"ఇన్​స్టెంట్ వెజ్ పొంగనాలు" - పిండి నానబెట్టే పనిలేకుండా అప్పటికప్పుడు చేసుకోవచ్చు!

పిండి అవసరమే లేదు - అప్పటికప్పుడు నోరూరించే పొంగనాలు రెడీ

Rava Ponganalu Recipe : గుంత పొంగనాలు అంటే ఇడ్లీ, రవ్వ, మినప్పప్పు వేసుకుని రాత్రంతా నానబట్టి చేస్తుంటారు. కానీ, ఇలా కొత్తగా కూరగాయ ముక్కలతో ట్రై చేసి చూడండి ఎంతో రుచిగా ఉంటాయి. ఆరోగ్య పరంగా కూడా ఈ రెసిపీ ఎంతో మేలు చేస్తుంది. పిండి అవసరం లేకుండా, రాత్రంతా నానబెట్టాల్సిన పనిలేకుండా మీకు ఎంతో సమయం ఆదా అవుతుంది.

wheat_Rava (Gettyimages)

కావాల్సిన పదార్థాలు :

• గోధుమ రవ్వ - కప్పు
• మజ్జిగ - 1 కప్పు
• నూనె - 1 టేబుల్ స్పూన్
• అర టీ స్పూన్ - ఆవాలు
• అర టీ స్పూన్ - జీలకర్ర
• కొద్దిగా - పసుపు
• టేబుల్ స్పూన్ - మినప్పప్పు
• అల్లం - 1 టేబుల్ స్పూన్
• ఉల్లిపాయ - పెద్దది
• పచ్చిమిర్చి - 2
• కరివేపాకు 1 రెమ్మ
• 2 టేబుల్ స్పూన్లు - బీన్స్
• 2 టేబుల్ స్పూన్లు - క్యారెట్ తురుము
• కొద్దిగా - ఇంగువ
• 1 టేబుల్ స్పూన్ - సేమియా

rava_ponganalu_recipe_in_telugu (ETV Bharat)

తయారీ విధానం :

• ముందుగా గోధుమ రవ్వ, మజ్జిగ రెండింటిని బాగా కలుపుకుని 20 నిమిషాలు పక్కన పెట్టుకోవాలి. గోధుమ రవ్వ మజ్జిగను పీల్చుకుని మృదువుగా మారుతుంది.
• ఈ లోగా కడాయిలో నూనె వేడి చేసుకుని అందులో ఆవాలు, జీలకర్ర, కొద్దిగా పసుపు, మినప్పప్పు వేసుకుని వేయించాలి.
• ఆ తర్వాత అల్లం, ఉల్లిపాయ, పచ్చిమిర్చి, కరివేపాకు, బీన్స్, క్యారెట్ తురుము వేసుకుని సన్నటి మంటపై ఫ్రై చేసుకోవాలి. ఈ సమయంలో కొద్దిగా ఇంగువ వేసుకుని బాగా ఫ్రై చేసుకుని దించుకుంటే సరిపోతుంది. కూరగాయ ముక్కలు పూర్తిగా ఉడికించాల్సిన పని లేదు. సగానికి పైగా ఉడికితే చాలు
• ఇపుడు ఒక బౌల్ తీసుకుని మజ్జిగ బాగా పీల్చుకున్న రవ్వ వేసుకుని కొన్ని నీళ్లు పోసుకుని కలుపుకోవాలి. ఫ్రై చేసి పెట్టుకున్న కూరగాయ ముక్కలు, రుచికి సరిపడా ఉప్పు వేసుకుని మిక్స్ చేసుకోవాలి. అందులోనే 1 టేబుల్ స్పూన్ సేమియా వేసుకుని మిక్స్ చేసుకుంటే టేస్ట్ చాలా బాగుంటుంది. అన్నీ కలిపిన తర్వాత మరో 5 నిమిషాలు పక్కన పెట్టుకుంటే మొత్తం పీల్చుకుంటుంది. ఇప్పుడు కొన్ని నీళ్లు పోసుకుని పొంగనాల మిశ్రమాన్ని కలుపుకోవాలి.
• ఇప్పుడు పొంగనాల పెనం పెట్టుకుని నూనె వేసుకుని వేడి చేసుకోవాలి. ఇందులో కూరగాయలు కలుపుకున్న పిండిని వేసుకుని ఫ్రై చేసుకోవాలి. ఒక వైపు కాలిన తర్వాత రెండో వైపు కాల్చుకోవాలి. చాలా ఈజీగా చాలా టేస్టీగా ఉండే ఈ గుంత పొంగనాలు మీకు నచ్చిన చట్నీతో ట్రై చేసి చూడండి.