రెస్టారెంట్ చెఫ్​ చెప్తున్న "చిట్టి ముత్యాల పులావ్" - ఈ ట్రెండింగ్ రెసిపీని ఎవ్వరైనా చేసేయొచ్చు!

Chicken Chitti Muthyalu : ఎవర్ గ్రీన్ బిర్యానీని బీట్ చేసేలా ఇప్పుడు ఎక్కడ చూసినా "చిట్టిముత్యాల పులావ్" ఘుమాయిస్తోంది. కానీ, ఇంట్లో ప్రిపేర్ చేద్దామంటే రెస్టారెంట్ స్టైల్ రావట్లేదని చాలా మంది బాధ పడుతుంటారు. అలాంటి వారికోసమే ఈ రెసిపీని తీసుకొచ్చాం. అది కూడా ప్రముఖ రెస్టారెంట్ చెఫ్ తలారి రఘు వివరిస్తున్నారు. మరి, ఈ రెసిపీని ఎలా తయారు చేయాలి? కావాల్సిన పదార్థాలేంటి? చిట్టిముత్యాల పులావ్ వెనకున్న సీక్రెట్స్ ఏంటి? అన్నది ఇప్పుడు చూద్దాం.

కావాల్సిన పదార్థాలు :

• బియ్యం కేజీ
• చికెన్‌ కేజీ
• నెయ్యి 200 గ్రాములు
• నూనె 50 గ్రాములు
• లవంగాలు 8
• దాల్చిన చెక్క ముక్కలు 4
• యాలకులు 10
• మరాఠీ మొగ్గలు 4
• అనాస పువ్వు ఒకటి
• బిర్యానీ ఆకులు నాలుగైదు
• అల్లంవెల్లుల్లి పేస్ట్ 4 చెంచాలు
• పచ్చిమిర్చి 6
• కశ్మీరీ కారం 2 చెంచాలు
• మామూలు కారం 2 చెంచాలు
• ధనియాల పొడి చెంచా
• జీలకర్ర పొడి చెంచా
• గరంమసాలా చెంచా
• చిన్న ఉల్లిపాయలు దోసెడు
• వంట సోంపు పొడి చెంచా
• గుప్పెడు కొత్తిమీర
• గుప్పెడు పుదీనా
• పెరుగు 150 గ్రాములు

ఘుమఘుమలాడే "చికెన్​ ఫ్రై విత్​ గ్రేవీ" - పక్కా కొలతలతో చేస్తే సూపర్​ టేస్ట్​ - అన్నం, చపాతీల్లోకి పర్ఫెక్ట్​​!

తయారీ విధానం :

• అడుగు మందంగా ఉన్న పాత్రను పొయ్యిమీద నెయ్యి, నూనె వేయాలి
• నెయ్యి కాగిన తర్వాత లవంగాలు, దాల్చినచెక్క యాలకులు, మరాఠీ మొగ్గలు, అనాసపువ్వు వేయాలి. అవి కాస్త వేగిన తర్వాత బిర్యానీ ఆకులు వేసుకోవాలి.
• సరిగ్గా ఇప్పుడే పొట్టు మాత్రమే తీసి, కట్‌ చేయని దోసెడు చిన్న ఉల్లిపాయలు వేయాలి.
• అవి కాస్త ఉడకగానే అల్లం పేస్టు, పచ్చిమిర్చి వేసి మిక్స్ చేసుకోవాలి.
• తర్వాత కశ్మీరీ కారం, మామూలు కారం, జీలకర్ర పొడి, ధనియాల పొడి, గరంమసాలా వేసేయాలి. వంట సోంపు పొడి కూడా ఒక స్పూన్ వేసి కలపాలి.
• కాసేపు తర్వాత పుదీనా, కొత్తిమీర, పెరుగును వేసి మిక్స్ చేయాలి.
• ఇప్పుడు.. చికెన్‌ను వేసి, సుమారు పది నిమిషాల సేపు సన్నని సెగ మీదనే ఫ్రై చేయాలి.
• ఈ టైమ్​లో చికెన్ కుక్ అవుతూ అందులోంచి వాటర్ వస్తుంటుంది. ఆ నీళ్లు ఎంత ఉన్నాయో చూసుకొని, వాటిని కూడా అంచనా వేసి, కప్పు బియ్యానికి రెండు కప్పుల నీళ్లు పోయాలి.
• వాటర్ ఎక్కువ తక్కువ కాకుండా చూసుకోవాలి. తక్కువైతే గింజ సరిగా ఉడకదు. ఎక్కువైతే మెత్తగా అయిపోతుంది.
• తగినంత ఉప్పు, నీళ్లపైన కాస్త నెయ్యి, 2 స్పూన్ల రోజ్‌వాటర్, పూర్తి నిమ్మకాయ రసం పిండాలి. స్లోగా కుక్ చేస్తేనే పులావ్ అద్భుతంగా వస్తుందని మరిచిపోవద్దు.

టిప్స్ :

• కుక్ చేసిన వెంటనే తినకూడదు. పై మూత కాస్త పక్కకు జరిగి ఒక అరగంటపాటు అలా వదిలేయాలి.
• అలా చేయడం ద్వారా పులావ్ లోని ఫ్లేవర్స్‌ చక్కగా సర్దుకుంటాయి.
• బిర్యానీ కన్నా చిట్టి ముత్యాల పులావ్‌ చేయడం ఈజీ. చికెన్‌ మారినేట్‌ అవసరం లేదు.
• ఉల్లిపాయలు చిన్నవే వాడాలి. పులావ్‌ రుచి అంతా అందులో ఉంది.

నోరూరించే "దాబా చికెన్" ఇంట్లోనే! - చిక్కని గ్రేవీతో భలే కమ్మగా ఉంటుంది!