Nimmakaya Nilva Pachadi Making Process : వేసవి కాలం వచ్చిందంటే చాలు మెజార్టీ పీపుల్ నిల్వ పచ్చళ్లు ప్రిపేర్ చేసుకోవడానికి రెడీ అవుతుంటారు. అందులో మామిడి తర్వాత ఎక్కువ మంది నిమ్మకాయ నిల్వ పచ్చడి పెడుతుంటారు. కానీ, చాలా మందికి ఈ పచ్చడిని సరైన పద్ధతిలో పెట్టడం తెలియదు. దాంతో పెట్టిన కొన్ని రోజులకే బూజుపట్టడం, రంగు మారడం జరుగుతుంటుంది. అలాకాకుండా ఓసారి ఈ పక్కా కొలతలతో "నిమ్మకాయ నిల్వ పచ్చడిని" ప్రిపేర్ చేసుకోండి. పర్ఫెక్ట్గా కుదరడమే కాకుండా సంవత్సరం పైనే తాజాగా నిల్వ ఉంటుంది! మరి, ఆ పక్కా కొలతలేంటి? ఎలా ప్రిపేర్ చేసుకోవాలో ఇప్పుడు చూద్దాం.
కావాల్సిన పదార్థాలు :
- నిమ్మకాయలు - 1 కేజీ
- దొడ్డు ఉప్పు - 200 గ్రాములు
- పసుపు - అరటీస్పూన్
- కారం - 200 గ్రాములు
పోపు కోసం :
- నూనె - 100 గ్రాములు
- ఆవాలు - 1 టీస్పూన్
- మినపప్పు - 1 టేబుల్స్పూన్
- జీలకర్ర - 1 టీస్పూన్
- శనగపప్పు - 1 టేబుల్స్పూన్
- ఎండుమిర్చి - 4
పక్కా కొలతలతో "ఉల్లిపాయ నిల్వ పచ్చడి" - ఇలా పెడితే టేస్ట్ అదుర్స్ - ఆరు నెలలు నిల్వ!
తయారీ విధానం :
- ఇందుకోసం ముందుగా తాజా నిమ్మకాయలను తీసుకోవాలి. దెబ్బతిన్నవి అస్సలే తీసుకోవద్దు. వాటిని శుభ్రంగా కడగాలి.
- ఆ తర్వాత తడి లేకుండా ఫ్యాన్ కింద ఒక క్లాత్పై నిమ్మకాయలను ఆరబెట్టుకోవాలి.
- అలాగే, పచ్చడిలోకి తీసుకునే ఉప్పుని గంటసేపు ఎండకు ఉంచాలి. ఇలా ఉంచడం ద్వారా అందులో ఏమైనా చెమ్మ ఉంటే ఆరిపోయి డ్రైగా అవుతుంది.
- ఇప్పుడు కేజీ నిమ్మకాయలకు(25 కాయలు) 200 గ్రాముల చొప్పున ఉప్పు, కారం చక్కగా సరిపోతాయి.
- ఆరబెట్టుకున్న నిమ్మకాయలలో 6 కాయలను పక్కకు తీసుకొని మిగతా వాటిని ముక్కలుగా కట్ చేసుకోవాలి. ఒక్క నిమ్మకాయను 8 భాగాలుగా కట్ చేసుకోవాలి.
- ఇలా అన్నింటినీ కట్ చేసుకొని ఒక బౌల్లో వేసుకొని పక్కనుంచాలి. ఒకవేళ మీకు గింజలు వద్దనుకుంటే తీసేసుకోవచ్చు.
- ఇప్పుడు పక్కకు తీసుకున్న 6 నిమ్మకాయలను కట్ చేసి ఒక చిన్న గిన్నెలో రసాన్ని పిండుకోవాలి.
- అనంతరం మిక్సీ జార్ తీసుకొని అందులో గంటపాటు ఆరబెట్టిన ఉప్పును తీసుకొని మెత్తగా గ్రైండ్ చేసుకొని పక్కనుంచాలి.
- ఆ తర్వాత మీరు ఊరగాయ పెట్టుకోవాలనుకుంటున్న డబ్బా లేదా గాజు సీసా(జాడి) తీసుకొని అందులో ముందుగా కట్ చేసుకున్న నిమ్మకాయ ముక్కలన్నింటినీ వేసుకోవాలి.
- ఆపై అందులో ముందుగా తీసి పెట్టుకున్న నిమ్మరసం పోసుకోవాలి. అలాగే, గ్రైండ్ చేసుకున్న ఉప్పు, పసుపు వేసుకొని అవి ముక్కలకు పట్టేలా బాగా కలుపుకోవాలి.
- అనంతరం మూతపెట్టి మూడు నాలుగు రోజులను నిమ్మ ముక్కలను ఊరనివ్వాలి.
కమ్మటి "గోంగూర పండుమిర్చి నిల్వ పచ్చడి" - ఈ లెక్కన పెడితే నిజంగా అమృతమే - ఏడాది నిల్వ!
- ఆవిధంగా ఊరబెట్టుకున్నాక మూత తీసి ఒకసారి బాగా కలుపుకోవాలి. ఆ తర్వాత అందులో కారం వేసుకొని ముక్కలకు పట్టేలా మరోసారి బాగా మిక్స్ చేసుకొని పక్కనుంచాలి.
- ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక ఆవాలు, మినపప్పు, జీలకర్ర, శనగపప్పు వేసుకొని ఆవాలు చిటపటమనే వరకు వేయించుకోవాలి.
- ఆవాలు వేగాక అందులో ఎండుమిర్చిని ముక్కలుగా తుంపి వేసుకొని కలిపి స్టౌ ఆఫ్ చేసుకోవాలి. ఆ తర్వాత తాలింపుని పూర్తిగా చల్లారనివ్వాలి.
- పోపు పూర్తిగా చల్లారాక దాన్ని ముందుగా ప్రిపేర్ చేసుకున్న పచ్చడిలో వేసి మొత్తం కలిసేలా కలుపుకొని స్టోర్ చేసుకుంటే చాలు. అంతే, నోరూరించే కమ్మని "నిమ్మకాయ నిల్వ పచ్చడి" రెడీ!
- మరి, ఇంకెందుకు ఆలస్యం ఈ సమ్మర్లో మీరూ ఈ కొలతలతో నిమ్మకాయ నిల్వ పచ్చడిని పెట్టుకోండి.
- పర్ఫెక్ట్గా కుదరడమే కాకుండా ఏడాదిపైనే తాజాగా నిల్వ ఉంటుంది!
మునక్కాయలతో చారు, కూరలు రొటీన్ - ఇలా "నిల్వ పచ్చడి" చేసుకోండి! - టేస్ట్ అద్భుతం!
