Rava Appalu in Telugu : సాధారణంగా బొంబాయి రవ్వతో ఉప్మా, కేసరి వంటివి ఎక్కువగా చేస్తుంటారు. అయితే, ఈ రవ్వతో మీరు ఎప్పుడైనా అప్పాలను ట్రై చేశారా? ఇక్కడ చెప్పిన విధంగా బెల్లంతో రవ్వ అప్పాలు చేస్తే ఎంతో రుచికరంగా ఉంటాయి. ఈ బెల్లం రవ్వ అప్పాలను పిల్లలు ఒకటికి రెండు ఇష్టంగా తింటారు. ఈ అప్పాలు చేయడం కూడా చాలా ఈజీ. మరి ఇక ఆలస్యం చేయకుండా బెల్లం రవ్వ అప్పాలు చేయడానికి కావాల్సిన పదార్థాలు? తయారీ విధానం ఇప్పుడు చూద్దాం.
రవ్వ అప్పాలు తయారీకి కావాల్సిన పదార్థాలు
- బెల్లం తురుము - పావుకప్పు
- నీళ్లు - కప్పు
- చిటికెడు ఉప్పు
- బొంబాయి రవ్వ - అర కప్పు
- ఎండుకొబ్బరి పొడి - పావుకప్పు
- నెయ్యి - సరిపడా
- యాలకుల పొడి - అరటీస్పూన్
కుక్కర్లో చాలా ఈజీగా "రాగి సంగటి" - నోట్లో వేసుకుంటే వెన్నలా కరిగిపోతుంది!
రవ్వ అప్పాలు తయారీ విధానం
- ఇందుకోసం ముందుగా స్టవ్పై ఒక కడాయి పెట్టి అందులో కప్పు వాటర్ పోసి వేడి చేయండి. వాటర్ మరుగుతున్నప్పుడు పావుకప్పు బెల్లం తురుము, చిటికెడు ఉప్పు వేసి బాగా కలపండి.
- బెల్లం పూర్తిగా కరిగాక ఇందులో అరకప్పు బొంబాయి రవ్వ, అరటీస్పూన్ యాలకుల పొడి వేసి కలుపుతూ ఉడికించండి.
- రవ్వ వాటర్ని పీల్చుకుని పిండి ముద్దగా మారి, పాన్ నుంచి సెపరేట్ అయ్యే వరకు కలుపుతూ నిదానంగా ఉడికించుకోండి.
- రవ్వ మిశ్రమం దగ్గర పడిన తర్వాత టేబుల్స్పూన్ నెయ్యి వేసి బాగా కలిపి స్టవ్ ఆఫ్ చేయండి.
- ఈ రవ్వ మిశ్రమం ఒక ప్లేట్లోకి తీసుకుని చల్లారనివ్వండి. పిండి కాస్త గోరువెచ్చగా ఉన్నప్పుడు పావుకప్పు ఎండుకొబ్బరి పొడి వేసి అంతా కలిసేలా బాగా కలుపుకోవాలి.
- ఇప్పుడు పిండిని చిన్నచిన్న ఉండలుగా చేసుకోండి.
- ఆపై ఒక ప్లాస్టిక్ కవర్కు నెయ్యి రాసి పిండి ఒక ఉండను పెట్టి కాస్త మందంగా అప్పాల మాదిరి వత్తుకోండి.
- ఇలా తయారు చేసుకున్న అప్పాలను ఒక ప్లేట్లో పక్కన పెట్టుకోండి.
- అనంతరం అప్పాలు డీప్ ఫ్రై చేయడం కోసం స్టవ్పై కడాయి పెట్టి సరిపడా ఆయిల్ పోసి వేడి చేయండి.
- నూనె హీటైన తర్వాత రెడీ చేసుకున్న అప్పాలు వేసి కాసేపు అలా వదిలేయండి.
- ఆపై గరిటెతో నెమ్మదిగా తిప్పుతూ ఎర్రగా మారే వరకు ఫ్రై చేసుకోండి.
- రవ్వ అప్పాలు రెండువైపులా దోరగా కాల్చుకున్న అనంతరం ఒక ప్లేట్లోకి తీసుకోండి.
- అంతే ఇలా సింపుల్గా మిగిలిన అప్పాలను నూనెలో వేయించుకుంటే సరి!
- ఈ బెల్లం రవ్వ అప్పాలు ఎంతో రుచికరంగా ఉంటాయి. ఎప్పుడైనా స్వీట్ తినాలనిపిస్తే ఇలా ఓసారి ట్రై చేయండి.
తీయటి "పచ్చికొబ్బరి బెల్లం లడ్డూలు" - రక్తహీనతతో బాధపడేవారు ఓసారి ఇలా ట్రై చేయండి!
"తెలంగాణ దావత్ స్టైల్ మటన్ కర్రీ" - ఓసారి ఇలా ఇంట్లో చేయండి! అందరూ "సూపర్" అంటారు!
