కుక్కర్​లో నిమిషాల్లో చేసుకునే "ఆలూ వంకాయ కర్రీ" - వండుతుంటేనే కమ్మటి వాసనతో నోరూరిపోతుంది!

ఈ స్టైల్​లో 'ఆలూ వంకాయ కర్రీ' చేసుకోండి - ఇంటిల్లిపాదీ లొట్టలేసుకుంటూ తింటారు!

How to Make Aloo Vankaya Curry in Telugu : శుభకార్యాలు, వివాహ విందులో తప్పనిసరిగా కనిపించే కూరల్లో ఒకటి 'ఆలూ వంకాయ'. ఇది చాలా మంది ఫేవరెట్ కర్రీ కూడా. ఈ క్రమంలోనే చాలా మంది దీన్ని ఇళ్లల్లో ప్రిపేర్ చేసుకుంటుంటారు. కానీ, కొన్నిసార్లు సరైన టేస్ట్ రావట్లేదని ఫీల్ అవుతుంటారు. అలాంటి వారు ఒక్కసారి ఈ స్టైల్​లో "ఆలూ వంకాయ కర్రీ" చేసుకొని చూడండి. ఈ టిప్స్ ఫాలో అవుతూ చేసుకున్నారంటే సాఫ్ట్​గా, టేస్టీగా వస్తుంది. ఈవిధంగా ఆలూ కర్రీని చేసి పెట్టారంటే పిల్లలు కూడా చాలా ఇష్టంగా తింటారు. పైగా దీని కోసం ఎక్కువ శ్రమించాల్సిన పనిలేదు. కుక్కర్​లో నిమిషాల్లో చాలా ఈజీగా ప్రిపేర్ చేసుకోవచ్చు. మరి, ఈ రెసిపీకి కావాల్సిన ఇంగ్రీడియంట్స్, తయారీ విధానంపై ఇప్పుడు ఓ లుక్కేద్దాం.

Vankayalu (ETV Bharat)

కావాల్సిన పదార్థాలు :

• పెద్ద సైజ్ బంగాళదుంప - ఒకటి
• వంకాయలు - పావుకిలో
• పచ్చిమిర్చి - ఐదారు
• ఉల్లిపాయ - ఒకటి
• మీడియం సైజ్ టమాటా - ఒకటి
• నూనె - రెండు టేబుల్​స్పూన్లు
• అల్లంవెల్లుల్లి పేస్ట్ - ఒక టీస్పూన్
• కొత్తిమీర తరుగు - కొద్దిగా
• కారం - తగినంత
• ఉప్పు - రుచికి సరిపడా
• గరంమసాలా - అరటీస్పూన్
• కసూరి మేతి - ఒకటీస్పూన్

Aloo Vankaya Curry (ETV Bharat)

తయారీ విధానం :

• ఈ రెసిపీ కోసం ముందుగా పెద్ద సైజ్​లో ఉన్న బంగాళదుంపను పొట్టు తీసుకొని, క్యూబ్స్ మాదిరిగా మీడియం సైజ్ ముక్కలుగా కట్ చేసుకొని ఉప్పు నీళ్లు ఉన్న గిన్నెలో వేసుకొని పక్కన పెట్టుకోవాలి.
• అలాగే, తాజా గుండ్రటి తెల్లని వంకాయలను తీసుకొని శుభ్రంగా కడిగి తొడిమెతో సహా నిలువుగా చిన్న చిన్న ముక్కలుగా కట్ చేసుకోవాలి. ఆపై కట్ చేసుకున్న వంకాయ ముక్కలన్నింటిని ఉప్పు నీళ్లు తీసుకున్న మరో గిన్నెలో వేసుకొని పక్కనుంచాలి.
• అదేవిధంగా, ఉల్లిపాయ, టమాటాను సన్నగా తరుక్కోవాలి. పచ్చిమిర్చిలను చీలికలుగా తరుక్కొని రెడీగా ఉంచుకోవాలి.

Aloo Brinjal Curry Making (ETV Bharat)

• ఇప్పుడు కర్రీ తయారీ కోసం స్టవ్ మీద కుక్కర్ పెట్టుకొని ఆయిల్ వేసుకోవాలి. నూనె లైట్​గా వేడయ్యాక జీలకర్ర వేసి వేయించాలి. ఆపై కట్ చేసి పెట్టుకున్న ఉల్లిపాయ తరుగు వేసుకొని లైట్​గా కలర్ మారేంత వరకు ఫ్రై చేసుకోవాలి.
• ఆనియన్స్ వేగాక పచ్చిమిర్చి చీలికలు, కచ్చాపచ్చాగా దంచుకున్న తాజా అల్లంవెల్లుల్లి ముద్ద వేసుకొని పచ్చివాసన పోయేంత వరకు వేయించాలి.
• ఆపై కరివేపాకు, పసుపు వేసి కాసేపు వేయించాక ముందుగా కట్ చేసి పెట్టుకున్న ఆలూ ముక్కలు, వంకాయ ముక్కలు, టమటా ముక్కలు వేసుకొని హై ఫ్లేమ్​లో రెండు నిమిషాల పాటు కలుపుతూ బాగా ఫ్రై చేయాలి.
• ఆ తర్వాత రుచికి తగినంత ఉప్పు, కారం, గరంమసాలా, కసూరి మేతిని చేతితో నలిపి వేసుకొని లో ఫ్లేమ్​లో మరో ఒకట్రెండు నిమిషాలు కలుపుతూ వేయించుకోవాలి. ఆపై కొత్తిమీర తరుగు వేసుకొని కలపాలి.
• అనంతరం కర్రీ కుక్ అవ్వడానికి రెండుమూడు టీస్పూన్ల వాటర్ వేసుకొని కలిపి, మూతపెట్టి రెండు విజిల్స్ వచ్చేంత వరకు ఉడికించుకోవాలి.
• ఆవిధంగా ఉడికించుకున్నాక కుక్కర్​లోని ప్రెషర్ మొత్తం పోయాక మూత తీసి ఒకసారి కలుపుకోవాలి. ఆపై కొత్తిమీర తరుగు వేసుకొని కలిపి దింపేసుకుంటే చాలు. అంతే, కమ్మటి వాసనతో నోరూరించే "ఆలూ వంకాయ కర్రీ" రెడీ అయిపోతుంది!

How to Make Aloo Vankaya Curry (ETV Bharat)

టిప్స్ :

• ఇక్కడ కర్రీని కుక్కర్​లో చేయడం ద్వారా రెసిపీ సాఫ్ట్​గా, టేస్టీగానూ వస్తుంది. ఒకవేళ మీరు కావాలనుకుంటే మామూలు గిన్నెలో కూడా దీన్ని రెడీ చేసుకోవచ్చు.
• ఆలూ, వంకాయ ముక్కలను ఉడికించే క్రమంలో ఎక్కువ నీరు పోయకుండా రెండుమూడు టీస్పూన్ల నీళ్లు పోసుకొని కుక్ చేసుకుంటే సరిపోతుంది.