ఫ్రెష్ క్రీమ్, బీటర్ లేకుండానే - ఒకే మిక్స్​తో "వెనీలా, మ్యాంగో, చాక్లెట్" ఐస్​క్రీమ్స్! - ప్రాసెస్ కూడా చాలా ఈజీ!

ఒకే మిక్స్​తో త్రీ ఫ్లేవర్స్​ ఐస్​క్రీమ్​లు - ఇలా చేసి ఇస్తే పిల్లలు బయట అస్సలు కొనివ్వమనరు!

Simple Ice Cream Recipes in Telugu : ఎండాకాలం వచ్చిందంటే చాలు పిల్లలు ఐస్​క్రీమ్​ని ఎంతో ఇష్టంగా తింటుంటారు. దాంతో ఐస్​క్రీమ్ బండి కనపడితే చాలు కొనిచ్చే వరకు మారాం చేస్తుంటారు. ఈ క్రమంలోనే చాలా మంది పేరెంట్స్ పిల్లలు ఏడుస్తున్నారని బయట ఐస్​క్రీమ్స్ ఇప్పిస్తుంటారు. కానీ, వాటిల్లో ఆరోగ్యానికి హాని కలిగించే ప్రిజర్వేటివ్స్ ఉండవచ్చు. అందుకే, పిల్లల కోసం ఇంట్లోనే ఈజీగా, హెల్దీగా ప్రిపేర్ చేసుకునే ఐస్​క్రీమ్ రెసిపీని తీసుకొచ్చాం.

అంతేకాదు, ఒకే మిక్స్​తో మ్యాంగో, చాకోలెట్, వెనీలా ఈ మూడు ఫ్లేవర్స్ ఐస్​క్రీమ్స్​ని​ రెడీ చేసుకోవచ్చు. పైగా వీటి తయారీ కోసం ఎలాంటి ప్రెష్ క్రీమ్, బీటర్, కండెన్స్​డ్ మిల్క్ అవసరం లేదు. కాబట్టి, పిల్లల నుంచి పెద్దల వరకు అందరూ హెల్దీగా వీటిని తినొచ్చు. ఇంట్లో ఉండే వాటితోనే చాలా సింపుల్​గా రెడీ అయిపోతాయి. టేస్ట్ కూడా బయట ఐస్​క్రీమ్ షాప్స్​లో దొరికే ఫ్లేవర్​కి ఏమాత్రం తీసిపోదు. మరి, ఈ టేస్టీ అండ్ హెల్దీ ఐస్​క్రీమ్స్​ని ఎలా చేసుకోవాలో ఇప్పుడు చూద్దాం.

కావాల్సిన పదార్థాలు :

• పాలు - ఒక లీటర్
• కార్న్​ఫ్లోర్ - నాలుగు టేబుల్​స్పూన్లు
• పంచదార - 100 గ్రాములు(పావు కప్పు కంటే కొద్దిగా ఎక్కువ)
• మిల్క్​ మలై(పాల మీగడ) - పావు కప్పు
• వెనీలా ఎసెన్స్ - ఒక టీస్పూన్
• మామిడిపండు గుజ్జు - పావు కప్పు(మ్యాంగో ఫ్లేవర్ కోసం)
• కోకో పౌడర్ - 2 టేబుల్​స్పూన్లు (చాకోలెట్ ఫ్లేవర్ కోసం)

Ice Cream Mix (ETV Bharat)

తయారు చేసుకోండిలా :

• ఇందుకోసం ముందుగా ఒక గిన్నెలో పాలు పోసుకొని పక్కనుంచాలి.
• ఇప్పుడు మరో చిన్న గిన్నెలో కార్న్​ఫ్లోర్ తీసుకొని అందులో 100 ఎంఎల్ పాలు(ముందుగా తీసుకున్న లీటర్ పాలలో నుంచి తీసుకోవాలి) పోసుకొని ఎలాంటి ఉండలు లేకుండా బాగా కలుపుకొని పక్కనుంచాలి.
• అనంతరం మిగిలిన పాల గిన్నెను స్టవ్ మీద ఉంచి పొంగు వచ్చే వరకు మధ్యమధ్యలో కలుపుతూ మరిగించుకోవాలి.
• పాలు పొంగు వచ్చాక మీడియం ఫ్లేమ్​లో అడుగంటి పోకుండా, పాలు పొగి పోకుండా మధ్యమధ్యలో కలుపుతూ కనీసం 5 లేదా 10 నిమిషాల పాటు బాగా బాయిల్ చేసుకోవాలి.
• 5 నిమిషాల తర్వాత పాల క్వాంటిటీ తగ్గి కాస్త చిక్కగా మారుతాయి. అప్పుడు అందులో ముందుగా కలిపి పక్కన పెట్టుకున్న కార్న్​ఫ్లోర్ మిక్చర్ మరోసారి కలిపి కొద్దికొద్దిగా ఉండలు కట్టకుండా కలుపుతూ వేసుకోవాలి
• ఈ టైమ్​లో స్టవ్​ను లో ఫ్లేమ్​లో ఉంచి కార్న్​ఫ్లోర్ మిక్చర్ వేసుకోవాలి. ఆపై 2 నుంచి 3 నిమిషాల పాటు కలుపుతూ సన్నని సెగ మీదనే మరగనివ్వాలి.
• ఆ మిశ్రమం కాస్త దగ్గర పడ్డాక పంచదార వేసుకొని అది పూర్తిగా కరిగే వరకు కలుపుతూ బాయిల్ చేసుకోవాలి.
• చక్కెర కరిగిపోయాక ఒకసారి టేస్ట్ చూసుకొని స్వీట్​నెస్ చాలకపోతే మరికొద్దిగా షుగర్ వేసుకొని మరిగించుకోవాలి.
• పంచదార కరిగాక మరో రెండు నిమిషాలు మరిగించుకొని స్టవ్ ఆఫ్ చేసుకొని గిన్నెను దించి ఆ మిశ్రమాన్ని పూర్తిగా చల్లార్చుకోవాలి.
• ఇప్పుడు మిక్సీ జార్ తీసుకొని పూర్తిగా చల్లారిన పాల మిశ్రమం వేసుకోవాలి. ఆపై అందులో పాల మీగడ, వెనీలా ఎసెన్స్ వేసుకొని మధ్యమధ్యలో గ్యాప్ ఇస్తూ లో స్పీడ్​​లో స్మూత్​గా బ్లెండ్ చేసుకోవాలి.
• క్రీమీ టెక్చర్ వచ్చేలా ఆ మిశ్రమాన్ని బ్లెండ్ చేసుకున్నాక దాన్ని ఒక బౌల్ లేదా బాక్స్​లోకి తీసుకోవాలి. అనంతరం ఎయిర్​టైటెడ్​గా ఉండే మూతపెట్టి ఆ బాక్స్​ని డీఫ్రిడ్జ్​లో కనీసం 4 నుంచి 6 గంటల పాటు ఫ్రీజ్ చేసుకోవాలి.
• 6 గంటల తర్వాత బయటకు తీస్తే అది కుల్ఫీ టెక్చర్​తో ఐస్​లా ఫామ్ అయి ఉంటుంది. ఇప్పుడు ఈ ఒక్క కుల్ఫీ టెక్చర్ ఐస్​ మిశ్రమంతో మూడు ఫ్లేవర్స్ ఐస్​క్రీమ్స్ రెడీ చేసుకోవచ్చు.

Vanilla Ice Cream (ETV Bharat)

• అందుకోసం దాన్ని చాకుతో మూడు భాగాలుగా చేసుకోవాలి. అది బాగా హార్డ్​గా అయి ఉంటుంది కాబట్టి ఈజీగా డీమౌల్డ్ అవ్వడానికి కాసేపు ఒక గిన్నెలో వాటర్ తీసుకొని అందులో ఉంచాలి.
• కాస్త మెల్ట్ అయ్యాక అందులో ఒక భాగాన్ని చిన్న చిన్న ముక్కలుగా కట్ చేసుకోవాలి. ఆపై వాటిని మిక్సీ జార్​లో వేసుకొని లో స్పీడ్​లో మధ్యమధ్యలో గ్యాప్ ఇస్తూ స్మూత్​గా బ్లెండ్ చేసుకోవాలి.
• క్రీమీ టెక్చర్ వచ్చేలా బ్లెండ్ చేసుకున్నాక దాన్ని ఒక ఎయిర్​టైటెడ్ బాక్స్​లోకి తీసుకొని పైన అల్యూమినియం ఫాయిల్​తో కవర్ చేసి మూతని టైట్​గా పెట్టేసి పక్కనుంచాలి. ఇందులో ముందుగానే వెనీలా ఎసెన్స్ వేసుకున్నాం కాబట్టి ఇది వెనీలా ఫ్లేవర్​ ఐస్​క్రీమ్​ అవుతుంది.

Mango Ice Cream (ETV Bharat)

• ఇప్పుడు మరో ఫ్లేవర్ ఐస్​క్రీమ్ కోసం అదే మిక్సీ జార్​లో మరొక భాగాన్ని ముక్కలుగా చేసి వేసుకొని క్రీమీ టెక్చర్ వచ్చేలా బ్లెండ్ చేసుకోవాలి.
• ఆ తర్వాత మ్యాంగో ఫ్లేవర్ కోసం అందులో మామిడిపండు గుజ్జుని వేసుకొని అంతా మిక్స్ అయ్యేలా కొద్దిగా పల్స్ ఇచ్చి బ్లెండ్ చేసుకోవాలి.
• అనంతరం ఆ మిశ్రమాన్ని మరో బాక్స్​లోకి తీసుకొని ఈక్వల్​గా స్ప్రెడ్ చేసుకోవాలి. ఆపై పైన కొద్దిగా పిస్తా పలుకులతో గార్నిష్ చేసుకొని అల్యూమినియం ఫాయిల్​తో కవర్ చేసి మూతపెట్టుకోవాలి.

Chocolate Ice Cream (ETV Bharat)

• ఇప్పుడు చాక్లెట్ ఫ్లేవర్ ఐస్​క్రీమ్ కోసం మిక్సీ జార్​లో మిగిలిన పార్ట్​ని ముక్కలుగా చేసి తీసుకోవాలి. ఆపై అందులో కోకో పౌడర్ వేసుకొని స్మూత్​గా అయ్యేంత వరకు బ్లెండ్ చేసుకోవాలి.
• మీ దగ్గర కోకో పౌడర్ కనుక లేకపోతే డైరీ మిల్క్ చాక్లెట్స్​ని పీసెస్​గా కట్ చేసి అయినా వేసుకోవచ్చు.
• ఆ తర్వాత బ్లెండ్ చేసుకున్న మిశ్రమాన్ని ఇంకో బౌల్​లోకి తీసుకోవాలి. ఆపై పిల్లలకు తినడానికి ఇంట్రెస్ట్​గా ఉండడానికి మధ్యలో కొద్దిగా చాకో చిప్స్ వేసుకొని అల్యూమినియం ఫాయిల్​తో కవర్ చేసి మూత పెట్టేయాలి.
• అనంతరం ఆ మూడు బాక్సులను డీఫ్రిడ్జ్​లో కనీసం 8 గంటల పాటు లేదా ఓవర్ నైట్ ఉంచినా పర్వాలేదు.
• 8 గంటల అనంతరం వాటిని బయటకు తీసి చిన్న చిన్న గిన్నెల్లోకి స్కూప్ ఔట్ చేసుకొని సర్వ్ చేసుకుంటే చాలు.
• అంతే, ఒక ఐస్​క్రీమ్ మిక్స్​తో నోరూరించే "మ్యాంగో, చాక్లెట్, వెనీలా ఫ్లేవర్ ఐస్​క్రీమ్స్"​ రెడీ!

టిప్స్ :

• ఐస్​క్రీమ్ రుచికరంగా రావడానికి ఎప్పుడైనా సరే మీగడ తీయని పాలను ఎంచుకోవాలి. అదే, మీరు ప్యాకెట్ పాలను వాడుతున్నట్టయితే ఫుల్ ఫ్యాట్ మిల్క్​ని యూజ్ చేస్తే బెటర్.
• ఈ రెసిపీలో మిల్క్ మలై వేయడం ద్వారా ఐస్​క్రీమ్ అనేది క్రీమి క్రీమిగా రావడమే కాకుండా మంచి టెక్చర్, టేస్ట్ కూడా వస్తుంది. ఒకవేళ మీ దగ్గర ఇది లేకపోతే స్కిప్ చేయొచ్చు.