Mamidikaya Rasam Recipe in Telugu : చాలా మంది ఈ సీజన్లో లభించే మామిడితో తురుము పచ్చడి, పులిహోర, మామిడికాయ పప్పు వంటి రెసిపీలు ట్రై చేస్తున్నారు. పచ్చి మామిడితో చేసిన ఏ వంటలైనా పుల్లపుల్లగా నోటికి ఎంతో రుచిగా ఉంటాయి. అయితే, పచ్చి మామిడికాయతో రసం ఎక్కువ మందికి చేయడం రాకపోవచ్చు. అలాంటి వారు ఇక్కడ చెప్పిన విధంగా ఓసారి ప్రయత్నించండి. ఈ మామిడికాయ రసం తినడమే కాకుండా ఓ గ్లాసు తాగేస్తారు! రుచి అంత బాగుంటుంది. మరి సింపుల్గా మామిడికాయ చారు ఎలా చేయాలో ఇప్పుడు చూద్దాం.
కావాల్సిన పదార్థాలు:
- మిరియాలు - 1 టీ స్పూన్
- పచ్చి మామిడికాయ - 1 (మీడియం సైజ్)
- వెల్లుల్లి రెబ్బలు - 5
- అల్లం - చిన్న ముక్క
- పసుపు- పావు టీ స్పూన్
- ఉప్పు - రుచికి సరిపడా
- ఆవాలు - అర టీ స్పూన్
- మినపప్పు - అర టీ స్పూన్
- నూనె - 2 టేబుల్ స్పూన్లు
- పచ్చి శనగపప్పు - అర టీ స్పూన్
- జీలకర్ర - అర టీ స్పూన్
- ఎండు మిర్చి - 2
- కరివేపాకు - 2 రెమ్మలు
- నీళ్లు - 1 లీటర్
- టమోట - 1
- పచ్చిమిర్చి - 4
- బెల్లం తురుము - 1 టీ స్పూన్
- కొత్తిమీర తరుగు - కొద్దిగా
మహారాజులు ధరించిన వజ్రం - వచ్చే నెలలోనే "గోల్కొండ బ్లూ" డైమండ్ వేలం - కళ్లు చెదిరే ధర!
తయారీ విధానం:
- ఇందుకోసం ముందుగా పచ్చిమామిడి పై తొక్కు తీసి శుభ్రంగా కడగండి. ఆపై చిన్న చిన్న ముక్కలుగా కట్ చేసుకుని పక్కన పెట్టుకోవాలి.
- అనంతరం మిక్సీ గిన్నెలోకి మిరియాలు వేసి మెత్తగా గ్రైండ్ చేసుకోవాలి. ఆపై ఇందులోకే అల్లం, పొట్టు తీసిన వెల్లుల్లి రెబ్బలు వేసి కచ్చాపచ్చాగా గ్రైండ్ చేసుకోండి. ఈ మిశ్రమాన్ని ఒక గిన్నెలోకి తీసుకొని పక్కన పెట్టుకోండి.
- ఇప్పుడు మిక్సీ గిన్నెలోకి మామిడి ముక్కలు, పసుపు, రుచికి సరిపడా ఉప్పు, కొద్దిగా వాటర్ పోసుకుని మెత్తగా గ్రైండ్ చేసుకోవాలి.
- అనంతరం స్టవ్ ఆన్ చేసి కడాయి పెట్టి నూనె పోసుకోవాలి. ఆయిల్ హీటెక్కిన తర్వాత ఆవాలు, జీలకర్ర, మినప్పప్పు, పచ్చిశనగపప్పు, ఎండుమిర్చి వేసి దోరగా ఫ్రై చేసుకోవాలి.
- తాలింపు చక్కగా వేగిన తర్వాత కరివేపాకు వేసి ఫ్రై చేసుకోవాలి. ఇప్పుడు గ్రైండ్ చేసుకున్న మిరియాల మిశ్రమం వేసుకుని ఓ రెండు నిమిషాలు మగ్గించుకోవాలి.
- ఇప్పుడు గ్రైండ్ చేసుకున్న పచ్చిమామిడి పేస్ట్ వేసుకుని పచ్చి వాసన పోయేవరకు ఐదు నిమిషాలు లో ఫ్లేమ్లో మగ్గించుకోండి.
- పచ్చివాసన పోయిన తర్వాత లీటర్ వాటర్ పోసి బాగా కలుపుకోండి.
- ఆపై టమోటను చిదిమి వేసుకోవాలి. అలాగే సన్నగా తరిగిన పచ్చిమిర్చి కూడా వేసుకుని బాగా మిక్స్ చేయాలి. ఈ స్టేజ్లోనే మామిడికాయ రసంలో రుచికి సరిపడా ఉప్పు, కారం చెక్ చేసుకోండి.
- నార్మల్గా రసంలో మిరియాలు, పచ్చిమిర్చిలోని ఘూటు సరిపోతుంది. ఒకవేళ మీకు ఘాటు సరిపోలేదనుకుంటే మీరు తినే కారానికి తగినట్లుగా కారం వేసుకొని కలుపుకోండి.
- ఆపై స్టవ్ని మీడియం ఫ్లేమ్లో పెట్టి దాదాపు 15 నిమిషాలు మరిగించుకోవాలి.
- రసం మరిగిన తర్వాత కొద్దిగా బెల్లం తురుము వేసి కలిపి లో ఫ్లేమ్లో మరో 5 నిమిషాలు మరిగించుకోవాలి.
- చివరిగా మామిడికాయ రసంలో కాస్త కొత్తిమీర తరుగు వేసి కలిపి స్టవ్ ఆఫ్ చేయండి. అంతే ఇలా సింపుల్గా ప్రిపేర్ చేసుకుంటే ఎంతో రుచికరమైన మామిడికాయ రసం రెడీ!
- ఈ మామిడికాయ రసం తయారీ విధానం నచ్చితే మీరు ఓసారి ట్రై చేయండి.
చల్ల చల్లని "ఠండాయి" - ఇదొక్కసారి తాగితే ఇంకో డ్రింక్ గుర్తుకు రాదు! అంత బాగుంటుంది!
పాల పొడి, క్రీమ్ లేకుండానే "కూల్ ఐస్క్రీమ్" - ఇలా చేస్తే టేస్ట్ అస్సలు మర్చిపోలేరు!
