How to Make Lemon Punch : "లెమన్ జ్యూస్" - ఎండాకాలంలో చాలా మంది ఫేవరెట్ డ్రింక్. ఏదైనా పని మీద బయటికి వెళ్లినప్పుడు రోడ్ సైడ్ కనిపించే బండి దగ్గర చాలా మంది దీనిని టేస్ట్ చేసే ఉంటారు. తియ్యగా, పుల్లగా, ఉప్పగా ఉండే దీనిని చిన్న పిల్లల నుంచి పెద్దల వరకు ఇష్టంగా తాగుతారు.
ఇంట్లో కూడా నిమ్మకాయలతో చాలా మంది ఈ డ్రింక్ తయారు చేస్తుంటారు. అయితే ఎప్పుడూ తాగినట్లు నిమ్మరసం పిండి, ఉప్పు, పంచదార కలిపి తాగితే ఏం బాగుంటుంది. అందుకే ఈసారి వెరైటీగా దీనిని ట్రై చేయండి. అదే లెమన్ పంచ్. కేవలం 5 నిమిషాల్లో తయారయ్యే ఈ డ్రింక్ను ఒక్కొక్క సిప్ తాగుతుంటే ఫుల్ కిక్ వస్తుంది. మరి లేట్ చేయకుండా ఈ లెమన్ పంచ్ను ఇంట్లో ఎలా చేయాలో ఈ స్టోరీలో చూద్దాం.
కావాల్సిన పదార్థాలు:
- నిమ్మకాయలు - 2
- ఉప్పు - పావు చెంచా
- పచ్చిమిర్చి - 1
- పంచదార - 3 టేబుల్స్పూన్లు
- ఐస్క్యూబ్స్ - తగిన్నని
- చల్లటి నీళ్లు - 300ml
తయారీ విధానం:
- ఈ లెమన్ పంచ్కు అవసరమైన పదార్థాలన్నీ ముందు ప్రిపేర్ చేసుకోవాలి. అందుకోసం నిమ్మకాయలను సగానికి కోసి రసం పిండి పక్కన ఉంచాలి.
- అలాగే పచ్చిమిర్చిని వీలైనంత సన్నగా, రౌండ్గా కట్ చేసి పక్కన ఉంచాలి.
- వెడల్పు మూత కలిగిన బాటిల్లోకి నిమ్మరసం, ఉప్పు, పచ్చిమిర్చి ముక్కలు, పంచదార, 5 ఐస్క్యూబ్స్, చల్లటి నీళ్లు పోసి ఓ రెండు నిమిషాల పాటు ఆపకుండా షేక్ చేయాలి.
- ఓ గాజు గ్లాస్లోకి మరో 3 ఐస్క్యూబ్స్ వేసి మిక్స్ చేసుకున్న లెమన్ మిశ్రమాన్ని పోసుకుని సర్వ్ చేసుకుంటే జిల్ అనిపించే లెమన్ పంచ్ రెడీ. పైన చెప్పిన కొలతలన్నీ ఒక సర్వింగ్కు సరిపోతాయి. ఇద్దరు, ముగ్గురికి చేసుకోవాలనుకుంటే పైన చెప్పిన పదార్థాలను మీకు కావాల్సిన పరిమాణంలో తీసుకోవాలి.
టిప్స్:
- బాటిల్ బదులు లెమన్ పంచ్ చేయడానికి బయట మార్కెట్లో షేకర్ బాటిల్స్ అని సెపరేట్గా దొరుకుతాయి. వాటిని ఉపయోగించవచ్చు.
- మీరు తీసుకునే నిమ్మకాయలు మరీ లేతగా, మరీ పండినవి కాకుండా చూసుకోవాలి. అప్పుడే రుచి బాగుంటుంది.
- ఇందులో ఉపయోగించిన పచ్చిమిర్చిని తింటూ ఈ డ్రింక్ తాగాలి. అప్పుడే దీని టేస్ట్ బాగుంటుంది.
టేస్టీ అండ్ హెల్దీ "క్యారెట్ యాపిల్ జ్యూస్" - ఒక్క గ్లాస్తో ఎండల నుంచి బిగ్ రిలీఫ్!
ఇదొక్కటి వేసి "పుచ్చకాయ జ్యూస్" చేసుకోండి - జ్యూస్ సెంటర్ని మించిన టేస్ట్తో భలేగా ఉంటుంది!
