ఈ పొడితో - TEA పెట్టినంత సులువుగా "రవ్వ కేసరి" - 3 నెలలు నిల్వ - కోరుకోగానే స్వీట్​ రెడీ!

- ఇంటిల్లిపాదీ సరికొత్త​ టేస్ట్​ని ఎంజాయ్ చేస్తారు!

Instant Rava Kesari Recipe: స్వీట్స్​ అంటే చాలా మందికి ఇష్టం. అందులోనూ నోట్లో వేసుకోగానే కరిగిపోయేవి అంటే లొట్టలేసుకుంటూ తింటారు. అలా కరిగిపోయే వాటిలో రవ్వ కేసరి ఒకటి. ఫంక్షన్లు, పూజలు, వ్రతాల సమయంలో చాలా మంది భోజనాల్లో ఈ స్వీట్​ను వడ్డిస్తుంటారు. చాలా తక్కువ పదార్థాలతో చేసుకునే ఈ రెసిపీని, పిల్లల నుంచి పెద్దల వరకు ఇష్టంగా తింటారు. అయితే అప్పటికప్పుడు ఈ రవ్వ కేసరి చేయాలంటే కాస్త కష్టమనే చెప్పుకోవచ్చు. ఇక ఆ టెన్షన్​ లేకుండా కేవలం టీ పెట్టినంత సులువుగా రవ్వ కేసరి చేసుకోవచ్చు. అందుకు అవసరమయ్యే ప్రీమిక్స్​ ఇప్పుడు ప్రిపేర్ చేద్దాం. ఒక్కసారి ఈ మిక్స్​ తయారు చేసుకుంటే, ఆ తర్వాత ఎప్పుడు కావాలంటే అప్పుడు 5 నిమిషాల్లోనే స్వీట్​ మీ చేతిలో ఉంటుంది. మరి, లేట్​ చేయకుండా రవ్వ కేసరి ప్రీమిక్స్​ ఎలా చేసుకోవాలో చూసేయండి.

Suji Rava (Getty Images)

కావాల్సిన పదార్థాలు:

• బొంబాయి రవ్వ - 300 గ్రాములు
• పంచదార - 300 గ్రాములు
• నెయ్యి - 150 గ్రాములు
• డ్రైఫ్రూట్స్​ - 75 గ్రాములు
• పాల పొడి - 75 గ్రాములు
• యాలకుల పొడి - 2 టీ స్పూన్లు

Sugar (Getty Images)

తయారీ విధానం:

• స్టవ్​ ఆన్​ చేసి పాన్​ పెట్టి కొద్దిగా నెయ్యి వేసుకోవాలి. నెయ్యి కాగిన తర్వాత సన్నగా తరిగిన డ్రైఫ్రూట్స్​ వేసుకుని మంచి కలర్​ వచ్చే వరకు వేయించుకోవాలి.
• డ్రై ఫ్రూట్స్​ పలుకులు వేగిన తర్వాత ఓ గిన్నెలోకి తీసుకోవాలి. ఇప్పుడు అదే పాన్​లో మిగిలిన నెయ్యి వేసి కరిగించాలి.
• ఆ తర్వాత అందులోకి బొంబాయి రవ్వ వేసి లో-ఫ్లేమ్​లో కలర్​ మారి మంచి వాసన వచ్చే వరకు వేయించాలి.

Ghee (Getty Images)

• రవ్వ వేగడానికి టైమ్​ పడుతుంది కాబట్టి, నిదానంగా లో-ఫ్లేమ్​లో మధ్యమధ్యలో కలుపుతూ వేయించాలి.
• రవ్వ చక్కగా వేగిన తర్వాత స్టవ్​ ఆఫ్​ చేసి ఓ ప్లేట్​లోకి తీసుకుని పూర్తిగా చల్లారనివ్వాలి.
• రవ్వ మిశ్రమం చల్లారిన తర్వాత పంచదార, డ్రైఫ్రూట్స్​, యాలకుల పొడి, పాలపొడి వేసి బాగా మిక్స్​ చేసుకోవాలి.
• ఇలా కలుపుకున్న పొడిని ఎయిర్​టైట్​ జార్​లో స్టోర్​ చేసుకుంటే రవ్వ కేసరి ప్రీమిక్స్​ రెడీ.

Rava Kesari Premix (ETV Bharat)

• ఈ ప్రీమిక్స్​ను యూజ్​ చేసి రవ్వ కేసరి చేయడం కోసం స్టవ్​ ఆన్ చేసి అడుగు మందంగా ఉన్న గిన్నె పెట్టి నీళ్లు పోసుకోవాలి. అయితే ఇక్కడ నీళ్లు అనేది మీరు ఎంత రవ్వ ప్రీమిక్స్​ తీసుకుంటే దానికి డబుల్​ పోసుకోవాలి. అంటే 1 కప్పు రవ్వకు, రెండు కప్పుల నీరు పోసుకోవాలి.
• ఆ నీటిలో చిటికెడు కుంకుమ పువ్వు వేసి మరిగించుకోవాలి.
• ఈ లోపు మరో స్టవ్​ మీద పాన్​ పెట్టి టీ స్పూన్​ నెయ్యి వేసి రవ్వ ప్రీమిక్స్​ను జస్ట్​ వేడి చేసుకోవాలి.
• ఈ రవ్వలో మరుగుతున్న నీటిని పోసుకుని కలుపుతూ దగ్గరగా ఉడికించుకుంటే రవ్వ కేసరి రెడీ.

Rava Kesari (ETV Bharat)

టిప్స్​:

• ప్రీమిక్స్​ చేసేటప్పుడు నెయ్యిలో రవ్వ సరిగ్గా వేగకపోతే తొందరగా పాడవుతుంది. కాబట్టి కొంచెం ఓపికతో వేయించుకోవాలి.
• రవ్వ వేగి పూర్తిగా చల్లారిన తర్వాత మాత్రమే పంచదార కలుపుకోవాలి. రవ్వ వేడిగా ఉంటే పంచదార వేసినప్పుడు అది కరిగిపోతుంది.
• పంచదార బదులు ఇదే మొత్తంలో బెల్లం పొడి వేసి కూడా చేసుకోవచ్చు.
• ప్రీమిక్స్​ సాయంతో రవ్వ కేసరి చేసేటప్పుడు నీళ్లు మరిగించే సమయంలో కుంకుమపువ్వు లేకపోతే నచ్చిన ఫుడ్​ కలర్​ను వేసుకుంటే సరి. ​