Instant Punugulu Recipe : అటుకులలో ఫైబర్ కంటెంట్ ఎక్కువగా ఉండి ఆరోగ్యానికి ఎంతో మేలు చేస్తుంది. ఈ క్రమంలో ఎక్కువ మంది వీటితో తరచుగా మార్నింగ్ బ్రేక్ఫాస్ట్లో పోహా చేసుకుంటుంటారు. అయితే, ఎప్పుడు అదే కాకుండా అటుకులతో క్విక్ అండ్ ఈజీగా కరకరలాడే "పునుగులను" ప్రిపేర్ చేసుకోవచ్చు. వాతావరణం చల్లగా ఉన్న టైమ్లో వేడి వేడిగా అప్పటికప్పుడు ఏమైనా స్నాక్స్ ప్రిపేర్ చేసుకొని తినాలనిపిస్తే వీటిని ట్రై చేయండి. ఎలాంటి పప్పులు నానబెట్టి, రుబ్బే పనిలేకుండా ఇన్స్టంట్గా ఇవి రెడీ అయిపోతాయి. వంటసోడా కూడా వేయకుండానే ఇవి చక్కగా పొంగి మంచి టేస్టీగా, క్రిస్పీగా వస్తాయి. పైగా, నూనె కూడా తక్కువే పీల్చుకుంటాయి! మరి, ఇంకెందుకు ఆలస్యం చల్లని వేళ సింపుల్గా ఇలా అటుకులతో పునుగులను చేసుకొని ఇంటిల్లిపాదీ ఎంజాయ్ చేయండి.
కావాల్సిన పదార్థాలు :
- అటుకులు - ఒక కప్పు
- పెరుగు - అర కప్పు
- ఉప్పు - రుచికి తగినంత
- పొడి బియ్యప్పిండి - ఒక కప్పు
- మీడియం సైజ్ ఉల్లిపాయ - ఒకటి
- పచ్చిమిర్చి - మూడు
- కరివేపాకు - కొద్దిగా
- జీలకర్ర - అరటీస్పూన్
- నూనె - వేయించడానికి సరిపడా
కరకరలాడే "మూంగ్ దాల్" బయట కొనాల్సిన పనిలేదు - ఇంట్లోనే ఈజీగా ప్రిపేర్ చేసుకోండి!
తయారీ విధానం :
- ఈ రెసిపీ కోసం ముందుగా ఒక మిక్సింగ్ బౌల్లో మందపాటి అటుకులను ఒకటికి రెండు సార్లు శుభ్రంగా కడగాలి.
- తర్వాత అందులో కాస్త పులిసిన పెరుగు, ఒక కప్పు వాటర్ వేసుకొని కలిపి పది నిమిషాల పాటు పక్కన పెట్టుకోవాలి.
- అటుకులు నానేలోపు రెసిపీలోకి కావాల్సిన ఉల్లిపాయ, కరివేపాకు, పచ్చిమిర్చిలను వీలైనంత సన్నగా తరుక్కొని రెడీగా ఉంచుకోవాలి.
- పది నిమిషాల అనంతరం మూత తీసి చూస్తే అటుకులు పెరుగులో బాగా నాని ఉంటాయి. అప్పుడు ఆ మిశ్రమాన్ని మిక్సీ జార్లోకి తీసుకొని ఆపై అందులో రుచికి తగినంత ఉప్పు, పొడి బియ్యప్పిండి వేసుకొని ఒకసారి గ్రైండ్ చేసుకోవాలి.
- తర్వాత అందులో అవసరం మేరకు కొద్దిగా నీటిని వేసుకొని బోండాలకు కావాల్సిన కన్సిస్టెన్సీలో పిండిని గ్రైండ్ చేసుకొని పక్కన పెట్టుకోవాలి.
- ఇక్కడ పిండి కన్సిస్టెన్సీ అనేది కాస్త గట్టిగానే ఉండేలా చూసుకోవాలి. ఎందుకంటే జారుడుగా ఉంటే పునుగులు నూనెను ఎక్కువగా పీల్చేస్తాయని గుర్తుంచుకోవాలి.
- ఆవిధంగా పిండిని సిద్ధం చేసుకున్నాక దాన్ని ఒక మిక్సింగ్ బౌల్లోకి తీసుకోవాలి. తర్వాత అందులో ముందుగా కట్ చేసి పెట్టుకున్న సన్నని ఉల్లిపాయ తరుగు, కరివేపాకు తరుగు, పచ్చిమిర్చి తరుగు, జీలకర్ర వేసుకొని అవన్నీ పిండిలో చక్కగా కలిసేలా బాగా కలుపుకొని పక్కనుంచాలి.
- ఇప్పుడు పునుగులు వేసుకోవడానికి స్టవ్ మీద కడాయిలో డీప్ ఫ్రైకి తగినంత నూనె పోసుకొని వేడి చేసుకోవాలి.
- ఆయిల్ వేడయ్యాక స్టవ్ను మీడియం ఫ్లేమ్లో ఉంచి కలిపి పెట్టుకున్న పిండిని చేతిలోకి కొద్దికొద్దిగా తీసుకుంటూ పునుగుల మాదిరిగా వేసుకోవాలి.
- పాన్లో సరిపడా వేసుకున్నాక వెంటనే కదపకుండా కాసేపు వేగిన తర్వాత జాలి గరిటెతో రెండు వైపులా తిప్పుకుంటూ మంచి కలర్ వచ్చేంత వరకు వేయించుకోవాలి.
- ఆవిధంగా వేయించుకున్నాక వాటిని టిష్యూ పేపర్ పరచిన ప్లేట్లోకి తీసుకొని కాసేపు ఉంచి వేడివేడిగా సర్వ్ చేసుకుంటే చాలు. అంతే, అటుకులతో అప్పటికప్పుడు సూపర్ టేస్టీగా కరకరలాడే "పునుగులు" రెడీ అయిపోతాయి!
- ఆపై ఈ పునుగులను వేడి వేడిగా టమాటా చట్నీ లేదా మీకు నచ్చిన చట్నీతో సర్వ్ చేసుకొని తింటుంటే ఆ ఫీలింగ్ సూపర్గా ఉంటుంది.
టిప్స్ :
- ఈ పునుగుల తయారీ కోసం కాస్త మందపాటి అటుకులను తీసుకోవాలి. ఇక్కడ అటుకులు తీసుకున్న కప్పునే మిగతా ఇంగ్రీడియంట్స్ తీసుకోవడానికి వాడుకోవాలి.
- కాస్త పులిసిన పెరుగు వేసుకోవడం ద్వారా పునుగులు చాలా రుచికరంగా ఉంటాయి.
- నూనె కాగిన తర్వాత మాత్రమే పునుగులు వేసుకొని వేయించుకోవాలి. లేదంటే ఎక్కువ ఆయిల్ పీల్చేస్తాయని గుర్తుంచుకోవాలి.
స్వీట్ షాప్ స్టైల్ "గట్టి పకోడీ" - ఈ టిప్స్, కొలతలు పాటిస్తే కరకరలాడుతుంది! - వారం పైనే నిల్వ!
నూనె పీల్చకుండా మినపప్పుతో "మైసూర్ బోండాలు" - పిండిని ఇలా కలిపితే పొంగుతూ, కరకరలాడుతూ వస్తాయి!
