నూనె పీల్చని "సేమియా కరివేపాకు పకోడీ" - ఇలా చేస్తే కమ్మగా, కరకరలాడుతుంది!
పిల్లలు ఎంతో ఇష్టంగా తినే పకోడీ 'రెసిపీ' - ఒక్కసారి తింటే మళ్లీ మళ్లీ కావాలంటారు!
Published : June 27, 2025 at 11:03 AM IST
Healthy Snack Recipe for Kids : వాతావరణం కూల్గా ఉన్నప్పుడు, చల్లని సాయంకాలం వేళ అలా టీ తాగుతూ పక్కన ఏదైనా వేడి వేడి స్నాక్ ఉంటే ఎలా ఉంటుంది? ఈ ఊహ గుర్తుకు వస్తేనే నోరూరిపోతుంది కదా! అందులోనూ గరంగరం 'పకోడీలు' అయితే ప్రత్యేకంగా చెప్పాల్సిన పనిలేదు. ఈ క్రమంలోనే చాలా మంది ఈవెనింగ్ టైమ్లో ఎక్కువగా ఉల్లిపాయ పకోడీలను ప్రిపేర్ చేసుకుంటుంటారు. కానీ, ఎప్పుడూ అవే తినాలంటే కాస్త బోరింగ్గా అనిపిస్తుంది. అందుకే, మీకోసం ఒక వైరెటీ రెసిపీని తీసుకొచ్చాం. అదే, కరకరలాడే "సేమియా కరివేపాకు పకోడీ". ఇలా పిండిని కలిపి వీటిని ప్రిపేర్ చేసుకున్నారంటే క్రిస్పీగా, సూపర్ టేస్టీగా వస్తాయి. అలాగే, నూనె కూడా తక్కువే పీల్చుకుంటాయి! పైగా కరివేపాకుతో చేసినవి కాబట్టి ఈ పకోడీ ఆరోగ్యానికి కూడా మేలు చేస్తుంది! మరి, ఈ సూపర్ టేస్టీ కరకరలాడే పకోడీని ఎలా చేసుకోవాలో ఇప్పుడు చూద్దాం.
తీసుకోవాల్సిన పదార్థాలు :
- సేమియా - ఒక కప్పు
- కరివేపాకు - గుప్పెడు
- శనగపిండి - అర కప్పు
- బియ్యప్పిండి - పావు కప్పు
- ఉల్లిపాయలు - రెండు(చిన్నవి)
- పచ్చిమిర్చి - నాలుగు
- ఉప్పు - రుచికి సరిపడా
- కారం - తగినంత
- జీలకర్ర - ఒకటీస్పూన్
- పసుపు - పావుటీస్పూన్
- నూనె - వేయించడానికి సరిపడా
ఇంట్లో చేసిన బజ్జీలు నూనె పీల్చుతున్నాయా? - ఓసారి ఇలా చేయండి - చుక్క ఆయిల్ ఉండదు!
తయారీ విధానం :
- ఈ క్రిస్పీ అండ్ టేస్టీ స్నాక్ రెసిపీ కోసం ముందుగా స్టవ్ మీద పాన్లో సేమియా, తగినన్ని నీళ్లు పోసుకొని కలిపి మరీ మెత్తగా కాకుండా కొంచెం పలుకు ఉండేలా 90% వరకు ఉడికేలా కుక్ చేసుకోవాలి.
- సేమియా ఉడికే లోపు రెసిపీలోకి కావాల్సిన కరివేపాకుని శుభ్రంగా కడిగి సన్నగా కట్ చేసుకోవాలి. అలాగే, ఉల్లిపాయలను సన్నగా, పొడుగ్గా, పచ్చిమిర్చిని సన్నగా తరుక్కొని పక్కనుంచాలి.
- ఇప్పుడు సేమియా చక్కగా ఉడికిందనుకున్నాక స్టవ్ ఆఫ్ చేసుకొని దాన్ని ఒక గిన్నెపై స్టెయినర్ ఉంచి వేడి నీటిని వడకట్టుకోవాలి.
- తర్వాత ఆ వేడికి సేమియా మరింత మెత్తగా అయిపోకుండా వెంటనే దానిపై కొద్దిగా చల్లని నీటిని పోసి వడకట్టాలి.
- ఆపై సేమియాలోని వాటర్ మొత్తం పోయి పూర్తిగా చల్లారి పొడిపొడిగా అయ్యాక ఒక ప్లేట్లోకి తీసుకొని పక్కనుంచాలి.
- ఇప్పుడు ఒక మిక్సింగ్ బౌల్ తీసుకొని అందులో కట్ చేసి పెట్టుకున్న ఉల్లిపాయ, కరివేపాకు, పచ్చిమిర్చి తరుగు, శనగపిండి, బియ్యప్పిండి, జీలకర్ర, పసుపు, కారం, రుచికి సరిపడా ఉప్పు వేసుకోవాలి.
- తర్వాత అందులోనే ఉడికించి పక్కన పెట్టుకున్న సేమియాను వేసుకొని ఒకసారి మొత్తం కలిసేలా కలుపుకోవాలి. పిండిని కలిపేటప్పుడు సేమియాలో ఉండే తేమకే అది మొత్తం చక్కగా కలిసిపోతుంది.
- ఒకవేళ పిండి పొడిపొడిగా ఉన్నట్లు కనిపిస్తే కొద్దిగా వాటర్ వేసి కలుపుకోవాలి. అయితే, పిండి కన్సిస్టెన్సీ అనేది మరీ జారుగా కాకుండా కాస్త గట్టిగానే ఉండేలా చూసుకోవాలి.
- ఇప్పుడు పకోడీ తయారీ కోసం స్టవ్ మీద కడాయి పెట్టుకొని డీప్ ఫ్రైకి తగినంత నూనె పోసుకోవాలి.
- ఆయిల్ వేడయ్యాక ముందుగా కలిపి పెట్టుకున్న పిండిని చేతిలోకి కొద్దికొద్దిగా తీసుకుంటూ కాగుతున్న నూనెలో పకీడీలా వేసుకోవాలి.
- ఆపై స్టవ్ను మీడియం టూ హై ఫ్లేమ్కి అడ్జస్ట్ చేసుకుంటూ వేయించుకోవాలి. అయితే, పకోడీ వేయగానే వెంటనే కదపకుండా కాస్త కాలిన తర్వాత చిల్లుల గరిటెతో తిప్పుతూ రెండు వైపులా లైట్ బ్రౌన్ కలర్ వచ్చే వరకు వేయించాలి.
- ఆవిధంగా వేయించుకున్నాక టిష్యూ పేపర్ ఉన్న ప్లేట్లోకి తీసుకొని కాసేపు ఉంచి వేడి వేడిగా సర్వ్ చేసుకోండి. అంతే, కరకరలాడే కమ్మని "సేమియా పకోడీ" రెడీ!
చిట్కాలు :
- ఇక్కడ పిండిని తయారు చేసుకునేటప్పుడు మరీ జారుడుగా కాకుండా కాస్త గట్టిగానే ఉండేలా కలుపుకోవాలి.
- ఈ రెసిపీలో కాస్త బియ్యప్పిండిని యాడ్ చేసుకోవడం ద్వారా పకోడీ క్రిస్పీగా కరకరలాడుతూ వస్తుంది.
- నూనె కాగిన తర్వాత మాత్రమే పకోడీ వేసి వేయించుకోవాలి. అలాగే, లో ఫ్లేమ్లో వేయించుకున్నా ఇది ఆయిల్ ఎక్కువగా పీల్చుకుంటుందని గుర్తుంచుకోవాలి.
