రోజూ ఈ చట్నీల గొడవెందుకు? - ఒక్కసారి ఇలా "పెరుగు పులస" చేసి పెట్టుకుంటే సరిపోదూ!

నోరూరించే "పెరుగు పులస పచ్చడి"- వేడివేడి అన్నంతో పాటు ఏ టిఫిన్​లోకైనా టేస్ట్ అద్భుతంగా ఉంటుంది!`

Perugu Pulasa Pachadi in Telugu : సాధారణంగా ఇంట్లో ఇడ్లీ, దోసె, మైసూర్​ బోండా ఇలా ఏ టిఫిన్ చేసినా పల్లీ చట్నీ, టమోటా పచ్చడి తప్పకుండా ఉండాల్సిందే. అయితే, టిఫిన్​ చేసిన ప్రతిసారీ ఇలా చట్నీ ప్రిపేర్​ చేయాలంటే కాస్త ఇబ్బందిగానే ఉంటుంది. అలా కాకుండా ఓసారి ఈ పద్ధతిలో పెరుగు పులస చట్నీ రెడీ చేసుకొని పెట్టుకోండి. ఈ చట్నీ ఒక్కటి ఉంటే చాలు తృప్తిగా టిఫిన్​ చేయచ్చు. మరి ఈజీగా పెరుగు పులస పచ్చడి ఎలా చేయాలో ఇప్పుడు చూద్దాం. పరిశుభ్రత పాటిస్తే వారం రోజులు నిల్వ ఉంటుంది.

Perugu (Getty Images)

పెరుగు పులస పచ్చడి తయారీకి కావాల్సిన పదార్థాలు

• పెరుగు - 300 గ్రాములు
• ఎండుమిర్చి - 25
• ధనియాలు - టేబుల్​స్పూన్
• జీలకర్ర - టీస్పూన్​
• పొట్టు తీసిన వెల్లుల్లి - 10
• ఉప్పు - రుచికి సరిపడా

తాలింపు కోసం

• ఆయిల్ - 2 టేబుల్​స్పూన్లు
• పచ్చిశనగపప్పు - టేబుల్​స్పూన్
• మినప్పప్పు - టేబుల్​స్పూన్
• ఆవాలు - అరటీస్పూన్
• జీలకర్ర - అరటీస్పూన్
• ఎండుమిర్చి - 4
• ఇంగువ - చిటికెడు
• కరివేపాకు - 2
• అల్లం తరుగు - టేబుల్​స్పూన్​

Perugu Pulasa Pachadi (ETV Bharat)

పెరుగు పులస పచ్చడి తయారీ విధానం

• ముందుగా ఎండుమిర్చి తొడిమలు తీసేసి చిన్న ముక్కలుగా చేసుకోవాలి. ఆపై గింజలు తీసేసి ఎండుమిర్చి ముక్కలు ఒక ప్లేట్​లో పక్కన పెట్టుకోవాలి. ఈ పచ్చడి కోసం ఎండుమిర్చి గింజలు ఉండకూడదు.
• ఇప్పుడు ఒక మిక్సింగ్ బౌల్లో పెరుగు తీసుకోండి. ఇందులో టీగ్లాసు వాటర్​ పోసి బీటర్​ సహాయంతో ఉండలు లేకుండా బాగా కలుపుకోవాలి. పెరుగు క్రీమ్​ మాదిరిగా ఉండాలి.
• ఇప్పుడు ఇందులో గింజలు తీసేసిన ఎండుమిర్చి ముక్కలు వేయండి. ఇందులోనే రుచికి సరిపడా ఉప్పు వేసి బాగా కలుపుకోవాలి. ఆపై బౌల్​పై మూత పెట్టి కనీసం గంటపాటు పెరుగులో మిరపకాయలు నానబెట్టుకోవాలి.

Perugu Pulasa Pachadi (ETV Bharat)

• అనంతరం ఒక మిక్సీ గిన్నెలోకి నానబెట్టిన ఎండుమిర్చి పెరుగు మిశ్రమం వేసుకోండి. ఇందులోనే టేబుల్​స్పూన్ ధనియాలు, టీస్పూన్​ జీలకర్ర, పొట్టు తీసిన వెల్లుల్లి వేసి మెత్తగా గ్రైండ్​ చేసుకోవాలి.
• పచ్చడి తాలింపు కోసం స్టవ్​పై కడాయి పెట్టండి. ఇందులో పచ్చిశనగపప్పు, ఆవాలు, జీలకర్ర, మినప్పప్పు వేసి ఫ్రై చేయండి. ఆపై అల్లం తరుగు, ఎండుమిర్చి, ఇంగువ, కరివేపాకు వేసి వేయించండి. ఇప్పుడు ముందుగా గ్రైండ్​ చేసుకున్న ఎండుమిర్చి పచ్చడి వేసి బాగా కలపండి.
• ఇందులో రుచికి సరిపడా ఉప్పు వేసి కలిపి 5 నిమిషాలు ఉడికించి స్టవ్ ఆఫ్ చేయాలి.
• అంతే ఇలా సింపుల్​గా ప్రిపేర్​ చేసుకుంటే నోరూరించే పెరుగు పులస పచ్చడి మీ ముందుంటుంది. ఈ చట్నీ వేడివేడి అన్నంతోపాటు, ఇడ్లీ, దోసె వంటి టిఫిన్స్​లోకి రుచి అద్భుతంగా ఉంటుంది.
• పెరుగు పులస పచ్చడి తయారీ విధానం నచ్చితే మీరు ఓసారి ట్రై చేయండి.