తీయటి "బెల్లం జిలేబీలు" - ఈ పదార్థం పాకంలో వేస్తే ఎన్ని గంటలైనా జ్యూసీగా ఉంటాయి!

మైదా వాడకుండా ఇలా జిలేబీలు చేయండి! -ఇంట్లో వాళ్లందరూ ఇష్టంగా తింటారు!

Bellam Jalebi Recipe in Telugu : చాలా మందికి స్వీట్​షాప్స్​, జిలేబీ సెంటర్స్​ వద్ద లభించే జిలేబీలంటే ఎంతో ఇష్టం. బాక్స్​ ముందు పెడితే పిల్లలు, పెద్దలు ఇలా అందరూ ఒకటికి రెండు జిలేబీలు తింటారు. అయితే, కొన్ని టిప్స్​ పాటిస్తూ ఈ స్టోరీలో చెప్పిన విధంగా చేస్తే మీరు కూడా జిలేబీలు రెడీ చేయచ్చు. ఈ బెల్లం జిలేబీలు ఎంతో టేస్టీగా, జ్యూసీగా ఉంటాయి. మరి ఈ బెల్లం జిలేబీలు ఎలా చేయాలో ఇప్పుడు చూద్దాం.

టేస్టీ బెల్లం జిలేబీ తయారు చేయడానికి కావాల్సిన పదార్థాలు:

• గోధుమ పిండి - కప్పు
• పొడి బియ్యం పిండి - 4 టేబుల్​స్పూన్లు
• బెల్లం తురుము - కప్పు
• నీళ్లు - అరకప్పు
• నిమ్మరసం - 2 టేబుల్​స్పూన్లు
• నెయ్యి - 2 టేబుల్​స్పూన్లు
• వంటసోడా - పావు టీస్పూన్

Jaggery (Getty Images)

జిలేబీల తయారీ విధానం

• ముందుగా స్టవ్​ ఆన్ చేసి పాన్ పెట్టి కప్పు బెల్లం తురుము వేయండి. ఇందులో అరకప్పు వాటర్​ వేసి బెల్లం కరిగించుకోండి. స్టవ్​ మీడియం ఫ్లేమ్​లో అడ్జస్ట్​ చేసి బెల్లం పూర్తిగా కరిగిన తర్వాత కాస్త పాకం వచ్చే వరకు మరిగించుకోవాలి.
• ఆ విధంగా బెల్లం పాకం ప్రిపేర్​ అయిన తర్వాత స్టవ్​ ఆఫ్​ చేసి ఇందులో 2 టేబుల్​స్పూన్లు నిమ్మరసం వేసి కలపండి. ఇలా పాకంలో నిమ్మరసం కలపడం వల్ల పాకం చిక్కబడదు. అలాగే జిలేబీలు పాకం పీల్చుకుని ఎన్ని గంటలైనా జ్యూసీగా ఉంటాయి.
• ఇప్పుడు ఒక మిక్సింగ్​ బౌల్లో కప్పు గోధుమ పిండి, 4 టేబుల్​స్పూన్లు పొడి బియ్యం పిండి, 2 టేబుల్​స్పూన్లు నెయ్యి, వంటసోడా వేసి బాగా కలుపుకోండి.
• తర్వాత ఇందులో కొద్దికొద్దిగా వాటర్​ యాడ్​ చేస్తూ పిండిని ఉండలు లేకుండా కలుపుకోవాలి.
• జిలేబీలు రావడం కోసం పిండి మరీ చిక్కగా, పల్చగా కాకుండా ఉండాలి.
• ఇప్పుడు పిండిని సాస్​ డబ్బాలోకి తీసుకోండి.
• జిలేబీలు చేయడం కోసం స్టవ్​పై వెడల్పాటి పాన్ పెట్టి నూనె వేసి వేడి చేయండి.
• ఆయిల్​ హీటైన తర్వాత స్టవ్ లో ఫ్లేమ్​లో అడ్జస్ట్​ చేసి జిలేబీలు వేసుకోండి.
• అరనిమిషం తర్వాత గరిటెతో జిలేబీలను తిప్పుతూ ఫ్రై చేసుకోండి. జిలేబీలో దోరగా వేగిన తర్వాత బెల్లం పాకంలో వేయండి. నిమిషం పాటు బెల్లం పాకంలో జిలేబీలు డిప్​ చేసిన తర్వాత వాటిని జాలి గరిటెలోకి తీసుకోండి.
• ఆపై వేడివేడిగా జిలేబీలను సర్వ్​ చేసుకుంటే సరి! అంతే ఇలా సింపుల్​గా ప్రిపేర్​ చేసుకుంటే ఎంతో రుచికరమైన తీయటి బెల్లం జిలేబీలు మీ ముందుంటాయి.
• బెల్లం జిలేబీ తయారీ విధానం నచ్చితే మీరు ఓసారి ట్రై చేయండి.

Bellam Jalebi (ETV Bharat)