Meal Maker Masala Vada Making Process : పిల్లలు సాయంకాలం కాగానే తినడానికి ఏమైనా స్నాక్స్ అడుగుతుంటారు. ఇలాంటి టైమ్లో రెగ్యులర్గా చేసేవి కాకుండా ఈసారి కొత్తగా ట్రై చేయాలనుకుంటున్నారా? అయితే, మీకోసమే ఒక అద్భుతమైన స్నాక్ రెసిపీ వెయిట్ చేస్తోంది. అదే, "మీల్ మేకర్ మసాలా వడలు". వీటినే కొన్ని ప్రాంతాల్లో 'మసాలా గారెలు' అని కూడా పిలుస్తుంటారు. ప్రొటీన్స్తో పాటు మరెన్నో పోషకాలు పుష్కలంగా ఉండే మీల్ మేకర్స్ తినని పిల్లలకు కమ్మగా, కరకరలాడే ఈ వడలు చేసి పెట్టారంటే ఎంతో ఇష్టంగా తింటారు. పైన క్రంచీగా, లోపల సాఫ్ట్గా ఉండే ఈ వడలను ఎన్ని తిన్నా ఇంకా ఇంకా తినాలనిపిస్తుంది. వీటిని ఈవెనింగ్ స్నాక్గానే కాదు మార్నింగ్ బ్రేక్ఫాస్ట్లోకి క్విక్ అండ్ ఈజీగా ప్రిపేర్ చేసుకొని ఆస్వాదించవచ్చు. మరి, ఈ క్రిస్పీ అండ్ టేస్టీ వడలను ఎలా చేసుకోవాలి? కావాల్సిన పదార్థాలేంటో ఇప్పుడు చూద్దాం.
తీసుకోవాల్సిన పదార్థాలు :
- పచ్చిశనగపప్పు - ఒక కప్పు
- చిన్న సైజ్ మీల్ మేకర్స్ - 100 గ్రాములు
- అల్లం - అంగుళం ముక్క
- ఎండుమిర్చి - నాలుగు
- వెల్లుల్లి రెబ్బలు - ఐదు
- మిరియాలు - అరటీస్పూన్
- జీలకర్ర - అరటీస్పూన్
- ఉప్పు - రుచికి తగినంత
- సన్నని కొత్తిమీర తరుగు - కొద్దిగా
- కరివేపాకు - ఒక రెమ్మ
- పసుపు - పావుటీస్పూన్
- ఉల్లిపాయ - ఒకటి
- గరంమసాలా - అరటీస్పూన్
- బియ్యప్పిండి - 3 టేబుల్స్పూన్లు
- నూనె - వేయించడానికి తగినంత
ఇడ్లీ పిండిలో ఇదొక్కటి వేసి "పునుగులు" చేయండి - కమ్మగా, కరకరలాడుతూ భలే రుచిగా వస్తాయి!
తయారీ విధానం :
- ఈ సింపుల్ అండ్ టేస్టీ స్నాక్ రెసిపీ కోసం ముందుగా ఒక గిన్నెలో పచ్చిశనగపప్పుని తీసుకొని శుభ్రంగా కడిగి ఆపై తగినన్ని నీళ్లు పోసుకొని రెండు నుంచి మూడు గంటల పాటు నానబెట్టుకోవాలి.
- ఆలోపు మిగతా ప్రాసెస్ కంప్లీట్ చేసుకోవాలి. ఒక గిన్నెలో చిన్న సైజ్ మీల్ మేకర్స్ తీసుకొని అందులో తగినన్ని వేడి నీళ్లు పోసి ఒకసారి కలిపి ఐదు నిమిషాల పాటు పక్కనుంచాలి.
- ఐదు నిమిషాల అనంతరం నానిన మీల్ మేకర్స్లోని వేడి నీటిని మరో బౌల్లోకి వంపేసుకొని చల్లని నీటిని పోసుకోవాలి. ఆపై మీల్ మేకర్స్ని ఏమాత్రం వాటర్ లేకుండా గట్టిగా పిండేసుకొని ఇంకో బౌల్లో వేసుకొని పక్కన పెట్టుకోవాలి.
- అలాగే, రెసిపీలోకి కావాల్సిన ఉల్లిపాయ, కొత్తిమీర, కరివేపాకును సన్నగా తరుక్కొని రెడీగా ఉంచుకోవాలి.
- ఇప్పుడు మిక్సీ జార్ తీసుకొని అందులో అల్లం ముక్కలు, ఎండుమిర్చి, పొట్టు తీసిన వెల్లుల్లి రెబ్బలు, మిరియాలు, జీలకర్ర వేసుకొని గ్రైండ్ చేసుకోవాలి.
- అనంతరం మిక్సీ పట్టుకున్న మిశ్రమంలో వాటర్ వడకట్టి పక్కన పెట్టుకున్న మీల్ మేకర్స్ వేసుకోవాలి.
- తర్వాత చక్కగా నానిన పచ్చిశనగపప్పుని వాటర్ వడకట్టుకొని మరోసారి కడగాలి. ఆపై అందులో కొద్దిగా పప్పుని ఒక ప్లేట్లోకి తీసుకొని పక్కన పెట్టుకోవాలి.
- అనంతరం మిగిలిన శనగపప్పుని మీల్ మేకర్స్ ఉన్న మిక్సీ జార్లో వేసుకొని మెత్తని పేస్ట్లా మిక్సీ పట్టుకోవాలి.
- ఇప్పుడు మిక్సీ పట్టుకున్న మీల్ మేకర్ పేస్ట్ మిశ్రమాన్ని ఒక వెడల్పాటి ప్లేట్ లేదా బేషన్లోకి తీసుకోవాలి. ఆపై అందులో ముందుగా పక్కకు తీసుకున్న నానబెట్టుకున్న శనగపప్పు, రుచికి తగినంత ఉప్పు, సన్నని కొత్తిమీర తరుగు, కరివేపాకు తరుగు వేసుకోవాలి.
- అలాగే, పసుపు, ముందుగా కట్ చేసి పెట్టుకున్న సన్నని ఉల్లిపాయ ముక్కలు, కోటింగ్ కోసం తడి బియ్యప్పిండిని యాడ్ చేసుకొని మిశ్రమం చక్కగా కలిసేలా కలుపుకోవాలి. ఇక్కడ పిండి అనేది గారెల కన్సిస్టెన్సీకి తగినవిధంగా ఉండాలి.
- అనంతరం కొద్దికొద్దిగా పిండిని తీసుకుంటూ ముందు ఉండలా చేసుకొని ఆపై ఎక్కడ పగుళ్లు లేకుండా వత్తుకుంటూ గారెల మాదిరిగా చేసుకోవాలి. ఇలా పిండి మొత్తాన్ని ప్రిపేర్ చేసుకొని ఒక ప్లేట్లో పెట్టుకొని పక్కనుంచాలి.
- ఇప్పుడు స్టవ్ మీద కడాయిలో డీప్ ఫ్రైకి తగినంత నూనె పోసుకొని వేడి చేసుకోవాలి. ఆయిల్ కాగిన తర్వాత అందులో ముందుగా ప్రిపేర్ చేసుకొని గారెలను పాన్లో సరిపడా నెమ్మదిగా వేసుకొని మీడియం ఫ్లేమ్లో వేయించుకోవాలి.
- అయితే, వీటిని వేసిన వెంటనే తిప్పకుండా రెండు నిమిషాలు ఆగి ఆపై చిల్లుల గరిటెతో అటు ఇటు తిప్పుకుంటూ రెండు వైపులా ఎర్రగా, మంచి గోల్డెన్ కలర్ వచ్చే వరకు వేయించాలి.
- అలా వేయించుకున్నాక టిష్యూ పేపర్ పరచిన ప్లేట్లోకి తీసుకొని కాసేపు ఉంచి వేడి వేడిగా సర్వ్ చేసుకుంటే చాలు. అంతే, సూపర్ టేస్టీ అండ్ క్రిస్పీ "మీల్ మేకర్ మసాలా వడలు" రెడీ!
చిట్కాలు :
- ఒకవేళ ఇక్కడ మీరు పచ్చిశనగపప్పు వద్దనుకుంటే దాని ప్లేస్లో తగినంత శనగపిండిని అయినా తీసుకొని ఈ వడలు చేసుకోవచ్చు.
- అలాగే, బియ్యప్పిండి వద్దనుకుంటే దాని ప్లేస్లో కార్న్ ఫ్లోర్ని యూజ్ చేసుకోవచ్చు.
- ఆయిల్ సరిగా కాగిన తర్వాత మాత్రమే వడలను వేసి వేయించుకోవాలి. లేదంటే వడల పిండి విడిపోయి నూనె మొత్తం వేస్ట్ అవుతుందని గుర్తుంచుకోవాలి.
"కజ్జికాయలు" చేసుకునే సరికొత్త పద్ధతి - పీట లేకున్నా ఒక్కరే నిమిషాల్లో ఎక్కువ మొత్తంలో చేసుకోవచ్చు!
పిల్లలకు "చిట్టి మురుకులు" చేసి పెట్టండి - ఇక దుకాణం మాటెత్తరు! - కరకరలాడే వాటిని కమ్మగా తినేస్తారు!
