అప్పటికప్పుడు చేసే కమ్మని "టమాటా పచ్చడి" - రుబ్బే పనిలేదు - అన్నం, చపాతీల్లోకి పర్ఫెక్ట్​!

Instant Tomato Pachadi Recipe : చాలా మంది ఇష్టంగా తినే పచ్చళ్లలో టమాటా ఫస్ట్​ ప్లేస్​లో ఉంటుంది. వేడివేడి అన్నంలో ఈ పచ్చడి వేసుకుని తింటే తృప్తిగా ఉంటుంది. అయితే చాలా వరకు వీటితో ఏ పచ్చడి చేసినా మిక్సీ పట్టడం లేదంటే రోట్లో రుబ్బడం చేయాల్సిందే. కానీ అలాంటిది ఏమీ లేకుండా కేవలం 10 నిమిషాల్లో టమాటా పచ్చడి చేసుకోవచ్చంటే నమ్ముతారా? కానీ ఇది నిజం. మిక్సీలో వేసి గ్రైండ్​ చేసే పని లేకుండా చాలా సింపిల్​గా దీనిని ప్రిపేర్​ చేసుకోవచ్చు. ఎన్నడూ తినని టేస్ట్​తో వహ్వా అనిపిస్తుంది. ఈ రెసిపీ బ్యాచిలర్స్​కు మరింత స్పెషల్​. అతి తక్కువ పదార్థాలతో చేసుకునే ఈ చట్నీ అన్నంతో పాటు చపాతీ, టిఫెన్స్​లోకీ అద్భుతం​గా ఉంటుంది. మరి, లేట్​ చేయకుండా ఈ సూపర్ టేస్టీ పచ్చడికి కావాల్సిన పదార్థాలు, తయారీ విధానం ఇప్పుడు చూద్దాం.

కావాల్సిన పదార్థాలు:

• నూనె - 2 టేబుల్​ స్పూన్లు
• టమాటాలు - 5
• పొట్టు తీసిన వెల్లుల్లి రెబ్బలు - 15
• కారం - సరిపడా
• ఉప్పు - రుచికి సరిపడా
• చాట్​ మసాలా - అర టీస్పూన్​
• ఉల్లిపాయ - 1
• పచ్చిమిర్చి - 3
• కొత్తిమీర తరుగు - కొద్దిగా
• నిమ్మకాయ - అర చెక్క

తాలింపు కోసం:

• నూనె - 2 టీస్పూన్లు
• జీలకర్ర - అర టీస్పూన్​
• ఎండుమిర్చి - 2
• కరివేపాకు - 2 రెమ్మలు

Tomato (ETV Bharat)

తయారీ విధానం:

• పొట్టు తీసిన వెల్లుల్లి రెబ్బలను చిన్న ముక్కలగా కట్​ చేసి పక్కన ఉంచుకోవాలి. అలాగే టమటాలను శుభ్రంగా కడిగి వాటి తొడిమ తీసి ఒక్కో టమాటాను సగానికి కట్​ చేసుకోవాలి. ఇలా టమాటాలన్నింటిని కట్​ చేసుకుని పక్కన పెట్టాలి.
• అలాగే ఉల్లిపాయ, పచ్చిమిర్చి, కొత్తిమీరను వీలైనంత సన్నగా కట్​ చేసుకోవాలి.
• స్టవ్​ ఆన్​ చేసి పాన్​ పెట్టి నూనె పోసుకోవాలి. ఆయిల్​ హీటెక్కిన తర్వాత వెల్లుల్లి రెబ్బలు వేసి ఓ నిమిషం ఫ్రై చేసుకోవాలి. ఆ తర్వాత టమాటాలు ఉంచి మూత పెట్టి 5 నిమిషాల పాటు ఉడికించుకోవాలి.

Instant Tomato Pachadi (ETV Bharat)

• టమాటాలు ఓ వైపు ఉడికిన తర్వాత మరోవైపు తిప్పి మరో 3 నిమిషాలు ఉడికించుకోవాలి. టమాటా ముక్కలు ఇలా రెండు వైపులా ఉడికిన తర్వాత వాటి పై తొక్కును తీసేసి గరిటె లేదా స్మాషర్​ సాయంతో టమాటాలు, వెల్లుల్లిని మెత్తగా మెదుపుకోవాలి.
• ఆ తర్వాత రుచికి సరిపడా ఉప్పు, కారం, పసుపు, చాట్​ మసాలా వేసి కలిపి ఓ నిమిషం ఫ్రై చేసుకుని స్టవ్​ ఆఫ్​ చేయాలి. ఇక్కడ చాట్​ మసాలా అనేది ఆప్షనల్​. వద్దనుకుంటే స్కిప్​ చేసుకోవచ్చు. ఇక దాని ప్లేస్​లో ధనియాల పొడి వేసుకున్న టేస్ట్​ బాగుంటుంది.
• అనంతరం ఈ మిశ్రమాన్ని ఓ గిన్నెలోకి తీసుకోవాలి. ఇప్పుడు అందులోకి సన్నగా తరిగిన ఉల్లిపాయ, పచ్చిమిర్చి, కొత్తిమీర తరుగు వేసి కలపాలి.
• స్టవ్​ ఆన్​ చేసి కడాయి పెట్టి నూనె పోసుకోవాలి. కాగిన నూనెలో జీలకర్ర వేసి చిటపటలాడించాలి. చివరగా ఎండుమిర్చి, కరివేపాకు వేసి క్రిస్పీగా వేయించిన తర్వాత టమాటా మిశ్రమంలో కలుపుకోవాలి.
• ఆఖరున నిమ్మరసం పిండుకుని సర్వ్​ చేసుకుంటే ఎంతో రుచికరంగా ఉండే టమాటా పచ్చడి రెడీ. నచ్చితే మీరూ ట్రై చేయండి.
• ఈ పచ్చడి అన్నం, చపాతీ, టిఫెన్స్​లోకి పర్ఫెక్ట్​. బ్యాచిలర్స్​ కూడా చాలా ఈజీగా చేసుకోవచ్చు.

Instant Tomato Pachadi (ETV Bharat)

ఈ పేస్ట్​ వేసి "ఆలు బఠాణీ కుర్మా" చేయండి - చిక్కటి గ్రేవీతో టేస్ట్​ అదుర్స్​ - పూరీ, చపాతీ, బిర్యానీల్లోకి పర్ఫెక్ట్​!

పల్లీలు, టమాటాలు లేకుండా కమ్మని "కొత్తిమీర పచ్చడి" - అన్నం, టిఫెన్స్​లోకి అదుర్స్​ - రెండు నెలలపైనే నిల్వ!