మళ్లీ మళ్లీ కావాలనిపించే "క్యాప్సికం చట్నీ" - ఇలా చేస్తే టిఫిన్లు, చపాతీ, పుల్కాల్లోకి అద్దిరిపోతుంది!

క్యాప్సికం పచ్చడి - ఒక్కసారి చేసుకుంటే మళ్లీ మళ్లీ కావాలంటారు

CAPCICUM CHUTNEY : ఇడ్లీ, దోసెల్లాంటి టిఫిన్లలోకి ఎప్పుడూ పల్లీ చట్నీ, టమోటా చట్నీ మాత్రమే కాకుండా ఇలా కొత్తగా క్యాప్సికం చట్నీ చేసుకుని చూడండి ఎంతో రుచిగా ఉంటుంది. కాస్త వేరుశనగలు, పచ్చిమిర్చి, టమోటా, ఉల్లిపాయలు కలిపి చేసుకునే ఈ క్యాప్సికం పచ్చడి ఒక్కసారి రుచి చూస్తే చాలు! మళ్లీ, మళ్లీ చేసుకుంటారు.

క్యాప్సికం చట్నీ టిఫిన్లలోకి మాత్రమే కాదు పునుగులు, రైస్, చపాతీలోకి కూడా చాలా బాగుంటుంది. టమోటా, ఉల్లిపాయలు కూడా వేసుకునే ఈ చట్నీ మిగతా వాటితో పోలిస్తే కాస్త భిన్నంగా ఉంటుంది.

capcicum_chutney_in_telugu (Gettyimages)

కావాల్సిన పదార్థాలు

• పల్లీలు - 2 టేబుల్ స్పూన్లు
• పచ్చి శనగ పప్పు - 1 టేబుల్ స్పూన్
• మినప్పప్పు - 1 టేబుల్ స్పూన్
• జీలకర్ర - 1 టీ స్పూన్
• ధనియాలు - 1 టీ స్పూన్
• పచ్చి మిర్చి - 10
• ఉల్లిపాయల తరుగు - 1 కప్పు
• పొడవుగా సన్నగా
• క్యాప్సికం - 2
• టమోటాలు -2
• ఉప్పు - రుచికి సరిపడా
• పసుపు - పావు టీస్పూన్
• చింతపండు - కొద్దిగా
• కొత్తిమీర - కొద్దిగా
• 5 వెల్లుల్లి రెబ్బలు

capcicum_chutney_in_telugu (ETV Bharat)

తాలింపు కోసం

• మినప్పప్పు
• నూనె
• ఎండు మిర్చి
• ఆవాలు
• జీలకర్ర
• పచ్చిశనగపప్పు

capcicum_chutney_in_telugu (ETV Bharat)

తయారీ విధానం

• ముందుగా పొయ్యిమీద ప్యాన్ పెట్టుకుని పల్లీలు వేయించుకోవాలి. అందులోనే పచ్చి శనగ పప్పు, మినప్పప్పు, జీలకర్ర, ధనియాలు సన్నటి మంటపై దోరగా వేయించుకుని పక్కన పెట్టుకోవాలి.
• ఆ తర్వాత అదే కడాయిలో కొద్దిగా నూనె వేసుకుని వేడెక్కగానే పచ్చి మిర్చి వేసుకోవాలి. ఆ తర్వాత సన్నగా, పొడవుగా తరిగిన ఉల్లిపాయ ముక్కలు కూడా వేసుకోవాలి. మంట మీడియం ఫ్లేమ్​లో పెట్టుకుని క్యాప్సికం, టమోటాలు, రుచికి సరిపడా ఉప్పు, కొద్దిగా చింతపండు, పసుపు వేసుకుని ఉడికించుకోవాలి. ఐదు నిమిషాలు మెత్తగా ఉడికిన తర్వాత దించి పక్కన పెట్టుకుని చల్లార్చుకోవాలి.
• ఇపుడు వేయించి పక్కన పెట్టుకున్న పల్లీల మిశ్రమాన్ని మిక్సీ జార్​లోకి తీసుకుని మెత్తగా గ్రైండ్ చేసుకోవాలి. ఆ తర్వాత అందులోనే పొట్టు తీసిన వెల్లుల్లి వేసుకోవాలి. ఆపై ఉడికించుకుని చల్లార్చుకున్న క్యాప్సికం, టమాట ముక్కలు కూడా వేసుకుని గ్రైండ్ చేసుకోవాలి.
• రెడీ చేసుకున్న చట్నీలోకి పోపు కోసం తాలింపు వేసుకోవాలి. నూనె, మినప్పప్పు, ఎండు మిర్చి, ఆవాలు, జీలకర్ర, పచ్చిశనగపప్పుతో పాటు కరివేపాకు రెమ్మ వేసుకుని చిటపటలాడించి చట్నీలో కలుపుకుంటే సరిపోతుంది.