Minapa Gatti Garelu Recipe in Telugu : సాధారణంగా పండుగ వేళల్లో, నాన్ వెజ్ కూరలు వండుకున్న సమయంలో మినప్పప్పు, పచ్చిశనగపప్పు కాసేపు నానబెట్టి గారెలు చేస్తుంటారు. అప్పటికప్పుడు చేసే ఈ గారెలు క్రిస్పీగా ఎంతో రుచిగా ఉంటాయి. అయితే, ఇప్పుడు మనం పొట్టు మినప్పప్పుతో కరకరలాడే "గట్టి గారెలు" ఎలా చేయాలో చూద్దాం. ఇక్కడ చెప్పిన విధంగా గట్టి గారెలు చేస్తే 2 వారాలపాటు తాజాగా ఉంటాయి. ఈవెనింగ్ టీ టైమ్లో ఏదైనా కారంగా తినాలనుకునే వారికి ఈ రెసిపీ బెస్ట్ ఆప్షన్!
కావాల్సిన పదార్థాలు:
- పొట్టుతో ఉండే మినప్పప్పు - 2 కప్పులు
- పచ్చిశనగపప్పు - అరకప్పు
- జీలకర్ర - 2 చెంచాలు
- అల్లం ముక్కలు - 5
- పచ్చిమిర్చి - 5
- ఉప్పు - రుచికి సరిపడా
- నూనె - డీప్ ఫ్రైకి సరిపడా
కరకరలాడే "మిరియాల కారపూస" - ఈ టిప్స్ పాటిస్తే చాలు గుల్లగుల్లగా, రుచిగా వస్తాయి!
తయారీ విధానం:
- గట్టి గారెలు చేయడం కోసం ముందుగా పొట్టుతో ఉండే మినప్పప్పు శుభ్రంగా కడిగి 12 గంటలు నానబెట్టుకోవాలి. అనంతరం వీలైనంత పొట్టు కడిగి తీసుకోండి.
- అలాగే అరకప్పు పచ్చిశనగపప్పు శుభ్రంగా కడిగి 4 గంటల సేపు నానబెట్టుకోవాలి. ఆపై మరోసారి నీటితో శుభ్రంగా కడగాలి.
- తర్వాత మినప్పప్పు, పచ్చిశనగపప్పు నీళ్లు పోయేలా జాలి గిన్నెలోకి తీసుకొని రెండు గంటలపాటు పక్కన పెట్టుకోవాలి.
- ఒక మిక్సీ గిన్నెలో 2 చెంచాలు జీలకర్ర, అల్లం ముక్కలు, పచ్చిమిర్చి, రుచికి సరిపడా ఉప్పు వేసి మెత్తగా గ్రైండ్ చేసుకోవాలి. ఈ పచ్చిమిర్చి పేస్ట్ని చిన్న గిన్నెలోకి తీసుకొని పక్కన పెట్టండి.
- ఇప్పుడు అదే మిక్సీ గిన్నెలో మినప్పప్పు, పచ్చిశనగపప్పు వేసి కాస్త బరకగా మిక్సీ పట్టుకోవాలి. ఈ పప్పు ఎంత బరకగా ఉంటే గట్టి గారెలు అంత క్రిస్పీగా వస్తాయి.
- ఆ విధంగా గ్రైండ్ చేసుకున్న పిండిని ఒక మిక్సింగ్ బౌల్లోకి తీసుకోండి. ఇందులో పచ్చిమిర్చి పేస్ట్ వేసి బాగా కలుపుకోవాలి. ఈ స్టేజ్లోనే రుచికి సరిపడా ఉప్పు చెక్ చేసుకోవాలి.
- అనంతరం ఒక కాటన్ వస్త్రాన్ని నీళ్లతో తడిపి గట్టిగా పిండుకోవాలి. ఇప్పుడు మంచంపై కాటన్ క్లాత్ పరిచి చేతి గాజు తీసుకొని అందులో కొద్దిగా పిండి ముద్దను పెట్టి ఫ్లాట్గా వత్తుకోవాలి. అనంతరం మధ్యలో చిన్న హోల్ చేసుకోవాలి.
- ఇలా పిండితో గట్టి గారెలు తయారు చేసుకోవాలి.
- గారెలు ఫ్రై చేయడం కోసం స్టవ్పై కడాయి పెట్టి సరిపడా ఆయిల్ వేసి వేడి చేయండి.
- ఆయిల్ హీటైన తర్వాత రెడీ చేసుకున్న గారెలు ఆయిల్లో వేసుకోండి.
- స్టవ్ మీడియం ఫ్లేమ్లో అడ్జస్ట్ చేసి గారెలు 50 శాతం వేయించండి. ఆ విధంగా ఫ్రై చేసుకున్న తర్వాత గారెలను ఒక ప్లేట్లోకి తీసుకోండి. ఇలానే మిగిలిన గారెలు ఫ్రై చేసుకొని కాసేపు చల్లారనివ్వండి.
- తర్వాత వేడివేడిగా ఉన్న నూనెలో మరోసారి సగం వేగిన గారెలు వేసుకొని ఎర్రగా మారే వరకు కలుపుతూ వేయించండి.
- గారెలు క్రిస్పీగా వేగిన తర్వాత ప్లేట్లోకి తీసుకోండి.
- గట్టి గారెలు పూర్తిగా చల్లారిన తర్వాత ఎయిర్టైట్ డబ్బాలో స్టోర్ చేసుకుంటే 2 వారాల పాటు నిల్వ ఉంటాయి.
- అంతే ఇలా సులభంగా చేసుకుంటే కరకరలాడే మినప గట్టి గారెలు రెడీ! ఈవెనింగ్ టైమ్ ఏదైనా స్నాక్ తినాలనిపిస్తే ఇవి రెండు తింటే చాలు. గట్టి గారెలు తయారీ విధానం నచ్చితే మీరు ఓసారి ట్రై చేయండి.
"ప్యూర్ వెజ్ ఆమ్లెట్" - రుచి చూస్తే ఎగ్ ఆమ్లెట్ మర్చిపోతారు! అంత బాగుంటుంది!
పల్లీ, పుట్నాలు లేకుండానే ఇడ్లీ, దోసెల్లోకి సూపర్ చట్నీ - వారం రోజులు నిల్వ ఉంటుంది!
