ఫంక్షన్లలో చేసే "దోసకాయ పచ్చడి" రుచి ఇదే! - ఈ పద్ధతిలో చేస్తే అన్నం మొత్తం తినేస్తారు!

Fuctions Style Dosakaya Pachadi in Telugu : పెళ్లిళ్లు, ఫంక్షన్లలో వడ్డించే దోసకాయ పచ్చడి ఎంతో రుచికరంగా ఉంటుంది. చాలా మంది ఈ చట్నీ అడిగి మరీ వడ్డించుకుని తృప్తిగా భోజనం చేస్తారు. అయితే, చాలా మందికి ఈ దోసకాయ పచ్చడి ఎలా చేస్తారో తెలియదు!అలాంటివారు ఒక్కసారి ఇక్కడ చెప్పిన విధంగా దోసకాయ చట్నీ ట్రై చేయండి. టేస్ట్​ సూపర్​గా ఉంటుంది. ఈ దోసకాయ చట్నీ వేడివేడి అన్నంతో అద్దిరిపోతుంది. మరి ఈజీ​గా ఫంక్షన్స్​ స్టైల్​ దోసకాయ పచ్చడి ఎలా చేయాలో ఇప్పుడు చూద్దాం.

దోసకాయ (Getty Images)

కావాల్సిన పదార్థాలు

• దోసకాయ - 1
• పచ్చిమిర్చి - 12
• లేత పొడవు వంకాయలు - 4
• టమోటాలు- 4
• వెల్లుల్లి - 5
• చిన్న నిమ్మకాయ సైజ్​ చింతపండు
• కరివేపాకు - 2
• ఉల్లిపాయ - 1

తాలింపు కోసం

• ఆయిల్ - 2 టేబుల్​స్పూన్లు
• పచ్చిశనగపప్పు - టేబుల్​స్పూన్
• మినప్పప్పు - టేబుల్​స్పూన్
• ఆవాలు - అరటీస్పూన్
• జీలకర్ర - అరటీస్పూన్
• కరివేపాకు - 2
• ఎండుమిర్చి - 4

టమోటాలు (Getty Images)

క్రీం, మిల్క్ పౌడర్ లేకుండానే "మ్యాంగో ఐస్" - ఇంట్లోనే అప్పటికప్పుడు చేసుకోవచ్చు!

తయారీ విధానం

• ముందుగా దోసకాయను చెక్కు తీసి చిన్న ముక్కలుగా కట్ చేసుకోవాలి.
• అలాగే పచ్చిమిర్చి, టమోటా, ఉల్లిపాయ ముక్కలుగా తరుక్కొని పక్కన పెట్టుకోవాలి.
• అలాగే చిన్న నిమ్మకాయ సైజు చింతపండు నీటిలో 10 నిమిషాలు నానబెట్టుకోవాలి.
• ముందుగా స్టవ్​పై పాన్​ పెట్టి 2 టేబుల్​స్పూన్లు ఆయిల్​ వేసి హీట్​ చేయండి.
• నూనె వేడయ్యాక పచ్చిమిర్చి వేసి ఫ్రై చేయండి.
• పచ్చిమిర్చి చక్కగా ఫ్రై అయ్యాక ప్లేట్లోకి తీసుకోండి. ఆపై లేత పొడవు వంకాయ ముక్కలు, కొద్దిగా ఉప్పు, పసుపు వేసి వేయించండి.
• వంకాయ ముక్కలు కాస్త మగ్గిన తర్వాత ప్లేట్లోకి తీసుకోండి.
• ఇప్పుడు అదే కడాయిలోకి టమోటా ముక్కలు వేసి కాసేపు మగ్గించండి.
• టమోటాలు మగ్గిన తర్వాత స్టవ్ ఆఫ్ చేసుకోవాలి.

దోసకాయ పచ్చడి (ETV Bharat)

• ఇప్పుడు ఒక మిక్సీ గిన్నెలోకి వేయించిన పచ్చిమిర్చి వేసుకోండి. ఇందులో వెల్లుల్లి, నానబెట్టిన చింతపండు, కరివేపాకు, రుచికి సరిపాడా ఉప్పు వేసి గ్రైండ్​ చేసుకోవాలి.
• అనంతరం ఇందులో వేయించుకున్న వంకాయ ముక్కలు, టమోటాలు వేసి కచ్చాపచ్చాగా గ్రైండ్​ చేసుకోండి.
• ఇందులో కట్​ చేసుకున్న ఉల్లిపాయ ముక్కలు వేసి ఓసారి గ్రైండ్ చేసుకోవాలి.
• ఆపై ఈ పచ్చడిని ఒక గిన్నెలోకి తీసుకోండి. ఇందులోకి కట్​ చేసుకున్న దోసకాయ ముక్కలు వేసి బాగా కలపండి.
• ఇప్పుడు పచ్చడి తాలింపు కోసం స్టవ్​పై కడాయి పెట్టి ఆయిల్​ వేసి వేడి చేయండి.
• వేడివేడి నూనెలో ఆవాలు, జీలకర్ర, మినప్పప్పు, శనగపప్పు వేసి ఫ్రై చేయండి.
• ఆపై కరివేపాకు, ఎండుమిర్చి వేసి దోరగా వేయించండి. చివరిగా తాలింపులో దోసకాయ పచ్చడి వేసి కలుపుకోండి.
• అంతే ఇలా సింపుల్​గా ప్రిపేర్​ చేసుకుంటే టేస్టీ దోసకాయ పచ్చడి మీ ముందుంటుంది.
• ఈ టేస్టీ దోసకాయ పచ్చడి తయారీ విధానం నచ్చితే మీరు ఓసారి ట్రై చేయండి.

ఘుమఘుమలాడే "చందమామ చేపల పులుసు" - ఈ పద్ధతిలో చేస్తే నీచు వాసన ఉండదు!

కమ్మని "మాగాయ పచ్చడి" - ఇలా పెట్టుకుంటే ఏడాదంతా తిన్నా బోర్ కొట్టదు!