కేవలం మూడు పదార్థాలతో సూపర్ సాఫ్ట్ "జొన్న ఇడ్లీలు" - ఇలా చేస్తే ఇంట్లో అందరూ ఇష్టంగా తింటారు!

- ఆరోగ్యానికి మేలు చేసే "జొన్న ఇడ్లీలు" - సూపర్ సాఫ్ట్​గా, ఈజీగా ప్రిపేర్ చేసుకోండిలా!

Jonna Idli Making Process : నేటిరోజుల్లో చాలా మంది ఆరోగ్యం దృష్ట్యా జొన్నలను డైలీ డైట్​లో భాగం చేసుకుంటున్నారు. మొన్నటి వరకు మెజార్టీ పీపుల్ ఎక్కువగా జొన్న రొట్టెలను మాత్రమే చేసుకునేవారు. కానీ, ఈ మధ్యకాలంలో జొన్నలతో దోశలు, ఉప్మా ఇలా రకరకాలైన బ్రేక్​ఫాస్ట్ రెసిపీలు కూడా ప్రిపేర్ చేసుకుంటున్నారు. అయితే, అవి మాత్రమే కాదు జొన్నరవ్వతో సూపర్ సాఫ్ట్​గా "ఇడ్లీలు" కూడా తయారు చేసుకోవచ్చు. మూడే మూడు పదార్థాలతో వీటిని ఎవరైనా చాలా సింపుల్​గా ప్రిపేర్ చేసుకోవచ్చు. బరువు తగ్గాలనుకునేవారికి, షుగర్ పేషెంట్లకు ఈ ఇడ్లీలు సూపర్ ఛాయిస్. మరి, అందుకు కావాల్సిన పదార్థాలేంటి? ఎలా ప్రిపేర్ చేసుకోవాలో ఇప్పుడు చూద్దాం.

కావాల్సిన పదార్థాలు :

• జొన్న రవ్వ - 2 గ్లాసులు
• మినపప్పు - 1 గ్లాసు
• ఉప్పు - రుచికి సరిపడా

తయారీ విధానం :

• నార్మల్​గా ఇడ్లీలు చేయాలంటే ముందు రోజు రాత్రే పిండిని సిద్ధం​ చేసుకోవాలి. ఎందుకంటే పిండి పులిస్తేనే ఇడ్లీలు చాలా సాఫ్ట్​గా, టేస్టీగా ఉంటాయి. కాబట్టి, ఇక్కడ కూడా పిండిని ముందే ప్రిపేర్ చేసుకోవాలి.
• అందుకోసం ముందుగా ఒక బౌల్​లో మినపప్పు తీసుకొని శుభ్రంగా కడిగి, తగినన్ని వాటర్ పోసుకొని 6 గంటల పాటు నానబెట్టుకోవాలి.
• అలాగే, మరో గిన్నెలో జొన్నరవ్వను తీసుకొని తగినన్ని నీళ్లు పోసుకొని 6 గంటల పాటు నానబెట్టుకోవాలి.
• మినపప్పు నానిన తర్వాత వాటర్ వడకట్టుకొని మిక్సీ జార్​లోకి తీసుకొని మెత్తగా గ్రైండ్ చేసుకోవాలి.
• అనంతరం దాన్ని ఒక మిక్సింగ్ బౌల్​లోకి తీసుకోవాలి. ఆపై అందులో నానబెట్టుకున్న జొన్నరవ్వను శుభ్రంగా కడిగి వాటర్ లేకుండా వడకట్టుకొని వేసుకొని మొత్తం మిశ్రమం పూర్తిగా కలిసేలా బాగా కలుపుకోవాలి.
• ఆ తర్వాత గిన్నెపై మూతపెట్టి రాత్రంతా పిండిని పులియబెట్టుకోవాలి.
• నెక్ట్స్ డే మార్నింగ్ పిండి పులిసి చక్కగా పొంగుతుంది. అప్పుడు పిండిని ఓసారి కలిపి రుచికి సరిపడా ఉప్పు యాడ్ చేసుకోవాలి.
• అనంతరం స్టౌ ఆన్​ చేసి ఇడ్లీ పాత్ర పెట్టి తగినన్ని నీళ్లు పోసి మరిగించుకోవాలి.
• ఆలోపు ఇడ్లీ ప్లేట్స్​కు నూనె లేదా నెయ్యి అప్లై చేసి జొన్నరవ్వ మిశ్రమాన్ని వేసుకోవాలి. ఇలా అన్ని ప్లేట్స్​లోకి ఇడ్లీ పిండిని నింపుకోవాలి.
• ఇడ్లీ పాత్రలోని వాటర్ మరుగుతున్నప్పుడు ప్లేట్స్​ పెట్టి మూత పెట్టి 10 నుంచి 12 నిమిషాల పాటు హై-ఫ్లేమ్​లో ఉడికించాలి.
• ఇడ్లీలు ఉడికిన 5 నిమిషాల తర్వాత తీసి ప్లేట్​లోకి సర్వ్​ చేసుకుంటే చాలు. అంతే, సూపర్ టేస్టీ అండ్ హెల్దీ "జొన్న ఇడ్లీలు" రెడీ!
• ఆపై వీటిని పల్లీ చట్నీతో తిన్నారంటే ఆ టేస్ట్ అద్భుతంగా ఉంటుంది. మరి, నచ్చితే మీరూ ఓసారి ఇలా జొన్న ఇడ్లీలను ట్రై చేయండి.