Chicken Fry With Out Oil : చాలా మందికి ముక్క లేనిదే ముద్దదిగదు. సెలవు రోజుల్లో, ఆదివారాల్లో మటన్, చికెన్, ఫిష్ లేదా కనీసం గుడ్డు అయినా ఉండాల్సిందే! ఇలాంటి వాళ్లలో కొందరు ఊబకాయం భయంతో డైట్ పాటిస్తుంటారు. కానీ, ఇప్పుడా ఆందోళన అక్కర్లేదు. డైట్లో ఉన్నామని చికెన్ పక్కన పెట్టాల్సిన పన్లేదు. చుక్క నూనె కూడా వాడకుండా చికెన్ ఫ్రై రెడీ చేసుకుంటే ఎంతో బాగుంటుంది. చాలా స్పైసీగా, టేస్టీ గా ఉంటుంది.
హోటల్ చట్నీ టేస్ట్ సీక్రెట్ ఏమీ లేదు! - పల్లీలను ఇలా చేసి చూడండి చట్నీ కోసమే టిఫిన్ తినేస్తారు!
ఇలా చేయండి :
- నాన్ స్టిక్ కడాయి, చికెన్ స్కిన్తోనే తీసుకోవాలి.
- పుల్లటి పెరుగు కంటే చిక్కటి తాజా పెరుగు వాడాలి.
- హై ఫ్లేమ్లో కాకుండా సన్నటి మంటపై చేసుకోవాలి.
కావాల్సిన పదార్థాలు :
- చికెన్ - కిలో
- ఉప్పు - రుచికి సరిపడా
- కారం - మూడు స్పూన్లు
- పసుపు - పావు స్పూన్
- మిరియాల పొడి - అర స్పూన్
- ధనియాల పొడి - 1 స్పూన్
- చికెన్ మసాలా - 1 స్పూన్
- అల్లం వెల్లుల్లి పేస్ట్ - 1 స్పూన్
- కరివేపాకు - కొద్దిగా
- పెరుగు - అర కప్పు
- నిమ్మరసం - అర చెక్క
- పచ్చి మిర్చి - 6
- మసాలా - 1 స్పూన్
బటర్ రైస్ కోసం :
- బాస్మతి రైస్
- బటర్ - 2 స్పూన్లు
- వెల్లుల్లి - 2 స్పూన్లు
- పచ్చి మిర్చి - 2
- ఉప్పు - రుచికి సరిపడా
- మిరియాల పొడి - అర స్పూన్
- కొత్తిమీర తరుగు - కొద్దిగా
తయారీ విధానం :
- ముందుగా చికెన్ బాగా శుభ్రం చేసుకుని మిక్సింగ్ బౌల్లోకి తీసుకోవాలి.
- ఈ కర్రీలోకి కాల్చిన చికెన్ చాలా బాగుంటుంది. లేదా స్కిన్తో తీసుకున్నా సరిపోతుంది.
- శుభ్రం చేసుకున్న చికెన్లోకి రుచికి సరిపడా ఉప్పు వేసుకోవాలి. మూడు స్పూన్లు కారం, పావు స్పూన్ పసుపుతో పాటు అర స్పూన్ మిరియాల పొడి, 1 స్పూన్ ధనియాల పొడి, చికెన్ మసాలా, అల్లం వెల్లుల్లి పేస్ట్, 2 రెబ్బల కరివేపాకు వేసుకుని బాగా కలుపుకోవాలి. ఆ తర్వాత అర కప్పు చిక్కటి తాజా పెరుగు, నిమ్మరసం కలిపి అరగంట సేపు మారినేట్ చేసుకోవాలి.
- ఇపుడు స్టవ్పై కడాయి పెట్టుకుని 30 నిమిషాలు నానిన చికెన్ వేసుకుని అడుగు పట్టకుండా హై ఫ్లేమ్లో వేయించాలి. 5 నిమిషాల్లో నీళ్లు ఊరగానే మంట మీడియం ఫ్లేమ్లో పెట్టుకుని మరో సారి కలిపి నెమ్మదిగా ఉడికించుకోవాలి. 10 నిమిషాల పాటు మధ్య మధ్యలో మూత తీసుకుంటూ కూర కలుపుతుండాలి.
- నీళ్లు దగ్గర పడిన తర్వాత కారం కోసం 6 పచ్చి మిర్చి సన్నగా చీరుకుని వేసుకోవాలి. ఆ తర్వాత గరం మసాలా వేసుకుని చికెన్ ముక్క డ్రై అయ్యే వరకు అడుగు పట్టకుండా కలుపుతూ ఉడికించుకోవాలి. ఈ సమయంలో చికెన్ చక్కగా మెరుస్తూ ఉడికిపోతుంది. చివరగా కొత్తిమీర తరుగు వేసుకుని కలిపుకుంటే చాలు! చుక్క నూనె వాడకుండానే చికెన్ ఫ్రై రెడీగా ఉంటుంది.
- ఈ చికెన్ ఫ్రై బటర్ రైస్ లోకి అద్దిరిపోతుంది.
- బటర్ రైస్ కోసం ముందుగా బాస్మతి రైస్ లేదా సన్న బియ్యం కాస్త పొడి పొడిగా ఉడికించుకుని పక్కన పెట్టుకోవాలి. ఆ తర్వాత కడాయిలో బటర్ వేసి వేడి కాగానే సన్నగా తరిగిన వెల్లుల్లి పాయలు వేసుకుని దోరగా వేయించాలి.
- ఇపుడు పచ్చి మిర్చి తరుగు వేసుకుని నిమిషంపాటు సన్నటి మంటపై వేయించాలి. ఆ తర్వాత పొడిగా ఉడికించుకున్న అన్నం వేసుకుని పైన రుచికి సరిపోను ఉప్పు, మిరియాల పొడి వేసుకుని బాగా కలపాలి. చివరగా సన్నటి కొత్తిమీర తరుగు వేసుకుని చికెన్ లేదా రైతాతో తింటే చాలా బాగుంటుంది.
స్వీట్ షాప్ స్పెషల్ "ఉల్లిపాయ పకోడీ" - ముందే పిండి కలపకుండా ఇలా చేయండి!
ఘుమఘుమలాడే 'వంకాయ వేపుడు' - ఇలా చేస్తే ముక్క చేదు లేకుండా కమ్మగా ఉంటుంది!
