How to Make Ice Apple Falooda at Home : "తాటి ముంజలు" ప్రకృతి అందించే అద్భుత ఆహారం. వేసవి కాలంలో మార్కెట్లో విరివిగా కనిపిస్తుంటాయి. తియ్యగా, నోట్లో వేసుకుంటే కరిగిపోయేలా ఉండే ఇవి ఆరోగ్యానికి ఎంతో మేలు చేస్తాయి. ముఖ్యంగా శరీరాన్ని చల్లబరిచే గుణాన్ని కలిగి ఉంటాయి. అందుకే వీటిని "ఐస్ యాపిల్" అని కూడా అంటుంటారు. అయితే చాలా మంది తాటి ముంజలను నేరుగా తింటుంటారు. మరికొందరు ఏమో పాయసం చేసుకుని తాగుతుంటారు. కానీ, మీకు తెలుసా? ఈ ముంజలతో ఫలూదా ప్రిపేర్ చేసుకోవచ్చని? మీరు విన్నది నిజమే. సమ్మర్లో "ఫలూదా"కు ఫ్యాన్ ఫాలోయింగ్ ఓ లెవల్లో ఉంటుంది. ఫ్రెండ్స్, ఫ్యామిలీతో కలిసి దీనిని టేస్ట్ చేసేవారు కోకొల్లలు. అయితే ఎప్పుడూ ఒకే టేస్ట్లో కాకుండా వేసవి వరప్రదాయని తాటిముంజలతో చేసుకుని తింటుంటే వేరే లెవల్ ఉంటుంది. మరి లేట్ చేయకుండా ఈ ఐస్యాపిల్ ఫలూదా ఎలా చేయాలో ఈ స్టోరీలో చూసేయండి.
కావాల్సిన పదార్థాలు:
- పాలు - ముప్పావు లీటర్
- సన్నగా తరిగిన జీడిపప్పు, బాదం, పిస్తా - పావు కప్పు
- పంచదార - నాలుగు చెంచాలు
- రోజ్ సిరప్ - సరిపడా
- వాటర్ - 3 కప్పులు
- సేమ్యా - 1 కప్పు
- తాటిముంజలు - 5
- సబ్జా గింజలు - 2 టీస్పూన్లు
- ఐస్క్రీమ్ - కొద్దిగా
తయారీ విధానం:
- ముందుగా ఓ బౌల్లోకి సబ్జా గింజలు వేసి కొన్ని నీళ్లు పోసి నానబెట్టాలి. అలాగే లేత తాటి ముంజలపై పొట్టు తీసేసి చిన్న ముక్కలుగా కట్ చేసుకోవాలి.
- స్టవ్ ఆన్ చేసి అడుగు మందంగా ఉన్న గిన్నె పెట్టి పాలు పోసుకోవాలి. ఇప్పుడు అందులోకి పంచదార యాడ్ చేసుకోవాలి.
- మీడియం ఫ్లేమ్లో పాలను అర లీటర్ అయ్యేంతవరకు మరిగించి స్టవ్ ఆఫ్ చేయాలి. పాలు చల్లారిన తర్వాత 4 టీస్పూన్ల రోజ్ సిరప్ వేసి కలిపి ఫ్రిజ్లో పెట్టాలి.
- మరోసారి స్టవ్ ఆన్ చేసి గిన్నె పెట్టి నీరు పోసుకోవాలి. నీరు మరుగుతున్నప్పుడు సేమ్యా వేసి కలిపి 5 నిమిషాలు కుక్ చేసుకుని స్టవ్ ఆఫ్ చేసి వడకట్టాలి. అందులోకి చల్లటి నీళ్లు పోసి చల్లారిన తర్వాత దీనిని కూడా ఫ్రిజ్లో పెట్టుకోవాలి.
- మరో గిన్నెలోకి 2 టీ స్పూన్ల రోజ్ సిరప్, తాటి ముంజల ముక్కలు వేసి కలిపి వీటిని కూడా ఫ్రిజ్లో ఉంచాలి.
- ఫలూదాకు కావాల్సినవన్నీ రెడీ అయ్యాయి. దీన్ని సర్వ్ చేసుకోవాలి.
- అందుకోసం గ్లాస్లో రెండు ఐస్క్యూబ్స్ వేసుకోవాలి. ఆ తర్వాత కొద్దిగా రోజ్ సిరప్, ఉడికించిన సేమ్యా, సబ్జాగింజలు, తాటి ముంజల ముక్కలు వేయాలి. మరోసారి సేమ్ ప్రాసెస్ రిపీట్ చేయాలి. అంటే రోజ్ సిరప్, సేమ్యా, సబ్జా గింజలు, తాటి ముంజలు వేసి తయారు చేసిన పాలను గ్లాస్ నిండా పోసుకోవాలి.
- చివరగా ఐస్క్రీమ్, డ్రైఫ్రూట్స్ తరుగు, రోజ్ సిరప్తో గార్నిష్ చేసుకుంటే సూపర్ టేస్టీ ఐస్ యాపిల్ ఫలూదా రెడీ. నచ్చితే మీరూ ట్రై చేయండి.
టిప్స్:
- సబ్జా గింజలను ఎక్కువసేపు నానబెట్టాల్సిన పనిలేదు. కేవలం 10 నిమిషాలు నానబెడితే చాలు.
- ఫలుదా చేసుకునేందుకు కావాల్సిన అన్ని పదార్థాలను ప్రిపేర్ చేసుకుని ఫ్రిజ్లో ఉంచాలి.
- కావాలంటే గార్నిష్ చేసే సమయంలో టూటీ ఫ్రూటీ యాడ్ చేసుకోవచ్చు. లేదంటే రకరకాల పండ్లను చిన్నగా కట్ చేసుకుని గార్నిష్ చేసుకున్నా సరిపోతుంది.
సాస్లతో పనిలేకుండా నిమిషాల్లో "మసాలా పాస్తా" - పిల్లలు ఒక్కసారి తింటే వదిలిపెట్టరు!
