముందుగా జొన్న పిండిని జల్లించి తీసుకోవాలి. అలాగే కావాల్సిన బెల్లాన్ని సన్నగా తురిమి పక్కన ఉంచాలి.
- స్టవ్ ఆన్ చేసి కడాయి పెట్టి పల్లీలు వేసి లో ఫ్లేమ్లో కలుపుతూ మంచి రంగు వచ్చే వరకు వేయించాలి.
- పల్లీలు బాగా వేగిన తర్వాత ఓ ప్లేట్లోకి తీసుకుని పూర్తిగా చల్లారనివ్వాలి.
- ఇప్పుడు అదే కడాయిలో కొద్దిగా నెయ్యి వేసి కరిగించాలి. కరిగిన నెయ్యిలో జల్లించిన జొన్న పిండి వేసి లో ఫ్లేమ్లో వేయించాలి.
- జొన్న పిండి పచ్చి వాసన పోయి లైట్గా కలర్ మారిన తర్వాత స్టవ్ ఆఫ్ చేసి ఓ ప్లేట్లోకి తీసుకుని పూర్తిగా చల్లార్చుకోవాలి.
- చల్లారిన జొన్న పిండిలోకి బెల్లం తురుము వేసి మిక్స్ చేసుకోవాలి.
- మిక్సీజార్లోకి జొన్న, బెల్లం మిశ్రమం వేసుకోవాలి. ఆపై అందులోకి వేయించిన పల్లీలు, ఎండు కొబ్బరి పొడి, యాలకులు వేసి గ్రైండ్ చేసుకోవాలి.
- మెత్తగా గ్రైండ్ చేసుకున్న తర్వాత కొంచెం పిండి తీసుకుని ముద్దలాగా చేయాలి. పర్ఫెక్ట్గా వస్తే పిండి రెడీ అయినట్లే. లేదంటే మరో రెండు నిమిషాలు గ్రైండ్ చేసుకోవాలి.
- ఇలా గ్రైండ్ చేసిన పిండిని ఓ ప్లేట్లోకి తీసుకుని మొత్తం కలుపుకోవాలి. ఇప్పుడు పిండిలో కొద్దికొద్దిగా నెయ్యి వేసుకుంటూ పిండిని కొంచెం తీసుకుంటూ లడ్డూలుగా చుట్టుకోవాలి.
- ఇలా పిండి మొత్తాన్ని లడ్డూలుగా చుట్టుకుని గాలి చొరబడని డబ్బాలో స్టోర్ చేసుకుంటే జొన్న లడ్డూలు రెడీ. హ్యాపీగా తినొచ్చు. నచ్చితే మీరూ ట్రై చేయండి.
చిట్కాలు:
- జొన్న పిండిని లైట్గా కలర్ మారి, మంచి వాసన వచ్చేవరకు లో ఫ్లేమ్లో మాత్రమే వేయించుకోవాలి. పిండి మాడిందంటే లడ్డూల రుచీ మారుతుంది.
- పల్లీలను పొట్టుతో ఉంచే గ్రైండ్ చేసుకోవాలి. అప్పుడు రుచికి రుచి ఆరోగ్యానికి ఆరోగ్యం లభిస్తుంది. ఒకవేళ పొట్టు వద్దనుకుంటే తీసేసి వాడుకోవచ్చు.
- నెయ్యి లేకుండా కూడా లడ్డూలు చుట్టుకోవచ్చు. కానీ నెయ్యి వాడి చేసుకుంటే రుచి మరింత బాగుంటుంది.
- మీరు ఎంత పరిమాణంలో చేసుకున్న జొన్న పిండి, బెల్లం, పల్లీలు ఒకే కొలతగా తీసుకోవాలి. అప్పుడే వాటి రుచి బాగుంటాయి.
