Katte Pongali Recipe in Telugu : చాలా మంది ఇంట్లో పండగలప్పుడు కట్టె పొంగలి చేస్తుంటారు. గుడిలో ప్రసాదంగా పెట్టే కట్టె పొంగలి అందరికీ ఇష్టమే! ఘుమఘుమలాడే వాసనతో అద్భుతమైన రుచిని కలిగిన కట్టె పొంగలి మరికొంతమంది ఉదయం టిఫిన్లోకి కూడా చేసుకుంటారు. అయితే, కమ్మటి కట్టె పొంగలి ఇంట్లోనే సింపుల్గా కుక్కర్లో ఎలా చేసుకోవాలో ఇప్పుడు చూద్దాం.
కావాల్సిన పదార్థాలు :
- బియ్యం - 1 కప్పు
- పెసరపప్పు - 1 కప్పు
- వాటర్ - 6 కప్పులు
- నెయ్యి - ముప్పావు కప్పు
- బటర్ - పావు కప్పు
- అల్లం తరుగు - 2 టేబుల్స్పూన్లు
- మిరియాలు - 1 టేబుల్స్పూన్
- జీలకర్ర - అర టేబుల్స్పూన్
- పచ్చిమిర్చి - 8
- ఎండుమిర్చి - 4
- జీడిపప్పు పలుకులు - అర కప్పు
- కరివేపాకు - 2
- ఇంగువ - పావు టీస్పూన్
- ఉప్పు - రుచికి సరిపడా
తయారీ విధానం :
- ముందుగా స్టవ్పై పాన్ పెట్టుకొని పెసరపప్పు వేసి లో ఫ్లేమ్లో 8-10 నిమిషాల పాటు దోరగా వేయించుకుని ఓ గిన్నెలోకి తీసుకుని పక్కకు పెట్టుకోవాలి.
- ఆ తర్వాత వేయించిన పెసరపప్పులో బియ్యాన్ని పోసుకుని శుభ్రంగా రెండు మూడుసార్లు కడిగి పక్కన పెట్టుకోవాలి. ఇక్కడ బియ్యాన్ని, పప్పును వాటర్ పోసి నానబెట్టాల్సిన అవసరం లేదు. కేవలం నీళ్లతో కడిగితే సరిపోతుంది.
- ఇప్పుడు స్టవ్ మీద కుక్కర్ పెట్టి బటర్ వేసుకుని కరిగించండి. ఆపై ముందుగా కడిగి పెట్టుకున్న పెసరపప్పు, బియ్యం మిశ్రమాన్ని వేసి మంటను మీడియం ఫ్లేమ్లో ఉంచి 5 నిమిషాల పాటు ఫ్రై చేసుకోవాలి. (ఇలా పెసరపప్పు, బియ్యం వేయించుకోవడం వల్ల కట్టె పొంగలికి కమ్మటి వాసన, మంచి రుచి వస్తుంది.)
- ఆపై ఇందులో 6 కప్పుల వేడివేడి నీళ్లు పోసుకొని కుక్కర్పై మూతపెట్టి మంటను మీడియం ఫ్లేమ్లో 5 విజిల్స్ వచ్చే వరకు ఉడికించుకోవాలి.
- తర్వాత కుక్కర్లోని ప్రెజర్ పోయాక మూత తీసి ఉడికించుకోవాలి.
- ఇప్పుడు తాళింపు కోసం వేరే స్టవ్ మీద గిన్నె పెట్టుకొని నెయ్యి వేసుకోవాలి. వేడివేడి నెయ్యిలో మిరియాలు, అల్లం తరుగు, జీలకర్ర వేసుకొని దోరగా వేయించుకోవాలి.
- అల్లం పచ్చివాసన పోయేంత వరకు వేయించుకున్న తర్వాత సన్నగా తరిగిన పచ్చిమిర్చి, ఎండుమిర్చి, జీడిపప్పు వేసి కాసేపు ఫ్రై చేసుకోవాలి.
- జీడిపప్పులు గోల్డెన్ కలర్ వచ్చే వరకు వేయించుకున్న తర్వాత కరివేపాకు, ఇంగువ వేసి ఒకసారి కలిపి స్టవ్ ఆఫ్ చేసుకోవాలి.
- ఇప్పుడు తాళింపును మరో బర్నర్ మీద ఉడికిస్తున్న పొంగలిలో వేసుకొని బాగా కలుపుకోవాలి.
- అంతే ఇలా సింపుల్గా ప్రిపేర్ చేసుకుంటే ఎంతో రుచికరమైన "కట్టె పొంగలి" రెడీ!
"వడియాలు ఊరికే రావు!" - మిగిలిపోయిన అన్నంతో టేస్టీ, క్రిస్పీగా చేసుకునే సింపుల్ ట్రిక్!
మైదా పూరీలు మనకెందుకు?! - జొన్న పిండితో ఇలా చేస్తే సరికొత్త డిష్ రెడీ!
