ఎన్నో పోషకాలున్న రాగిపిండితో కరకరలాడే "చెక్కలు" - కేవలం పావుగంటలో రెడీ! - నూనె కూడా పీల్చవు!

అప్పటికప్పుడు ఈజీగా చేసుకునే కమ్మని 'చెక్కలు' - ఇంటిల్లిపాదీ చాలా ఇష్టంగా తింటారు!

Crunchy and Tasty Ragi Chekkalu Recipe : నేటి రోజుల్లో చాలా మంది ఆరోగ్య ప్రయోజనాల దృష్ట్యా మిల్లెట్స్​ను డైలీ డైట్​లో భాగం చేసుకుంటున్నారు. అందులో భాగంగానే ముఖ్యంగా రాగులతో చేసిన ఇడ్లీ, దోశ, జావ, అంబలి వంటివి చేసుకొని మార్నింగ్ బ్రేక్​ఫాస్ట్​లో ఆరగిస్తున్నారు. అయితే, ఆరోగ్యానికి మేలు చేసే రాగులతో అవి మాత్రమే కాకుండా క్విక్ అండ్ ఈజీగా చేసుకునే స్నాక్ రెసిపీ కూడా ఉంది. అదే, కరకరలాడే "రాగి చెక్కలు". వీటినే 'రాగి వడలు, రాగి అప్పాలు, చెక్క గారెలు' ఇలా రకరకాల పేర్లతో పిలుస్తుంటారు. ఇవి బియ్యప్పిండి చెక్కల కంటే కూడా క్రంచీగా, చాలా టేస్టీగా ఉంటాయి. అంతేకాదు, ఈ చెక్కలను అప్పటికప్పుడు కేవలం పది నుంచి పదిహేను నిమిషాల్లో ఈజీగా ప్రిపేర్ చేసుకొని హాయిగా తినేయొచ్చు. పైగా నూనె కూడా తక్కువే పీల్చుకుంటాయి! మరి, లేట్ చేయకుండా అందుకు కావాల్సిన పదార్థాలేంటి? తయారీ విధానం ఎలాగో ఇప్పుడు చూసేద్దాం.

Pindi (ETV Bharat)

తీసుకోవాల్సిన పదార్థాలు :

• రాగి పిండి - ఒక కప్పు(125 గ్రాములు)
• బియ్యప్పిండి - రెండు టేబుల్​స్పూన్లు
• నూనె - ఒక టేబుల్​స్పూన్
• పచ్చిమిర్చి - ఒకట్రెండు
• ఉల్లిపాయ - ఒకటి
• సన్నని కరివేపాకు తరుగు - కొద్దిగా
• ఉప్పు - రుచికి తగినంత
• కారం - అరటీస్పూన్
• పసుపు - పావుటీస్పూన్
• జీలకర్ర - అరటీస్పూన్
• వంటసోడా - పావుటీస్పూన్
• పల్లీలు - రెండు టేబుల్​స్పూన్లు
• నూనె - వేయించడానికి తగినంత

Tasty Ragi Chekkalu (ETV Bharat)

తయారీ విధానం :

• ఈ హెల్దీ అండ్ టేస్టీ స్నాక్ రెసిపీ కోసం ముందుగా ఉల్లిపాయ, పచ్చిమిర్చిలను వీలైనంత సన్నగా తరుక్కొని పక్కన పెట్టుకోవాలి.
• ఇప్పుడు స్టవ్ మీద ఒక గిన్నెలో కప్పు(250ఎంఎల్) వాటర్ తీసుకొని వేడి చేసుకోవాలి.
• నీళ్లు వేడయ్యే లోపు ఒక మిక్సింగ్ బౌల్​లో ముందుగానే జల్లించి పెట్టుకున్న రాగి పిండిని తీసుకొని ఆపై అందులో బియ్యప్పిండి, నూనె వేసుకొని ఒకసారి మొత్తం కలిసేలా చేతితో పిండిని రబ్ చేస్తూ బాగా కలుపుకోవాలి.

Ragi Chekkalu (ETV Bharat)

• ఆవిధంగా పిండిని కలిపాక ఆ మిశ్రమంలో ముందుగా కట్ చేసి పెట్టుకున్న సన్నని ఉల్లిపాయ, పచ్చిమిర్చి, కరివేపాకు తరుగు, రుచికి సరిపడా ఉప్పు, కారం, పసుపు, జీలకర్ర, వంటసోడా వేసుకొని ఆనియన్స్​ని కాస్త ప్రెస్ చెసినట్లు చేస్తూ అన్నీ కలిసేలా బాగా మిక్స్ చేసుకోవాలి.
• అనంతరం స్టవ్ మీద వేడి చేసుకున్న నీళ్ల​ను తీసుకొని అవసరానికి సరిపడా(ఇక్కడ తీసుకున్న క్వాంటిటీకి ముప్పావు కప్పు వరకు పడుతాయి) కొద్దికొద్దిగా యాడ్ చేసుకుంటూ ముందు గరిటెతో మిక్స్ చేసుకోవాలి.
• తర్వాత చేతితో వత్తుతూ చక్కగా కలుపుకోవాలి. ఇలా పిండిని మిక్స్ చేసుకునే క్రమంలోనే అందులో వేయించి పొట్టు తీసి బద్దలుగా చేసిన పల్లీలను యాడ్ చేసుకొని చెక్కలకు కావాల్సిన కన్సిస్టెన్సీలో పిండిని మరోసారి చక్కగా కలుపుకొని పక్కనుంచాలి.

Ragi Chekkalu Recipe (ETV Bharat)

• ఇప్పడు బటర్ పేపర్ లేదా పాలిథిన్ కవర్ తీసుకొని దానిపై కాస్త నూనె అప్లై చేసుకోవాలి.
• ఆపై ముందుగా ప్రిపేర్ చేసుకున్న పిండిని కొద్దిగా తీసుకొని చేతితో వత్తుతూ చెక్కల మాదిరిగా వీలైనంత పల్చగా చేసుకోవాలి.
• చుట్టూ రౌండ్ షేప్ వచ్చేలా పగిలిపోకుండా చక్కగా చేసుకున్నాక త్వరగా ఫ్రై అవ్వడానికి మధ్యలో చిన్న హోల్ చేసుకోవాలి. ఆపై దాన్ని ఏదైనా కవర్ లేదా క్లాత్​పై ఉంచాలి. ఇలా పిండి మొత్తాన్ని ప్రిపేర్ చేసుకొని పక్కన పెట్టుకోవాలి.

Ragi Chekkalu Recipe (ETV Bharat)

• ఇప్పుడు స్టవ్ మీద కడాయిలో వేయించడానికి తగినంత ఆయిల్ పోసుకొని వేడి చేసుకోవాలి. నూనె మీడియంగా వేడయ్యాక చిన్న పిండి ముద్దను వేసి చెక్ చేసుకోవాలి.
• నూనె సరిగా కాగిన తర్వాత స్టవ్​ను మీడియం ఫ్లేమ్​లో ఉంచి ముందుగా ప్రిపేర్ చేసుకున్న చెక్కలను పాన్​లో సరిపడా వేసుకొని 30 సెకన్ల పాటు కదపకుండా వేయించాలి.
• ఆ తర్వాత గరిటెతో తిప్పుకుంటూ రెండు వైపులా చక్కగా వేగి, క్రిస్పీగా మారేంత వరకు ఫ్రై చేసుకోవాలి. ఆవిధంగా వేయించుకున్నాక వాటిని ఒక ప్లేట్​లోకి తీసుకొని సర్వ్ చేసుకుంటే చాలు. అంతే, నోరూరించే కరకరలాడే కమ్మని "రాగి చెక్కలు" రెడీ!

Ragi Chekkalu Making (ETV Bharat)

ఈ చిట్కాలతో పర్ఫెక్ట్ టేస్ట్ :

• బియ్యప్పిండిని కొద్దిగా వేసుకొని చెక్కలు చేసుకోవడం ద్వారా ఇవి క్రిస్పీగా కరకరలాడుతూ వస్తాయి.
• ఈ స్నాక్ రెసిపీ ఎక్కువ రోజులు నిల్వ ఉండాలంటే ఆనియన్స్ వేయకుండా ప్రిపేర్ చేసుకుంటే చాలా రోజులు తాజా నిల్వ ఉంటాయి.
• ఈ చెక్కలలో వేయించిన పల్లీలను వేసుకోవడం ద్వారా తినేటప్పుడు అవి పంటికి తగులుతూ చాలా టేస్టీగా ఉంటాయి.
• రాగి వడలను సరిగా వేయించుకోకపోతే కాస్త మెత్తగా ఉంటాయని గుర్తుంచుకోవాలి. కాబట్టి, మీడియం ఫ్లేమ్​లో క్రిస్పీగా మారేంత వరకు నెమ్మదిగా వేయించుకోవాలి.