బాలికలకు బలాన్నిచ్చే "బియ్యం పిండి పిట్టు"- ఆడపిల్లలు, మహిళలు తప్పక తినాల్సిన స్వీట్​ ఇది!

సంప్రదాయ వంటకం బియ్యం పిండి పిట్టు - ఆడపిల్లలు, మహిళలు తరచూ తింటే ఎన్నో ప్రయోజనాలు!

Biyyam Pittu Recipe In Telugu : బియ్యంతో చేసే మన సంప్రదాయ వంటకాలు చాలానే ఉన్నాయి. అందులో ముఖ్యంగా బియ్యం పిండి పిట్టు ఒక చక్కటి వంటకం. ఆడపిల్లలు రజస్వల అయిన సమయంలో ఈ బియ్యం పిండి పిట్టు తినిపిస్తుంటారు. బెల్లం, బియ్యం పిండి, కొబ్బరి వంటి వాటితో చేసే ఈ పిట్టు ఆ సమయంలో వారు ఆరోగ్యంగా, బలంగా ఉండడానికి తోడ్పడుతుంది. ఈ బియ్యం పిండి పిట్టు ఆడ పిల్లలే కాకుండా ఎవ్వరైనా తినచ్చు. ఈ రెసిపీ తయారీలో బెల్లం ఉపయోగిస్తారు. బెల్లంతో ఎన్నో రకాల ఆరోగ్య ప్రయోజనాలున్నాయి. అయితే, సింపుల్​గా ఈ బియ్యం పిండి పిట్టు ఎలా తయారు చేసుకోవాలో ఇప్పుడు చూద్దాం.

Rice (Getty Images)

బియ్యం పిండి పిట్టు తయారీకి కావాల్సిన పదార్థాలు

• బియ్యం - కప్పు
• తురిమిన బెల్లం - అరకప్పు
• ఎండుకొబ్బరి ముక్కలు - అరకప్పు
• యాలకులు - 4
• నెయ్యి - రెండు టేబుల్​స్పూన్లు

Jaggery (Getty Images)

బియ్యం పిండి పిట్టు తయారీ విధానం

• ఇందుకోసం ముందుగా ఒక మిక్సింగ్​ బౌల్లో కప్పు బియ్యం తీసుకోండి. వీటిని రెండుమూడు సార్లు శుభ్రంగా కడిగి నాలుగు గంటలపాటు నానబెట్టుకోవాలి.
• అనంతరం ఒక మిక్సీ జార్లో నానబెట్టుకున్న బియ్యం నీళ్లు వంపేసి తీసుకొని కాస్త బరకగా గ్రైండ్​ చేసుకోండి.
• మీరు పొడి బియ్యం పిండితో కూడా ఈ పిట్టు తయారు చేసుకోవచ్చు. అయితే, ఆ బియ్యం పిండి మరీ మెత్తటి పొడిలా కాకుండా కాస్త బరకగా ఉండాలి.
• పిట్టు చేయడం కోసం ఒక గిన్నె తీసుకోండి. ఇందులో గ్లాసు నీళ్లు పోసి పలుచటి తడి కాటన్​ వస్త్రం ఉంచి దారంతో కట్టండి. వస్త్రంపై ముందుగా గ్రైండ్​ చేసుకున్న బియ్యం పిండి వేసి లైట్​గా ప్రెస్​ చేయాలి. అనంతరం పిండిపై అక్కడక్కడా స్పూన్​తో హోల్స్​ చేయాలి. అనంతరం కాటన్​ వస్త్రంతో పిండిని కప్పివేయాలి.

Biyyam Pittu (ETV Bharat)

• ఇప్పుడు గిన్నెను స్టవ్​పై పెట్టి స్టీమ్​ పోకుండా దానిపై మరొక గిన్నెను పెట్టాలి.
• స్టవ్​ మీడియం ఫ్లేమ్​లో అడ్జస్ట్​ చేసి బియ్యం పిండి పిట్టు 20 నిమిషాలు ఉడికించుకోండి.
• ఈ లోపు పిట్టులోకి కావాల్సిన కొబ్బరి పొడి కోసం ఒక మిక్సీ జార్లో అరకప్పు ఎండుకొబ్బరి ముక్కలు, యాలకులు వేసి మెత్తగా పొడి చేసుకోవాలి.
• పిట్టు చక్కగా ఉడికిన తర్వాత ఒక ప్లేట్లోకి తీసుకొని స్పూన్​తో మ్యాష్​ చేసుకోండి. అనంతరం ఇందులో అరకప్పు తురిమిన బెల్లం, గ్రైండ్​ చేసుకున్న కొబ్బరి పొడి వేసి బాగా కలపండి. అనంతరం రెండు టేబుల్​స్పూన్లు నెయ్యి వేసి అంతా కలిసేలా మిక్స్​ చేయాలి.
• అంతే ఇలా సింపుల్​గా ప్రిపేర్ చేసుకుంటే టేస్టీ అండ్​ హెల్దీ బియ్యం పిండి పిట్టు రెడీ!
• ఈ బియ్యం పిండి పిట్టు తయారీ విధానం నచ్చితే మీరు ఓసారి ట్రై చేయండి.