Telangana Dawat Style Mutton Curry in Telugu : తెలంగాణలో ఇంట్లో ఏ చిన్న ఫంక్షన్ జరిగినా నాన్వెజ్ తప్పకుండా చేస్తారు. తెలంగాణ వంటకాల అనగానే అందరికీ ఘుమఘుమలాడే మటన్ బొక్కల కర్రీ గుర్తుకొస్తుంటుంది. అయితే, మీరు ఎప్పుడైనా ఈ దావత్ స్పెషల్ మటన్ కర్రీ ట్రై చేశారా? ఇక్కడ చెప్పిన విధంగా మటన్ కర్రీ చేస్తే స్పైసీగా సూపర్ టేస్టీగా ఉంటుంది. ఈ కర్రీ చపాతీ, పులావ్, బగారా రైస్లోకి అద్దిరిపోతుంది. మరి సింపుల్గా ఈ మటన్ కర్రీ ఎలా చేయాలో ఇప్పుడు చూద్దాం.
కావాల్సిన పదార్థాలు :
- మటన్ - అర కేజీ
- ఉప్పు, కారం - రుచికి సరిపడా
- పసుపు - అరటీస్పూన్
- 3 టేబుల్స్పూన్లు నూనె
- ఉల్లిపాయలు - 2
- పచ్చిమిర్చి -4
- కొత్తిమీర తరుగు - కొద్దిగా
- పుదీనా తరుగు - కొద్దిగా
- అల్లం వెల్లుల్లి పేస్ట్ - టేబుల్స్పూన్
- కసూరీ మేథి - కొద్దిగా
- టమోటా - 2
మసాలా పొడి కోసం కావాల్సిన పదార్థాలు
- ధనియాలు - 2 టీ స్పూన్లు
- జీలకర్ర - అర టీ స్పూన్
- ఎండు కొబ్బరి ముక్కలు - టేబుల్స్పూన్
- యాలకులు - 4
- లవంగాలు - 4
- దాల్చిన చెక్క - చిన్నది
- షాజీరా - టీస్పూన్
- జీడిపప్పులు - 6
- గసగసాలు - టీస్పూన్
అటుకులతో పోహా తినాలనిపించడం లేదా? -ఓసారి ఇలా "క్రిస్పీ కట్లెట్స్" ట్రై చేయండి! భలే రుచిగా ఉంటాయి!
తయారీ విధానం
- ముందుగా శుభ్రంగా కడిగిన మటన్ ముక్కలు ఒక గిన్నెలోకి తీసుకుని పక్కన పెట్టుకోండి. (తెలంగాణ ధావత్ స్టైల్లో చేసే ఈ మటన్ కర్రీ చేయడం కోసం కారం, మసాలాలతో మటన్ మ్యారినేట్ చేయాల్సిన అవసరం లేదు.)
- స్టవ్పై కడాయి పెట్టి మసాలా పొడి కోసం కావాల్సిన పదార్థాలన్నీ ఒక్కోటిగా వేసి లో ఫ్లేమ్లో వేయించుకోవాలి. చివరిగా టీస్పూన్ గసగసాలు వేసి కలిపి స్టవ్ ఆఫ్ చేసుకోవాలి.
- ఈ మసాలా దినుసులు చల్లారిన తర్వాత మిక్సీ జార్లో వేసుకుని మెత్తగా పొడి చేసుకోండి. ఆపై ఇందులో కొన్ని నీళ్లు పోసి మెత్తని పేస్ట్లా మిక్సీ పట్టుకోండి. ఈ మసాలా పేస్ట్ని గిన్నెలోకి తీసుకొని పక్కన పెట్టుకోండి.
- ఇప్పుడు మటన్ కర్రీ కోసం స్టవ్ పై కుక్కర్ పెట్టుకుని 3 టేబుల్ స్పూన్ల ఆయిల్ నూనె వేసి వేడి చేయండి. ఇందులో కొద్దిగా జాపత్రి, చిన్న అనాసపువ్వు, నల్ల యాలక్కాయ, బిర్యానీ ఆకు, కొద్దిగా బిర్యానీ పువ్వు వేసి వేయించండి. ఆపై పచ్చిమిర్చి, ఉల్లిపాయ ముక్కలు వేసి ఫ్రై చేయండి.
- ఆనియన్స్ కాస్త రంగు మారిన తర్వాత పుదీనా, కొత్తిమీర తరుగు, కసూరీ మేథి కొద్దిగా వేసి ఫ్రై చేయండి.
- అనంతరం అల్లం వెల్లుల్లి పేస్ట్ వేయించండి. ఇప్పుడు శుభ్రంగా కడిగిన మటన్, కొద్దిగా ఉప్పు, పసుపు వేసి బాగా కలిపి 10 నిమిషాలు ఉడికించుకోండి.
- తర్వాత రుచికి సరిపడా కారం, గ్రైండ్ చేసుకున్న మసాలా పేస్ట్ వేసి బాగా కలపండి.
- తర్వాత టమోటా ముక్కలు వేసి కలిపి 5 నిమిషాలు ఉడికించుకోండి.
- అనంతరం కర్రీలో గ్రేవీకి సరిపడా నీళ్లు పోసి కలిపి మూత పెట్టి 5 విజిల్స్ వచ్చే వరకు ఉడికించి స్టవ్ ఆఫ్ చేయండి.
- కుక్కర్లో ఆవిరి మొత్తం పోయిన తర్వాత వేడివేడి మటన్ కర్రీ సర్వ్ చేసుకుంటే సరి!
- తెలంగాణ ధావత్ స్టైల్లో ఉండే ఈ మటన్ కర్రీ ఘాటుగా ఎంతో టేస్టీగా ఉంటుంది.
"క్రిస్పీ సగ్గుబియ్యం వడలు" - ఈ పద్ధతిలో పొటాటో ఉడకబెట్టకుండా సింపుల్గా ట్రై చేయండి!
