ఇదొక్కటి వేసి "టమటా కుర్మా" చేసుకోండి - వీకెండ్​లో చికెన్, మటన్ కర్రీల కంటే అద్భుతంగా ఉంటుంది!

Tomato Kurma Making Process : మనందరి ఇళ్లల్లో వేరే కూరగాయలేమి లేకున్నా టమాటాలు మాత్రం తప్పనిసరిగా ఉంటాయి. అలాగే, చాలా మంది త్వరగా అయిపోతుందని రెండు టమాటాలు, ఒక ఉల్లిగడ్డతో సింపుల్​గా కర్రీ చేసుకుంటుంటారు. అయితే, వాటితో ఎప్పుడూ ఒకే రకమైన కూరలు కాకుండా ఓసారి ఈ స్టైల్​లో "టమాటా కుర్మా" చేసుకోండి. ఈ ప్రత్యేకమైన 'మసాలా పేస్ట్' వేసి చేసుకునే ఈ కర్రీ రుచిలో సరికొత్త అనుభూతినిస్తుంది. వీకెండ్​లో ఇలా ఈ కుర్మా కర్రీ చేసుకున్నారంటే దీని టేస్ట్ ముందు చికెన్, మటన్ కూరలు కూడా తక్కువైపోతాయి! అంత గొప్పగా ఉంటుంది రుచి! ఇంట్లో కూరగాయలు లేనప్పుడు కూడా ఇది సూపర్ ఆప్షన్. వేడివేడి అన్నం, చపాతీ, పులావ్ ఇలా దేనిలోకైనా మంచి కాంబినేషన్​గా నిలుస్తుంది. అలాగే, బ్రేక్​ఫాస్ట్​లో ఇడ్లీ, దోశల్లోకీ చాలా బాగుంటుంది. మరి, ఈ సూపర్ టేస్టీ టమాటా కుర్మాను ఎలా తయారు చేసుకోవాలో ఇప్పుడు చూసేద్దాం.

Tomatoes (Getty Images)

కావాల్సిన పదార్థాలు :

మసాలా పేస్ట్ కోసం :

• తెల్ల నువ్వులు - రెండు టీస్పూన్లు
• జీలకర్ర - అరటీస్పూన్
• మెంతులు - పావుటీస్పూన్
• ధనియాలు - ఒకటీస్పూన్
• దాల్చినచెక్క - చిన్న ముక్క
• లవంగాలు - మూడు
• యాలకులు - మూడు
• పచ్చిమిర్చి - రెండు
• పచ్చికొబ్బరి ముక్కలు - రెండు టీస్పూన్లు
• చింతపండు - కొద్దిగా

Masala (ETV Bharat)

తయారీ విధానం :

• కమ్మని టమాటా కుర్మా తయారీ కోసం ముందుగా ఒక స్పెషల్ మసాలా పేస్ట్​ని ప్రిపేర్ చేసుకోవాలి.
• ఇందుకోసం స్టవ్ మీద చిన్న కడాయిలో తెల్ల నువ్వులు, జీలకర్ర, మెంతులు, ధనియాలు తీసుకొని లో ఫ్లేమ్​లో వేయించాలి.
• అవి కాస్త వేగిన తర్వాత దాల్చినచెక్క, యాలకులు, లవంగాలు వేసి సన్నని సెగ మీద మంచి సువాసన వచ్చేంత వరకు వేయించుకోవాలి. అవన్నీ దోరగా వేగిన తర్వాత స్టవ్ ఆఫ్ చేసుకొని చల్లార్చుకోవాలి.
• ఇప్పుడు మిక్సీ జార్ తీసుకొని అందులో చల్లారిన మసాలా మిశ్రమం, పచ్చిమిర్చి తుంపలు, సన్నని పచ్చికొబ్బరి ముక్కలు, చింతపండు వేసుకొని ముందు వాటర్ వేయకుండా ఒకసారి గ్రైండ్ చేయాలి.
• ఆ తర్వాత కాస్త వాటర్ యాడ్ చేసుకొని మెత్తని పేస్ట్​లా మిక్సీ పట్టుకొని పక్కన పెట్టుకోవాలి. ఇప్పుడు కర్రీని ప్రిపేర్ చేసుకోవాలి.

కమ్మని ఎగ్​ బుర్జీ లాంటి "సుక్కా జుంకా"! - ఈ మహారాష్ట్ర ఫేమస్ వంటకాన్ని తప్పక రుచి చూడాల్సిందే!

Masala Paste (ETV Bharat)

కర్రీ కోసం :

• నూనె - 2 నుంచి 3 టేబుల్​స్పూన్లు
• జీలకర్ర - అరటీస్పూన్
• ఉల్లిపాయ - ఒకటి
• అల్లంవెల్లుల్లి పేస్ట్ - ఒకటీస్పూన్
• టమాటాలు - మూడు
• పసుపు - పావుటీస్పూన్
• కారం - రెండు టీస్పూన్లు(రుచికి తగినంత)
• ఉప్పు - రుచికి సరిపడా

Tomato Kurma at Home (ETV Bharat)

• టమాటా కుర్మా తయారీ కోసం ముందుగా ఉల్లిపాయను సన్నగా, పొడుగ్గా తరుక్కోవాలి. అలాగే, టమాటాలను కాస్త పెద్ద సైజ్ ముక్కలుగా కట్ చేసుకొని పక్కనుంచాలి.
• స్టవ్ మీద పాన్ పెట్టుకొని ఆయిల్ వేసుకోవాలి. నూనె కొద్దిగా కాగాక జీలకర్ర, కట్ చేసి పెట్టుకున్న ఆనియన్స్ వేసి అవి కాస్త రంగు మారేంత వరకు ఫ్రై చేసుకోవాలి.
• తర్వాత అల్లంవెల్లుల్లి పేస్ట్ వేసి పచ్చివాసన పోయేంత వరకు ఫ్రై చేయాలి. ఇదే టైమ్​లో కరివేపాకు కూడా వేసి వేయించుకోవాలి.
• ఆ మిశ్రమం చక్కగా వేగినందునుకున్నాక ముందుగానే కట్ చేసి పెట్టుకున్న టమాటా ముక్కలు వేసి హై ఫ్లేమ్​లో రెండు నిమిషాల పాటు కలుపుతూ వేయించాలి.

Tomato Kurma Preparation (ETV Bharat)

• అనంతరం పసుపు, కారం, ఉప్పు వేసి అవి ముక్కలకు పట్టేలా బాగా కలపాలి. తర్వాత మూతపెట్టి మీడియం ఫ్లేమ్​లో మూడు నిమిషాల పాటు మగ్గించుకోవాలి.
• మూడు నిమిషాల అనంతరం టమాటాలు మెత్తబడి ఆయిల్ కూడా సెపరేట్ అవ్వడం స్టార్ట్ అవుతుంది. అప్పుడు అందులో ముందుగా ప్రిపేర్ చేసి పెట్టుకున్న మసాలా పేస్ట్​ని యాడ్ చేసుకొని ఒకసారి అంతా కలిసేలా బాగా కలపాలి.
• తర్వాత ఆ మిశ్రమంలో ఒక కప్పు వాటర్(గ్రేవీకి సరిపడా) వేసుకొని కలిపి మూతపెట్టి ఆరు నుంచి ఏడు నిమిషాల పాటు బాగా ఉడికించుకోవాలి.
• చివర్లో కొత్తిమీర తరుగు వేసుకొని కలిపి స్టవ్ ఆఫ్ చేసుకుంటే చాలు. అంతే, సూపర్ టేస్టీతో ఘుమఘుమలాడే "టమాటా కుర్మా" మీ ముందు ఉంటుంది!
  

టిప్స్ :

Tomato Kurma (ETV Bharat)

• ఇక్కడ మీరు నువ్వులు వద్దనుకుంటే వాటి ప్లేస్​లో పల్లీలను తీసుకోవచ్చు. అలాగే, పచ్చికొబ్బరి లేకపోతే అందుకు బదులుగా ఎండుకొబ్బరిని అయినా వాడుకోవచ్చు.
• ఈ రెసిపీ టేస్ట్ మొత్తం ముందుగా ప్రిపేర్ చేసుకునే కుర్మా మసాలా పేస్ట్​లోనే దాగి ఉంటుంది. కాబట్టి, దాన్ని పర్ఫెక్ట్​గా చేసుకొని ఈ కర్రీ చేసుకున్నారంటే రుచి అద్దిరిపోతుంది.

"వడలు" ప్రిపేర్ చేసుకోవడం ఇంత ఈజీనా! - పిండి రుబ్బకుండానే నిమిషాల్లో రెడీ! - పైన క్రిస్పీగా, లోపల సాఫ్ట్​గా!

రవ్వతో ఇలా "చిప్స్" చేసుకోండి - కరకరలాడుతూ నెల రోజులు నిల్వ! - పైగా నూనె పీల్చవు!