How to Wash Velvet Saree at Home: వెల్వెట్ చీరలను కట్టుకోవడానికి చాలా మంది మహిళలు ఇష్టపడతారు. ఇది కట్టుకునేటప్పుడు ఆనందంగానే ఉన్నా.. ఉతికేటప్పుడు మాత్రం ఇబ్బందిగా ఉంటుంది. ఇక దానిపై మరకలు పడితే అంతే. చాలాసార్లు డ్రై క్లీనింగ్ కు ఇవ్వాల్సి వస్తుంది. అయితే.. ఈ చిట్కాలు పాటిస్తే ఎలాంటి ఇబ్బందీ లేకుండా సులభంగా ఉతుక్కోవచ్చని ఫ్యాషన్ నిపుణులు సలహా ఇస్తున్నారు. ఆ వివరాలు ఇప్పుడు చూద్దాం.
చీర ఉతికేటప్పుడు తీసుకోవాల్సిన జాగ్రత్తలు..
- మొదటగా ఓ టబ్ను తీసుకుని చల్లటి లేదా గోరువెచ్చటి నీటిని నింపాలి. (వేడి నీటిని అసలు వాడొద్దు)
- 1-2 చెంచాల తేలికపాటి డిటర్జెంట్ను నీటిలో కలపాలి.
- ఈ సబ్బు నీటిలో వెల్వెట్ చీరను చేతితో మృదువుగా జాడించాలి. ఇలా 5-6 సార్లు చేయాలి.
- ఆ తర్వాత శుభ్రమైన నీటిని తీసుకుని అందులో డిటర్జెంట్ పోయేంతా వరకు ఉతకాలి.
- అయితే, ఈ చీరలు ఉతికే సమయంలో మెలిపెట్టడం, బలవంతంగా పిండడం లాంటివి చేయకూడదు.
మరకలు పోగొట్టడం ఇలా..
ఒక చెంచా బేకింగ్ సోడా, ఒక చెంచా నిమ్మరసం, ఒక చెంచా నీటిని కలిపాలి. ఈ మిశ్రమాన్ని మరకలు అంటిన చోట పోసి చేతి వేళ్లతో రుద్దాలి. ఆ తర్వాత మరక తొలిగిపోయే వరకు మైక్రోఫైబర్ క్లాత్‌తో మెల్లగా రుద్దాలని చెప్పారు. ఇలా మరకలు పోయేవరకు మృదువుగా చేయాలని నిపుణులు చెబుతున్నారు. ఇలా కాకపోతే మరకలు ఉన్న ప్రదేశంలో కొద్దిగా నీటిని పోసి.. దానిపై డిటర్జెంట్ పౌడర్ లేదా లిక్విడ్ పోయాలి. ఆ తర్వాత చేతివేళ్లతోనే మృదువుగా రుద్దుతూ చల్లటి నీటిలో ముంచాలి. అయినా కూడా మరకలు పోకపోతే డ్రైక్లీనింగ్కు ఇవ్వాలని సలహా ఇస్తున్నారు.
ముడతలు పొగొట్టడం అలా..
ఉతికిన తర్వాత వెల్వెట్ చీరలు పూర్తిగా ముడతలు పడతాయి. అయితే.. ఈ సమస్యను అధిగమించేందుకు రాత్రంతా వేలాడదీసి ఆరబెట్టాలని సూచిస్తున్నారు. ఇలా చేసినా ముడతలు పోకపోతే చీరపై వచ్చిన లేబుల్ను పరిశీలించాలని.. ఈ క్లాత్ ఐరన్ను తట్టుకుంటుందా లేదా అన్న విషయాన్ని చూసుకోవాలని చెబుతున్నారు. ఒకవేళ ఐరన్ చేయడం సురక్షితమేనని చెబితే.. తక్కువ వేడితో డ్రై ఐరన్ చేయాలని సూచిస్తున్నారు. వస్త్రం నాణ్యత చెడిపోకుండా ఉండేందుకు చీర లోపలి నుంచి పక్కకు ఐరన్ చేయాలని సలహా ఇస్తున్నారు. ఐరన్ చేసేటప్పుడు మాత్రం చాలా జాగ్రత్తగా ఉండాలని.. లేకపోతే చీర దెబ్బతినే అవకాశం ఉంటుందని హెచ్చరిస్తున్నారు.
చీరను ఎలా కడుతున్నారు? - ఇలా కడితే "లుకింగ్ వెరీ బ్యూటిఫుల్"! - Saree Draping Tips
నార్మల్ చీరతో డిజైనర్ లుక్ - ఈ టిప్స్ పాటిస్తే మెరిసిపోతారంతే!
