Suryakala Sweet Recipe in Telugu : ఇంట్లోనే సింపుల్గా ఏదైనా స్వీట్ ప్రిపేర్ చేసుకోవాలనుకుంటున్నారా? అది కూడా రొటీన్ తీపి వంటకం కాకుండా డిఫరెంట్గా ఉండాలని కోరుకుంటున్నారా? అయితే, మీకోసమే ఈ సూపర్ రెసిపీ. అదే, నోరూరించే "సూర్యకళ స్వీట్". ఈ టిప్స్ ఫాలో అవుతూ చేసుకున్నారంటే అచ్చం స్వీట్ షాప్ స్టైల్లో తియ్యగా, జ్యూసీ జ్యూసీగా ఎంతో రుచికరంగా వస్తాయి. పైన క్రిస్పీగా, లోపల జ్యూసీగా ఉండే వీటిని ఇంటిల్లిపాదీ చాలా ఇష్టంగా తింటారు! మరి, ఈ సూపర్ స్వీట్ రెసిపీని ఎలా ప్రిపేర్ చేసుకోవాలి? కావాల్సిన ఇంగ్రీడియంట్స్ ఏంటో ఈ స్టోరీలో చూద్దాం.
కావాల్సిన పదార్థాలు :
స్టఫింగ్ కోసం :
- పాలు - ఒక లీటర్న్నర
- పంచదార - రెండు టేబుల్స్పూన్లు
- నెయ్యి - ఒక టీస్పూన్
- జీడిపప్పు పలుకులు - కొద్దిగా
- బాదం పలుకులు - కొన్ని
పిండి కోసం :
- మైదా - రెండు కప్పులు
- ఉప్పు - చిటికెడు
- వంటసోడా - రెండు చిటికెళ్లు
- నెయ్యి - పావు కప్పు
ఇంట్లోనే స్వీట్ షాప్ స్టైల్ "బూందీ లడ్డూలు" - ఈ టిప్స్తో మొదటిసారి చేసినా పర్ఫెక్ట్గా వస్తాయి!
తయారీ విధానం :
- ఈ స్వీట్ తయారీ కోసం ముందుగా స్టవ్ మీద కడాయి పెట్టి కొన్ని నీళ్లను పోసి బాగా మరిగించి పారబోసుకోవాలి.
- ఇలా చేయడం ద్వారా ఇంతకుమునుపు కడాయిలో వండిన ఫ్లేవర్ ఏమి పాలలోకి రాకుండా ఉంటుంది. అలాగే, పాలు విరిగిపోకుండా ఉంటాయి.
- తర్వాత కడాయిలో చిక్కని పాలను పోసుకొని హై ఫ్లేమ్లో కలుపుతూ 30 నుంచి 45 నిమిషాల పాటు మరిగించుకోవాలి.
- పాలు బాగా మరిగి చిక్కని మిశ్రమంలా(ఫొటోలో చూపిస్తున్న విధంగా) మారిన తర్వాత అందులో కోవాకు తీపి కోసం పంచదార వేసుకొని మరికొద్దిసేపు కలుపుతూ ఉడికించుకోవాలి.
- ఇది చల్లారిన తర్వాత మరికాస్త చిక్కబడుతుంది కాబట్టి కాస్త లూజుగా ఉన్నప్పుడే స్టవ్ ఆఫ్ చేసుకొని పాన్ని దింపి చల్లార్చుకోవాలి.
- ఇప్పుడు ప్లేట్లో మైదా పిండి, ఉప్పు, వంటసోడా తీసుకొని ఒకసారి బాగా కలిపి నెయ్యి వేసుకొని అది పిండికి పట్టేలా చేతితో రబ్ చేస్తూ కలుపుకోవాలి.
- అలా కలిపాక పిండి చక్కగా బైండ్ అవుతున్నట్లయితే నెయ్యి సరిపోయిందని గుర్తుంచుకోవాలి. అలాకాకపోతే మరికొద్దిగా నెయ్యి వేసి కలుపుకోవచ్చు.
- ఆ తర్వాత అందులో తగినన్ని నీటిని కొద్దికొద్దిగా యాడ్ చేసుకుంటూ పిండిని మరీ గట్టిగా, లూజుగా కాకుండా మీడియం కన్సిస్టెన్సీలో మెత్తని ముద్దలా కలుపుకొని మూతపెట్టి 10 నిమిషాల పాటు పక్కన పెట్టుకోవాలి.
- ఆలోపు రెసిపీలోకి కావాల్సిన పంచదార సిరప్ని ప్రిపేర్ చేసుకోవాలి.
పాకం కోసం :
- పంచదార - 2 కప్పులు(400 గ్రాములు)
- యాలకుల పొడి - పావుటీస్పూన్
- నేచురల్ ఫుడ్ కలర్ - కొద్దిగా
- నిమ్మరసం - కొద్దిగా
- ఇందుకోసం స్టవ్ మీద లోతుగా ఉండే గిన్నెలో పంచదార, ఒక కప్పు నీళ్లను తీసుకొని మరిగించుకోవాలి.
- పంచదార పూర్తిగా కరిగి జిడ్డుగా, నూనెలా మారినప్పుడు(అంటే తీగ పాకం రాక ముందే) మంచి ఫ్లేవర్ కోసం యాలకుల పొడి, కలర్ కోసం కొద్దిగా నేచురల్ ఫుడ్ కలర్ వేసుకొని కలపాలి.
- ఆపై పాకం చల్లారిన కూడా గట్టిపడకుండా ఉండడానికి పావు చెక్క నిమ్మరసం పిండుకొని మరోసారి కలిపి స్టవ్ ఆఫ్ చేసుకొని పాన్ని దింపి మూతపెట్టి పక్కనుంచాలి.
- అనంతరం స్టఫింగ్ కోసం స్టవ్ మీద పాన్ పెట్టుకొని నెయ్యి వేసుకోవాలి. అది కరిగి లైట్గా వేడయ్యాక పలుకులుగా ఉండేలా దంచుకున్న జీడిపప్పు, బాదంపప్పు తరుగు వేసుకొని లో ఫ్లేమ్లో దోరగా వేయించుకోవాలి.
- అవి చక్కగా వేగిన తర్వాత స్టవ్ ఆఫ్ చేసుకొని వాటిని ముందుగా ప్రిపేర్ చేసుకున్న పూర్తిగా చల్లారి గట్టి పడిన కోవాలో వేసి అంతా బాగా కలుపుకోవాలి.
- ఆపై కావాల్సిన పరిమాణంలో కోవా స్టఫింగ్ తీసుకొని చిన్న చిన్న ఉండలుగా చేసుకొని పక్కన పెట్టుకోవాలి.
- ఇప్పుడు ముందుగా కలిపి పెట్టుకున్న పిండి ముద్దను తీసుకొని మరోసారి బాగా కలుపుకోవాలి. తర్వాత దాన్ని రెండు ఉండలుగా చేసుకొని ఒకదాన్ని తీసుకొని చపాతీ పీటపై ఉంచి మరీ పల్చగా, మందంగా కాకుండా మీడియం థిక్నెస్తో వీలైనంత వరకు పెద్ద చపాతీలా వత్తుకోవాలి.
- అనంతరం ఆ పెద్ద రోటీని మీక కావాల్సిన సైజ్లో అంచులు షార్ప్గా ఉండే చిన్న గిన్నె లేదా గ్లాసుతో చిన్న చిన్న అప్పాల్లా కట్ చేసుకొని మిగతా పిండిని తీసేసుకోవాలి.
- ఆవిధంగా చేసుకున్నాక ఒక చిన్న అప్పం తీసుకొని దానిపై ముందుగా ప్రిపేర్ చేసి పెట్టుకున్న ఒక కోవా ఉండను ఉంచి ఆపై అది చక్కగా క్లోజ్ అవ్వడం కోసం చుట్టూ కొద్దిగా వాటర్ అప్లై చేసుకోవాలి.
- ఆపై దాని మీద మరో చిన్న అప్పాన్ని ఉంచి లోపల గాలి ఏమి ఉండకుండా చుట్టూ వేలితో వత్తి క్లోజ్ చేయాలి.
- అనంతరం దాన్ని చేతిలోకి తీసుకొని వేళ్లతో అంచుల వెంట నిలువుగా కొద్దిగా కట్ చేసి మళ్లీ సైడ్కి మడుస్తూ అంటే సూర్యకిరణాల లాంటి డిజైన్ వచ్చేలా పైన ఫొటోలో చూపిస్తున్నట్లుగా ప్రిపేర్ చేసుకోవాలి. ఆవిధంగా డిజైన్ చేసుకున్నాక చుట్టూ మరోసారి చేతితో చక్కగా సర్దుకోవాలి.
- ఇలా చేసేటప్పుడు స్టఫింగ్ కనిపించే లోపల ఎలాంటి హోల్ పడకుండా చూసుకోవాలి. ఈవిధంగా డిజైన్ చేసుకోవడం ఇబ్బంది అనుకునేవారు క్లోజ్ చేసుకున్నాక ఫోర్క్ చెంచాతో సింపుల్గా డిజైన్ పెట్టుకుంటే సరిపోతుంది.
- ఈవిధంగా పిండి మొత్తాన్ని ఒక్కొక్కటిగా చేసుకొని ఒక వెడల్పాటి ప్లేట్లో ఉంచి డ్రై అయిపోకుండా తడిబట్ట వేసి పక్కనుంచాలి.
- అనంతరం స్టవ్ మీద కడాయిలో వేయించడానికి సరిపడా ఆయిల్ పోసి వేడి చేసుకోవాలి. నూనె కాగిన తర్వాత ముందుగా సూర్యకళ షేప్లో రెడీ చేసుకున్న వాటిని నెమ్మదిగా పాన్లో సరిపడా వేసుకొని స్టవ్ను లో టూ మీడియం ఫ్లేమ్కి టర్న్ చేసుకుంటూ వేయించాలి.
- అవి నూనెలో కాస్త బిగుసుకున్న తర్వాత గరిటెతో తిప్పుతూ రెండు వైపులా లైట్ గోల్డెన్ కలర్ వచ్చేంత వరకు వేయించాలి. ఇవి సరిగ్గా వేగడానికి పావు గంట వరకు టైమ్ పట్టొచ్చు.
- అలా వేయించుకున్నాక వాటిని తీసి ముందుగా రెడీ చేసి పెట్టుకున్న గోరువెచ్చని చక్కెర సిరప్లో వేసి ఒక నిమిషం పాటు ఉంచి బయటకు తీసుకొని సర్వ్ చేసుకుంటే సరిపోతుంది.
- అంతే, స్వీట్ షాప్ స్టైల్లో ఎంతో రుచికరంగా జ్యూసీగా ఉండే "సూర్యకళ స్వీట్" ఇంట్లోనే రెడీ అయిపోతుంది!
టిప్స్ :
- ఇక్కడ నెయ్యి ఇష్టంలేని వాళ్లు దాని ప్లేస్లో నూనెను అయినా వేసుకోవచ్చు.
- అప్పంలో స్టఫింగ్ వేసుకున్నాక చక్కగా సీల్ చేయకపోతే నూనెలో వేసినప్పుడు అది ఆయిల్లో పడిపోయే ఛాన్స్ ఉంటుంది. కాబట్టి చక్కగా క్లోజ్ చేసుకోవాలి.
- రెసిపీలోకి కావాల్సిన పంచదార సిరప్ సరిగా ఉడకకపోతే స్వీట్స్ అందులో వేసినప్పుడు మెత్తబడిపోతాయని గుర్తుంచుకోవాలి.
మినప్పప్పుతో "జాంగ్రీలు" చేసుకోండి - జ్యూసీ జ్యూసీగా, చాలా కమ్మగా వస్తాయి! - ఖర్చు కూడా తక్కువే!
తియ్యతియ్యగా నోరూరించే "జర్దా పులావ్" - అన్నం వండుకునేంత ఈజీగా చేసుకోవచ్చు! - రుచి అమోఘం!
