Homemade Masala Powder Recipe: అన్నం పుష్టిగా, కడుపునిండా తినాలంటే కూర రుచి అమోఘంగా ఉండాలి. కూర అలా ఉండాలంటే అందులోకి సరిపడా కారం, ఉప్పు, మసాలాలు తగినన్ని వేయాలి. వెజ్ కూరలు ఎలా ఉన్నా, నాన్వెజ్ వంటకాలకు సరిపడా మసాలా ఉంటేనే ఆ వాసన, రుచి. ఈ క్రమంలోనే చాలా మంది వంటకాలకు తగ్గట్టు మసాలా పొడిని మార్కెట్ నుంచి కొనుగోలు చేస్తుంటారు. అయితే ఇలా ఒక్కో వంటకానికి ఒక్కో పొడి కాకుండా, అన్నింటికీ సరిపోయేలా ఒకే పొడిని ఇంట్లో తయారు చేసుకోవచ్చు. ఈ పొడిని ఒక్కసారి చేసుకుంటే సుమారు 2 నెలల వరకు నిల్వ ఉంటుంది. పైగా ఈ మసాలా పొడిని పులావ్, బగారా, బిర్యానీ, వెజ్, నాన్వెజ్ వంటకాలు ఇలా ఎందులోకైనా ఉపయోగించవచ్చు. మరి లేట్ చేయకుండా ఇంట్లోనే ఈ మసాలా పొడి ఎలా చేసుకోవాలో చూసేయండి.
కావాల్సిన పదార్థాలు:
- ధనియాలు - 2 కప్పులు(130 గ్రాములు)
- జీలకర్ర - పావు కప్పు(30 గ్రాములు)
- రాతి పువ్వు - 1 గ్రాము
- యాలకులు - 3 టేబుల్స్పూన్లు(10 గ్రాములు)
- 1 టేబుల్స్పూన్ - లవంగాలు
- నల్ల యాలకులు - 1 టేబుల్స్పూన్
- మిరియాలు - 2 టేబుల్స్పూన్లు
- తోక మిరియాలు - 1 టీస్పూన్
- దాల్చినచెక్క - 7 గ్రాములు
- సోంపు - 2 టేబుల్స్పూన్లు
- అనాసపువ్వు రేకులు - 2 టేబుల్స్పూన్లు
- జాపత్రి - కొద్దిగా
- జాజికాయ ముక్క - ఇంచ్
- మరాఠీ మొగ్గ - 1
- బిర్యానీ ఆకులు - 3
- కసూరీ మేతీ - 2 టేబుల్స్పూన్లు
- ఎండు గులాబీ రేకులు - 2 టేబుల్స్పూన్లు
- ఎండుకొబ్బరి పొడి - ముప్పావు కప్పు - 50 గ్రాములు
తయారీ విధానం:
- స్టవ్ ఆన్ చేసి అడుగు మందంగా ఉన్న గిన్నె పెట్టి ధనియాలు వేసి లో ఫ్లేమ్లో కలుపుతూ వేయించాలి.
- ధనియాలు వేగి కాస్త రంగు మారిన తర్వాత స్టవ్ ఆఫ్ చేసి ఓ ప్లేట్లోకి తీసుకుని చల్లారనివ్వాలి.
- ఇప్పుడు అదే పాన్లోకి జీలకర్ర, రాతి పువ్వు, యాలకులు, లవంగాలు, నల్ల యాలకులు, మిరియాలు, తోక మిరియాలు, దాల్చినచెక్క, సోంపు, అనాస పువ్వు రేకులు, జాపత్రి, జాజికాయ, మరాఠీ మొగ్గ, బిర్యాని ఆకులు వేసి స్టవ్ ఆన్ చేయాలి. ముందే స్టవ్ ఆన్ చేసి వేస్తే మాడిపోయే అవకాశం ఉంటుంది.
- వీటన్నింటిని కలపుతూ లో ఫ్లేమ్లో మగ్గించాలి. ఇవి వేగి కమ్మటి వాసన వస్తున్నప్పుడు చివర్లో కసూరీ మేతీ, ఎండిన గులాబీ రేకులు వేసి మరో నిమిషం పాటు వేయించాలి.
- ఈ మసాలా దినుసులన్నీ వేగిన తర్వాత ఓప్లేట్లోకి తీసుకుని పూర్తిగా చల్లారనివ్వాలి.
- అదే పాన్లోకి ఎండు కొబ్బరి పొడి వేసి లో ఫ్లేమ్లో గోల్డెన్ కలర్ వచ్చే వరకు వేయించాలి. కొబ్బరి పొడి వేగిన తర్వాత స్టవ్ ఆఫ్ చేసి పూర్తిగా చల్లారాలి.
- మిక్సీజార్లోకి చల్లారిన ధనియాలు, మసాలా దినుసులు వేసి వీలైనంత మెత్తగా గ్రైండ్ చేసుకోవాలి.
- ఇలా గ్రైండ్ చేసుకున్న మసాలా పొడి సగం తీసుకుని వేయించి చల్లార్చుకున్న కొబ్బరి పొడిలో వేసి కలుపుకోవాలి. ఈ పొడిని చల్లారిన తర్వాత తడి, పొడి లేని గాలి చొరబడని డబ్బాలో స్టోర్ చేసుకుంటే సరి.
- అలాగే మిగిలిన సగం మసాలా పొడిని కూడా మరో గాలి చొరబడని డబ్బాలో నిల్వ చేసుకుంటే ఇంట్లోనే నేచురల్ మసాలా పొడి రెడీ.
- ఇలా కొబ్బరి, మసాలా పొడి కలిపిన మిశ్రమాన్ని చికెన్, మటన్ సహా నాన్వెజ్, వెజ్ కూరల్లోకి వేసుకోవచ్చు.
- కొబ్బరి పొడి కలపకుండా స్టోర్ చేసుకున్న మసాలా పొడిని బిర్యానీ, పులావ్, బగారా వంటి రైస్ వంటల్లోకి వాడుకోవచ్చు. మరి నచ్చితే మీరూ ఓసారి ఈ మసాలా ప్రిపేర్ చేసుకుని ఉంచుకోండి.
చిట్కాలు:
- ఈ మసాలా పొడి కోసం ఉపయోగించే పదార్థాలన్నింటినీ కేవలం లో ఫ్లేమ్లో మాత్రమే వేయించుకోవాలి. అప్పుడే అవి లోపలి వరకు వేగి మంచి వాసన వచ్చి మసాలా రుచి ఘాటుగా ఉంటుంది.
- ఈ పదార్థాలను గ్రైండ్ చేసుకున్న తర్వాత పూర్తిగా చల్లారనివ్వాలి. లేదంటే వేడి మీద స్టోర్ చేసినప్పుడు లోపల తేమ ఏర్పడి పొడి పాడయ్యే అవకాశం ఉంటుంది.
- ఈ పొడి కోసం ధనియాలను ఎక్కువ క్వాంటిటీలో తీసుకున్నాం కాబట్టి మసాలా పొడిని కొంచెం ఎక్కువ వేసుకున్నా పెద్దగా ప్రాబ్లం ఉండదు.
- బగారా, బిర్యానీ వంటి రైస్లకు కొబ్బరి పొడి కలపని పొడిని సుమారు 2 నుంచి 3 టేబుల్స్పూన్ల వరకు వాడుకోవచ్చు. అదే చికెన్, మటన్ సహా ఇతర నాన్వెజ్ వంటకాలను కొబ్బరిపొడి కలిపిన మసాలాను 4 టేబుల్స్పూన్ల వరకు ఉపయోగించవచ్చు. అదే వెజ్ కూరలకు అయితే మీరు వండే క్వాంటిటీని బట్టి 1 నుంచి 2 టీ స్పూన్ల వరకు వాడొచ్చు.
- ఈ పొడిని ఎక్కువ రోజులు అంటే 2 నెలల పాటు నిల్వ చేసుకోవచ్చు. కానీ దీనిని ఫ్రిజ్లో స్టోర్ చేసుకోవాలి. అప్పుడే మసాలా పొడి తాజాగా ఉండటంతో పాటు వంటలకు రుచిని అందిస్తుంది.
కూరల్లో చక్కటి గ్రేవీ కోసం ఇంట్లోనే "పౌడర్"! - ఇది ఒక్క చెంచా చాలు - గ్రేవీతోపాటు సూపర్ టేస్టీ!
