Pala Munjalu Sweet Recipe In Telugu : గోదావరి జిల్లాల్లో లభించే స్వీట్లలో తీయటి పాల ముంజలు కూడా ఒకటి. పచ్చికొబ్బరి, బెల్లంతో తయారు చేసే పాల ముంజలు నెయ్యి పరిమళంతో రుచి అద్భుతంగా ఉంటాయి. కొన్ని టిప్స్ పాటిస్తూ ఇక్కడ చెప్పిన విధంగా ట్రై చేస్తే చాలా టేస్టీగా వస్తాయి. పిల్లలు పెద్దలందరూ ఈ పాల ముంజలు ఇష్టంగా తింటారు. మరి సులభంగా పాల ముంజలు ఎలా చేయాలో ఇప్పుడు చూద్దాం.
స్టఫింగ్ కోసం కావాల్సిన పదార్థాలు:
- పచ్చికొబ్బరి ముక్కలు - రెండు కప్పులు
- బెల్లం తురుము - 1 కప్పు
- నీళ్లు- అరకప్పు
- యాలకులు పొడి - టీస్పూన్
- నెయ్యి - టీస్పూన్
పాల ముంజల్లోని పై పిండి తయారీ కోసం :
- పాలు - 2 కప్పులు
- చక్కెర - 2 టీస్పూన్లు
- బొంబాయి రవ్వ - అరకప్పు
- బియ్యం పిండి - అరకప్పు
పులిహోర కలపడం రావట్లేదా? - "పులి ఉప్మా" చేయండిలా - సేమ్ టేస్ట్!
పాల ముంజలు తయారీ విధానం :
- ఒక మిక్సీ గిన్నెలోకి రెండు కప్పులు పచ్చికొబ్బరి ముక్కలు తీసుకోండి. వీటిని మెత్తగా గ్రైండ్ చేసుకోండి. ఈ పచ్చి కొబ్బరి తురుముని ఒక గిన్నెలోకి తీసుకోండి.
- ఇప్పుడు స్టవ్ ఆన్ చేసి కడాయి పెట్టి పావు కప్పు నీళ్లు పోయండి. ఇందులో కప్పు బెల్లం తురుము వేసుకుని కరిగించండి. బెల్లం కరిగిన తర్వాత పచ్చి కొబ్బరి తురుముని వేసి కలపండి.
- స్టఫింగ్లోని నీళ్లు ఇగిరిపోయి దగ్గర పడిన తర్వాత ఒక టీస్పూన్ యాలకులు పొడి, టీస్పూన్ నెయ్యి వేసి బాగా కలపండి.
- తర్వాత ఈ పచ్చికొబ్బరి బెల్లం మిశ్రమాన్ని ఒక గిన్నెలోకి తీసుకోండి. తర్వాత చిన్న నిమ్మకాయ సైజ్ బాల్స్ ప్రిపేర్ చేసుకొని ఒక ప్లేట్లోకి తీసుకోవాలి.
- పాల ముంజల్లోని పై పిండి తయారీ కోసం స్టవ్పై కడాయి పెట్టి 2 కప్పుల పాలు, 2 టీస్పూన్లు చక్కెర వేసి వేడి చేయండి.
- పాలు ఒక పొంగు వచ్చిన తర్వాత లో ఫ్లేమ్లో మంట అడ్జస్ట్ చేసి అరకప్పు చొప్పున బొంబాయి రవ్వ, బియ్యం పిండి, చిటికెడు ఉప్పు వేసి ఉండలు కట్టకుండా బాగా కలపాలి.
- పిండి కాస్త దగ్గర పడిన తర్వాత స్టవ్ ఆఫ్ చేసి చల్లారనివ్వాలి.
- పిండి చల్లారిన తర్వాత చేతులకు నెయ్యి అప్లై చేసుకొని పెద్ద సైజ్ నిమ్మకాయ మాదిరిగా ఉండలు చేసుకోవాలి.
- ఇప్పుడు ఒక ఉండను చేతిలోకి చిన్న అప్పాలుగా చేసుకోవాలి. తర్వాత పచ్చికొబ్బరి బెల్లం స్టఫింగ్ పెట్టి నిదానంగా క్లోజ్ చేయాలి. ఇలా పిండితో పాల ముంజలు ప్రిపేర్ చేసుకొని పక్కన పెట్టుకోవాలి.
- అనంతరం స్టవ్పై కడాయి పెట్టి డీప్ ఫ్రైకి సరిపడా ఆయిల్ వేసి వేడి చేయండి. నూనె వేడైన తర్వాత స్టవ్ మీడియం ఫ్లేమ్లో అడ్జస్ట్ చేసి పాల ముంజలు వేసి రెండు నిమిషాలు అలా వదిలేయాలి.
- తర్వాత గరిటెతో నిదానంగా తిప్పుతూ వేయించుకోవాలి.
- పాల ముంజలు దోరగా వేగిన తర్వాత ఒక ప్లేట్లోకి తీసుకోవాలి. ఇలానే మిగిలిన పాల ముంజలను వేయించుకుంటే సరి!
- అంతే ఈ పద్ధతిలో పాల ముంజలు చేసుకుంటే చాలా రుచిగా వస్తాయి. ఇంట్లో వాళ్లందరూ ఇష్టంగా తింటారు. పాల ముంజలు తయారీ విధానం నచ్చితే మీరు ఓసారి ట్రై చేయండి.
"హెల్దీ పూరీలు" మైదా లేకుండా పెసరపప్పుతో ఇలా చేయండి! - టేస్ట్ అద్భుతంగా ఉంటాయి!
కరకరలాడే "రాగి పిండి పకోడీ" - నూనె కూడా పీల్చవు - రుచి అదుర్స్!
