నోరూరించే "చింత చిగురు ఎండు నెత్తళ్ల కర్రీ" - ఇలా చేస్తే ముద్దకూడా మిగల్చరు!

ఎండు చేపలు, చింత చిగురుతో అద్దిరిపోయే కర్రీ - వేడివేడి అన్నంతో రెండు ముద్దలు ఎక్కువే తింటారు!

Dry Fish Chinta Chuguru Curry in Telugu : చాలా మంది చిన్న ఎండు చేపలతో టమోటా కర్రీ, పులుసు ఎక్కువగా చేస్తుంటారు. కారం, మసాలాలు సరిగ్గా వేస్తే ఈ రెసిపీలు ఎంతో రుచిగా ఉంటాయి. అయితే, మీరు ఎప్పుడైనా ఎండు నెత్తళ్లతో చింత చిగురు కర్రీ ట్రై చేశారా? ఎండు చేపలు చింత చిగురుతో చేసిన ఈ కూర వేడివేడి అన్నంలోకి పుల్లపుల్లగా రుచి అద్భుతంగా ఉంటుంది. ఈ రెసిపీ పిల్లలు కూడా ఇష్టంగా తింటారు. మరి ఈజీగా ఎండు నెత్తళ్లు చింత చిగురు ఎలా చేయాలో ఇప్పుడు చూద్దాం.

Dry Fish (Getty Images)

ఎండు చేపలు చింత చిగురు కూర తయారీకి కావాల్సిన పదార్థాలు

• ఎండు చేపలు - 100 గ్రాములు
• ఉల్లిపాయలు - 3
• పచ్చిమిర్చి - 4
• కొత్తిమీర తరుగు - కొద్దిగా
• పసుపు - అరటీస్పూన్​
• గరం మసాలా - అరటీస్పూన్​
• జీలకర్ర పొడి - అరటీస్పూన్​
• ధనియాల పొడి - టీస్పూన్​
• కారం, ఉప్పు -రుచికి సరిపడా
• చింత చిగురు - కప్పు
• నూనె - 2 టేబుల్​స్పూన్లు
• జీలకర్ర - అరటీస్పూన్​
• ఆవాలు - అరటీస్పూన్​
• అల్లం వెల్లుల్లి పేస్ట్​ - టీస్పూన్​

Chinta Chuguru (Getty Images)

తయారీ విధానం

• ముందుగా ఎండు నెత్తళ్ల తల భాగం చించేసి తీసి ఒక గిన్నెలోకి తీసుకోండి. ఇప్పుడు ఇందులో వేడివేడి నీళ్లు పోసి 5 నిమిషాలు నానబెట్టుకోవాలి. ఆపై రెండు మూడు సార్లు శుభ్రంగా కడగాలి.
• ఇలా ఎండు చేపలను వేడి నీటిలో నానబెట్టి శుభ్రం చేయడం వల్ల ఇసుక, దుమ్ము వంటివి తొలగిపోతాయి. అలాగే కర్రీ స్మెల్ రాకుండా ఉంటుంది.
• అలాగే కూరలోకి కావాల్సిన ఉల్లిపాయ, పచ్చిమిర్చి శుభ్రంగా కడిగి చిన్న ముక్కలుగా కట్​ చేసుకోవాలి.
• అనంతరం స్టవ్​ ఆన్​ చేసి కడాయి పెట్టి 2 టేబుల్​స్పూన్లు ఆయిల్​ వేసి వేడి చేయండి. నూనె​ హీటయ్యాక ఆవాలు, జీలకర్ర వేసి వేపండి. తర్వాత ఉల్లిపాయ, పచ్చిమిర్చి ముక్కలు వేసి ఫ్రై చేయండి.
• ఆనియన్స్​ గోల్డెన్​ కలర్లోకి వేగిన తర్వాత టీస్పూన్​ అల్లం వెల్లుల్లి పేస్ట్​ వేసి కొద్దిసేపు ఫ్రై చేయండి.
• అనంతరం నీటిలో శుభ్రంగా కడిగిన ఎండు నెత్తళ్లు వేసి బాగా కలపండి. ఓ రెండు నిమిషాల తర్వాత పసుపు, గరం మసాలా, ధనియాల పొడి, జీలకర్ర పొడి, రుచికి సరిపడా కారం, ఉప్పు వేసి అన్నీ కలిసేలా బాగా కలపండి.

Dry Fish Chinta Chuguru Curry (ETV Bharat)

• ఇప్పుడు టీ గ్లాసు నీళ్లు పోసి మూతపెట్టి 10 నిమిషాలు ఉడికించుకోండి.
• తర్వాత చింత చిగురు చేతితో నలిపి కూరలో వేసి బాగా కలపండి. ఈ కర్రీలోకి చింత చిగురు చివరిగానే వేసుకోవాలి. అప్పుడే కూర రుచిగా ఉంటుంది.
• చివరిగా కొద్దిగా కొత్తిమీర తరుగు చల్లి స్టవ్ ఆఫ్ చేయండి.
• అంతే ఇలా సింపుల్​గా ప్రిపేర్​ చేసుకుంటే నోరూరించే ఎండు చేపలు చింతు చిగురు కర్రీ రెడీ.

వేడివేడి అన్నంతో ఈ ఎండు నెత్తళ్లు చింత చిగురు టేస్ట్​ అద్దిరిపోతుంది. ఈ ఎండు చేపలు చింత చిగురు కూర తయారీ విధానం నచ్చితే మీరు ఓసారి ట్రై చేయండి.