చేదు లేకుండా, చక్కెర వేయకుండా "కాకరకాయ ఉల్లికారం" - ఈ రుచి అస్సలు మర్చిపోలేరు!

చేదు లేకుండా "కాకరకాయ ఉల్లికారం" - వేడివేడి అన్నంతో అద్దిరిపోతుంది

Kakarakaya Ulli Karam Recipe : కాకరకాయ అనగానే మనలో ఎక్కువ మంది చేదు అంటూ ముఖం తిప్పేసుకుంటారు. ఇంట్లో కాకరకాయ కర్రీ, పులుసు చేశారంటే ఆ రోజు దాన్ని ముట్టకోకుండా ఉపవాసం చేసేవారు కొందరు ఉంటారు. అయితే, ఇక్కడ చెప్పిన విధంగా కాకరకాయ ఉల్లికారం చేస్తే కూర చేదు లేకుండా ఎంతో కమ్మగా ఉంటుంది. వేడివేడి అన్నంతో కాకరకాయ ఉల్లికారం అద్దిరిపోతుంది.

Kakarakaya (ETV Bharat)

కావాల్సిన పదార్థాలు:

• కాకరకాయలు - అరకిలో
• ఉల్లిపాయలు - 4
• శనగపప్పు - టేబుల్​స్పూన్​
• మినప్పప్పు - టేబుల్​స్పూన్​
• ధనియాలు - టేబుల్​స్పూన్​
• జీలకర్ర - టేబుల్​స్పూన్​
• వెల్లుల్లి రెబ్బలు - 10
• ఉసిరి కాయంత చింతపండు
• కారం - రుచికి సరిపడా
• ఉప్పు - రుచికి సరిపడా
• నూనె - సరిపడా
• పసుపు - అరటీస్పూన్​

Kakarakaya (ETV Bharat)

తయారీ విధానం:

• ముందుగా కాకరకాయలను శుభ్రంగా కడిగి మీడియం సైజ్​లో రౌండ్​గా ముక్కలు కట్​ చేసుకోవాలి. ఆపై కాకరకాయలోని గుజ్జు తీసి పక్కన పెట్టుకోవాలి.
• ఇప్పుడు స్టవ్​ ఆన్ చేసి ఓ కడాయి​లో 2 టీ స్పూన్ల ఆయిల్​ పోసి వేడి చేసుకోవాలి. వేడివేడి నూనెలో ఉల్లిపాయలు వేసి కాస్త రంగు మారే వరకు వేపండి. ఆపై కాకరకాయ గుజ్జు, చింతపండు వేసి ఫ్రై చేయండి.
• తర్వాత జీలకర్ర, వెల్లుల్లి, ధనియాలు, పసుపు, రుచికి సరిపడా ఉప్పు, కారం వేసి ఫ్రై చేయండి.
• ఈ మిశ్రమాన్ని వేగిన తర్వాత ఒక ప్లేట్లోకి తీసుకోండి.
• అదే కడాయి​లో కాస్త ఆయిల్​ వేసి పచ్చిశనగపప్పు, మినప్పప్పు వేసి ఎర్రగా వేపుకోండి. ఈ పప్పులను వేపి పక్కన ఉంచుకున్న ఉల్లిపాయల మిశ్రమంలో వేసి బాగా కలుపుకోండి.
• ఈ మిశ్రమం చల్లారిన తర్వాత మిక్సీలో వేసి మెత్తగా గ్రైండ్​ చేసుకోండి.
• ఇప్పుడు అదే కడాయిలో 3 టేబుల్​స్పూన్ల నూనె వేసి వేడి చేయండి. ఆపై ముందుగా రౌండ్​గా కట్ చేసుకున్న కాకరకాయ ముక్కలు వేసి కలుపుతూ వేపుకోండి.
• కాకరకాయ ముక్కలు చక్కగా వేగిన తర్వాత వాటిని ఒక ప్లేట్లోకి తీసుకుని చల్లారనివ్వండి.
• ఆపై వేపుకున్న కాకరకాయలలో గ్రైండ్​ చేసుకున్న ఉల్లిపాయ మిశ్రమం స్టఫ్​ చేసుకోవాలి.
• ఇలా అన్ని కాకరకాయల్లో ఉల్లికారం స్టఫ్ చేసుకోవాలి.
• ఇప్పుడు ముందుగా కాకరకాయలు​ వేపుకున్న కడాయి పెట్టండి. ఇందులో నూనె ఉంటే అందులోనే స్టఫ్​ చేసుకున్న కాకరకాయలు వేసి 5 నిమిషాల పాటు వేపుకోండి.
• అనంతరం కాకరకాయల్లో స్టఫ్​ చేయగా మిగిలిపోయిన ఉల్లికారాన్ని కూరలో వేసుకుని ఫ్రై చేసుకోండి.
• కాకరకాయ ఉల్లికారం గోల్డెన్ బ్రౌన్ కలర్లో వేగిన తర్వాత స్టవ్​ ఆఫ్​ చేసుకోండి.
• అంతే ఇలా చేసుకుంటే టేస్టీ కాకరకాయ ఉల్లికారం రెడీ!

ఈ కాకరకాయ ఉల్లికారం బయట ఉంటే 2 రోజులు నిల్వ ఉంటుంది. మీరు ఫ్రిడ్జ్​లో స్టోర్​ చేసుకుంటే మరో 4 లేదా 5 రోజులు తినచ్చు. కాకరకాయ ఉల్లికారం తయారీ నచ్చితే మీరు ఓసారి ట్రై చేయండి.