కందిపప్పుతో "క్రిస్పీ గారెలు" - ఇలా చేస్తే ఇంట్లో అందరూ ఆశ్చర్యపోతారు!

మినప్పప్పు, శనగపప్పుతో గారెలు అందరూ చేస్తారు - కొత్తగా కందిపప్పుతో ఇలా చేసేయండి!

Kandipappu Garelu in Telugu : చాలా మందికి సాయంత్రం వేళ వేడివేడిగా పకోడీ, గారెలు, మిర్చీ బజ్జీలు తినాలనిపిస్తుంది. కొందరు కరకరలాడే గారెలు ఇష్టంగా తింటారు. సాధారణంగా పెసర్లు, మినప్పప్పు, శనగపప్పుతో గారెలు చేస్తుంటారు. అయితే, మీరు ఎప్పుడైనా కందిపప్పుతో గారెలు చేసుకుని తిన్నారా? ఈ కందిపప్పు గారెలు క్రిస్పీగా చాలా టేస్టీగా ఉంటాయి. పిల్లలు కూడా కందిపప్పు గారెలు ఇష్టంగా తింటారు. మరి ఈ కందిపప్పు గారెలు ఈజీగా ఎలా చేయాలో ఇప్పుడు చూద్దాం.

Kandipappu (Getty Images)

కావాల్సిన పదార్థాలు

• కందిపప్పు - 2 కప్పులు
• ఉల్లిపాయ తరుగు - అరకప్పు
• కరివేపాకు - 2
• కొత్తిమీర తరుగు - కొద్దిగా
• పచ్చిమిర్చి తరుగు - 2 టేబుల్​స్పూన్లు
• ఉప్పు - రుచికి తగినంత
• నూనె - తగినంత

Kandipappu Garelu (ETV Bharat)

తయారీ విధానం :

• ముందుగా కందిపప్పు శుభ్రంగా కడిగి నీటిలో ఒక రెండు గంటలపాటు నానబెట్టుకోవాలి.
• అనంతరం కందిపప్పు నీళ్లు లేకుండా జల్లించి ఒక గిన్నెలోకి తీసుకోవాలి. ఆపై కందిపప్పుని మిక్సీ గిన్నెలో వేసుకుని కాస్త బరకగా గ్రైండ్​ చేసుకోవాలి. ఇలా గ్రైండ్​ చేసుకున్న కందిపప్పు మిశ్రమాన్ని ఒక మిక్సింగ్​ బౌల్లోకి ట్రాన్స్​ఫర్​ చేసుకోండి.
• ఇప్పుడు కందిపప్పు మిశ్రమంలో రుచికి సరిపడా ఉప్పు, టీస్పూన్​ జీలకర్ర, టీస్పూన్ గరం మసాలా, అరకప్పు ఉల్లిపాయ తరుగు, పచ్చిమిర్చి తరుగు, కరివేపాకు, కొత్తిమీర తరుగు, అరటీస్పూన్​ పసుపు, టీస్పూన్ అల్లం వెల్లుల్లి పేస్ట్​ వేసి అన్నీ బాగా కలిసేలా చేతితో బాగా కలుపుకోండి. (గారెలు కారంగా ఉండాలనుకునే వారు టీస్పూన్​ కారం కూడా యాడ్​ చేసుకోవచ్చు.)
• కందిపప్పు గారెలు కోసం పిండి కాస్త గట్టిగానే ఉండాలి. అప్పుడే గారెలు కరకరలాడుతూ ఎంతో రుచిగా ఉంటాయి.
• చివరిగా పిండిలో ఒక స్పూన్ నూనె వేసి మరోసారి అన్ని పదార్థాలను కలుపుకోవాలి.
• పిండి రెడీ అయిన తర్వాత గారెలను డీప్ ఫ్రై చేయడం కోసం స్టవ్​పై కడాయి పెట్టుకుని సరిపడా నూనె పోసి వేడిచేసుకోవాలి.
• ఇప్పుడు చేతులకు నూనె రాసుకొని పిండి కొంచెం కొంచెం తీసుకుని గారెల మాదిరిగా తయారు చేసుకుని వేడివేడి నూనెలో వేసుకోవాలి.
• ఇలా ఐదారు గారెలు వేసుకుని ఒక నిమిషం పాటు వేయించి గరిటెతో రెండో వైపు తిప్పుకొని కాల్చుకోవాలి.
• చక్కగా ఎర్రగా కాలిన కందిపప్పు గారెలను ఒక ప్లేట్​లోకి తీసుకోండి. అంతే మిగిలిన పిండితో సింపుల్​గా ఇలా క్రిస్పీగా గారెలు చేసుకోండి.
• ఈ కందిపప్పు గారెలు ఈవెనింగ్​ టైమ్​లో బెస్ట్​ స్నాక్​! పిల్లలు, పెద్దలందరూ ఈ కందిపప్పు గారెలు ఇష్టంగా తింటారు. ఈ గారెల తయారీ విధానం నచ్చితే మీరు ఓసారి ట్రై చేయండి.