Instant Mango Rasmalai: నోట్లో వేసుకోగానే కరిగిపోయే రసమలై అంటే అందరికీ ఇష్టమే. లంచ్, డిన్నర్ తర్వాత చాలా మంది దీనిని ఇష్టంగా తింటారు. తినడం వరకు బానే ఉన్నా దీనిని ఇంట్లో చేయాలంటేనే కష్టంగా భావిస్తుంటారు. ఈ క్రమంలోనే కావాల్సినప్పుడు షాప్స్ నుంచి కొనుగోలు చేస్తుంటారు. అయితే ఇప్పుడు ఆ అవసరం లేకుండా చాలా సింపుల్గా రసమలై ప్రిపేర్ చేసుకోవచ్చు. అది కూడా పొయ్యితో పనిలేదు. టేస్ట్ గురించి చెప్పక్కర్లేదు. మరి లేట్ చేయకుండా ఇన్స్టంట్ మ్యాంగో రసమలై ఎలా చేసుకోవాలో చూసేయండి.
కావాల్సిన పదార్థాలు:
- బ్రెడ్ స్లైస్లు - 12
- మామిడి పండు గుజ్జు - 1 కప్పు
- కాచి చల్లార్చిన చల్లటి పాలు - 1 కప్పు
- పంచదార పొడి - 5 టీస్పూన్లు
- పాల పొడి - 4 టీస్పూన్లు
- యాలకుల పొడి - అర టీస్పూన్
- పిస్తా, బాదం పలుకులు - కొద్దిగా
తయారీ విధానం:
- ముందుగా బాగా పండిన మామిడిపండును తీసుకుని శుభ్రంగా కడిగి పొట్టు తీసేసి ముక్కలుగా కట్ చేసుకోవాలి.
- ఇలా కట్ చేసుకున్న ముక్కలను మిక్సీజార్లోకి వేసి మెత్తని గుజ్జులా చేసి ఒక కప్పు కొలతగా తీసుకోవాలి.
- ఓ బౌల్లోకి అర కప్పు మామిడి గుజ్జు, కాచి చల్లార్చి ఫ్రిజ్లో పెట్టిన చిక్కటి పాలు, 3 టీస్పూన్ల పంచదార పొడి, 2 టీస్పూన్ల పాల పొడి, యాలకుల పొడి, కొన్ని పిస్తా, బాదం పలుకులు బాగా కలిపి ఈ మిశ్రమాన్ని పక్కన పెట్టాలి. అవసరమైతే ఫ్రిజ్లో పెట్టొచ్చు.
- మరో గిన్నెలోకి మిగిలిన మామిడి గుజ్జు, 2 టీస్పూన్ల పంచదార పొడి, 2 టీస్పూన్ల పాల పొడి, మరికొన్ని పిస్తా, బాదం పలుకులు వేసి బాగా మిక్స్ చేసుకోవాలి.
- ఇప్పుడు మీడియం సైజ్లో రౌండ్గా, షార్ప్గా ఉన్న గిన్నె లేదా మూతను తీసుకుని బ్రెడ్ స్లైస్ మధ్యలో పెట్టి రౌండ్గా కట్ చేసుకోవాలి. ఇలా మిగిలిన బ్రెడ్ స్లైస్లను కట్ చేసుకుని పక్కన ఉంచాలి.
- రౌండ్గా కట్ చేసిన ఓ బ్రెడ్ స్లైస్ తీసుకుని దాని మీద ముందుగా ప్రిపేర్ చేసుకున్న మామిడి గుజ్జు మిశ్రమాన్ని అప్లై చేయాలి. ఆపైన మరో బ్రెడ్ స్లైస్ పెట్టి క్లోజ్ చేయాలి.
- ఇలా చేసుకున్న బ్రెడ్ను ఓ ప్లేట్లోకి తీసుకోవాలి. మిగిలిన బ్రెడ్ స్లైస్లలో కూడా స్టఫ్పింగ్ పెట్టుకుని ప్లేట్లోకి తీసుకోవాలి.
- ముందే ప్రిపేర్ చేసుకున్న మ్యాంగో పాల మిశ్రమాన్ని బ్రెడ్ స్లైస్లు మునిగేలా మొత్తం పోసుకోవాలి. ఆ తర్వాత ఆ బ్రెడ్ పైన కొన్ని మామిడి ముక్కలు, పిస్తా పలుకులు వేసి గార్నిష్ చేయాలి.
- అనంతరం ఈ డెజర్ట్ను సర్వ్ చేసుకుంటే సూపర్ టేస్టీగా ఉండే ఇన్స్టంట్ మ్యాంగో రసమలై రెడీ. నచ్చితే మీరూ ట్రై చేయండి. కావాలంటే దీనిని ఫ్రిజ్లో పెట్టి కూడా తినొచ్చు.
చిట్కాలు:
- ఈ స్వీట్ కోసం మిల్క్ బ్రెడ్ అయితే బాగుంటుంది. అలాగే బ్రెడ్ను రౌండ్ షేప్లోనే కాకుండా మీకు నచ్చిన షేప్లో కూడా కట్ చేసుకోవచ్చు.
- ఒకవేళ మీ దగ్గర కాచి చల్లార్చిన పాలు లేకపోతే పచ్చి పాలను బాగా మరిగించి చల్లారిన తర్వాత ఫ్రిజ్లో కొద్దిసేపు ఉంచి ఆ తర్వాత ఉపయోగిస్తే సరి.
- పంచదార పొడి మామిడి స్వీట్నెస్, అలాగే మీరు తినే తీపికి అనుగుణంగా కలుపుకుంటే సరిపోతుంది.
పచ్చికారంతో ఘుమఘుమలాడే "ఎగ్ ఫ్రైడ్ రైస్" - పిల్లల లంచ్ బాక్స్లకు పర్ఫెక్ట్!
శనగపిండి లేకుండానే కమ్మని "పూర్ణం బూరెలు" - పైన కరకరలాడుతూ లోపల సాఫ్ట్గా ఉండి అద్దిరిపోతాయి!
