గుంటూర్ స్పెషల్​ "గుత్తి వంకాయ కారం" - నెయ్యి వేసుకుని తింటే మైమరచిపోయే రుచి!

గుంటూర్ వారి గుత్తి వంకాయ కారం - మీరు ఓసారి ట్రై చేయండిలా!

Guntur Special Gutti Vankaya Karam in Telugu : చాలా మందికి గుత్తి వంకాయ కర్రీ అంటే ఎంతో ఇష్టం. ఈ క్రరీ తయారీ విధానం ప్రాంతాన్ని బట్టి మారుతూ ఉంటుంది. అయితే, ఇప్పుడు మనం గుంటూర్​ స్పెషల్​ గుత్తి వంకాయ కారం ఎలా చేయాలో చూద్దాం. ఈ వంకాయ కారం వేడివేడి అన్నంతో టేస్ట్​ అద్భుతంగా ఉంటుంది. ఈ రెసిపీకి ఇందులో వాడే పదార్థాలే మరింత రుచిని పెంచుతాయి. మరి ఈ వంకాయ గుత్తి వంకాయ కారం ఎలా చేయాలో ఈ స్టోరీలో తెలుసుకుందాం.

Vankaya (ETV Bharat)

కావాల్సిన పదార్థాలు :

• వంకాయలు -8
• ఎండు కొబ్బరి ముక్కలు - అరకప్పు
• మెంతులు - చిటికెడు
• వెల్లుల్లి - 15
• ధనియాలు - 1 టేబుల్ స్పూన్
• బెల్లం తురుము - 2 టేబుల్ స్పూన్లు
• అర టీస్పూన్ జీలకర్ర
• అర టీస్పూన్ ఆవాలు
• చిటికెడు ఇంగువ
• నూనె - 4 టేబుల్ స్పూన్లు
• 2 రెమ్మలు కరివేపాకు
• ఉప్పు, కారం - రుచికి సరిపడా

chilli powder (ETV Bharat)

తయారీ విధానం:

• ఈ కూర కోసం ముందుగా తాజా వంకాయలు బాగా శుభ్రం చేసుకోవాలి. ఆపై వంకాయలను చాకుతో నాలుగు ముక్కలుగా మధ్యలోకి చీల్చుకొని పక్కన ఉంచుకోవాలి.

curry_leaves (ETV Bharat)

• ఆ తర్వాత స్టవ్​పై పాన్ పెట్టుకోండి. ఇందులో అరకప్పు ఎండు కొబ్బరి ముక్కలు, వెల్లుల్లి, టేబుల్ స్పూన్ ధనియాలు, చిటికెడు మెంతులు, కరివేపాకు వేసి ఫ్రై చేయండి.
• ఎండుకొబ్బరి ముక్కలు కాస్త రంగు మారిన తర్వాత ఒక ప్లేట్లోకి తీసుకొని చల్లారనివ్వండి.
• తర్వాత ఒక మిక్సీ గిన్నెలోకి వేయించిన ఎండుకొబ్బరి ముక్కల మిశ్రమం, 2 టేబుల్ స్పూన్లు బెల్లం తురుము, రుచికి సరిపడా ఉప్పు, కారం వేసి మెత్తగా పొడి చేసుకోండి. ఈ కొబ్బరి పొడిని చిన్న గిన్నెలోకి తీసుకోండి.
• ఇప్పుడు కట్​ చేసిన వంకాయ ముక్కల్లో కొబ్బరి పొడి మిశ్రమాన్ని స్టఫ్​ చేసుకోండి. ఇలా స్టఫ్​ చేసుకున్న వంకాయలను పక్కన పెట్టుకోండి.
• ఇప్పుడు స్టవ్ ఆన్​ చేసి కడాయి పెట్టండి. 4 టేబుల్ స్పూన్లు నూనె వేసి వేడి చేయండి. ఆపై అర టీస్పూన్ చొప్పున జీలకర్ర, ఆవాలు, చిటికెడు ఇంగువ, కరివేపాకు వేసి ఫ్రై చేయండి.
• తర్వాత స్టఫ్​ చేసుకున్న వంకాయలు వేసి గిన్నెపై మూత పెట్టి మీడియం ఫ్లేమ్​లో మగ్గించుకోవాలి.
• వంకాయలు పూర్తిగా మగ్గడానికి కాస్త టైమ్​ పడుతుంది. నిదానంగా మధ్యమధ్యలో కలుపుతూ వంకాయలు మెత్తబడే వరకు మగ్గించుకోవాలి.
• వంకాయలు మెత్తగా ఉడికిన తర్వాత మిగిలిపోయిన కొబ్బరి కారం మిశ్రమం వేసి ఒక నిమిషంపాటు ఫ్రై చేసి స్టవ్​ ఆఫ్​ చేయండి.
• అంతే ఇలా సింపుల్​గా ప్రిపేర్​ చేసుకుంటే నోరూరించే గుంటూర్ స్పెషల్​ గుత్తి వంకాయ కారం రెడీ!

వేడివేడి అన్నంలో కొద్దిగా నెయ్యి వేసుకుని ఈ గుత్తి వంకాయ కారంతో తింటే రుచి అమృతంలా ఉంటుంది. ఈ గుత్తి వంకాయ కారం తయారీ విధానం నచ్చితే మీరు ట్రై చేయండి.