Healthy Breakfast Noodles Idli: బ్రేక్ఫాస్ట్లో వేడివేడి ఇడ్లీలను పల్లీ చట్నీతో తినడానికి చాలా మంది ఇష్టపడుతుంటారు. లైట్గా ఉండి ఆరోగ్యానికి మేలు చేస్తుండటంతో ఎక్కువ మంది వీటిని తినేందుకు ఇంట్రస్ట్ చూపిస్తుంటారు. అయితే ఇడ్లీలు చేయాలంటే కాస్త కష్టపడాల్సిందే. ఎందుకంటే ముందురోజే పప్పు నానబెట్టి గ్రైండ్ చేసి, రవ్వ కలిపి పక్కన ఉంచాలి. ఇదంతా చేయడానికి కాస్త టైమ్ ఎక్కువ పడుతుంది. అలాగే ఎప్పుడూ ఒకే రకంగా ఇడ్లీలు చేసి పెడితే పిల్లలే కాదు పెద్దలూ తినడానికి ఆసక్తి చూపించరు. అందుకే ఓసారి వారికి నచ్చేలా నూడుల్స్ ఇడ్లీ చేయండి. చూడటానికి ఆకర్షణీయంగా ఉండటమే కాకుండా రుచి కూడా అద్భుతంగా ఉంటుంది. పైగా దీని కోసం పప్పులు నానబెట్టాల్సిన పనిలేదు. కేవలం బియ్యప్పిండితోనే చేసుకోవచ్చు. మరి లేట్ చేయకుండా పిల్లలకు నచ్చేలా నూడుల్స్ ఇడ్లీలు ఎలా చేయాలో చూసేయండి.
కావాల్సిన పదార్థాలు:
- నీరు - ఒకటింపావు కప్పు
- ఉప్పు - రుచికి సరిపడా
- నూనె - 1 టీస్పూన్
- బియ్యప్పిండి - 1 కప్పు
తయారీ విధానం:
- స్టవ్ ఆన్ చేసి పాన్ పెట్టి నీళ్లు పోసుకోవాలి. అందులో రుచికి సరిపడా ఉప్పు, నూనె వేసి కలిపి మరిగించాలి.
- వాటర్ మరుగుతున్నప్పుడు పొడి బియ్యప్పిండిని కొద్దికొద్దిగా వేసుకుంటూ ఉండలు లేకుండా కలుపుకోవాలి.
- పిండి మొత్తాన్ని బాగా కలుపుకున్న తర్వాత స్టవ్ ఆఫ్ చేసి మూత పెట్టి ఓ 10 నిమిషాలు పక్కన పెట్టాలి.
- ఈలోపు ఇడ్లీ ప్లేట్స్కు లైట్గా ఆయిల్ అప్లై చేసుకోవాలి. అలాగే మురుకుల గొట్టం లోపల భాగానా నూనె రాసి సన్న కారప్పూస చేయడానికి ఉపయోగించే అచ్చును సెట్ చేసుకోవాలి.
- బియ్యప్పిండి గోరువెచ్చగా ఉన్నప్పుడు చేతితో వత్తుకుంటూ సాఫ్ట్గా ముద్దలాగా కలుపుకోవాలి.
- ఇప్పుడు కొద్దిగా పిండి తీసుకుని మురుకుల గొట్టంలో పెట్టి క్లోజ్ చేసుకోవాలి. ఆ తర్వాత ఇడ్లీ ప్లేట్స్ మీద రౌండ్గా వత్తుకోవాలి(కింద ఫొటోలో చూపించినట్లుగా). ఇలా పిండి మొత్తాన్ని నూడుల్స్గా వత్తుకోవాలి.
- స్టవ్ ఆన్ చేసి ఇడ్లీ పాత్ర పెట్టి అందులో రెండు కప్పుల నీరు పోయాలి. ఆ నీటిలో ఇడ్లీ ప్లేట్స్ ఉంచి మూత పెట్టి మీడియం ఫ్లేమ్లో సుమారు 8 నుంచి 10 నిమిషాల పాటు కుక్ చేసుకోవాలి.
- ఇడ్లీలు ఉడికిన తర్వాత స్టవ్ ఆఫ్ చేసి ఓ 5 నిమిషాలు అలానే ఉంచాలి. ఆ తర్వాత మూత తీసి ప్లేట్లోకి వేసుకుని స్పైసీగా ఉండే చట్నీ లేదా నాన్వెజ్ లేదా వెజ్ కర్రీతో సర్వ్ చేసుకుంటే సూపర్ టేస్టీ అండ్ హెల్దీ నూడుల్స్ ఇడ్లీ రెడీ. నచ్చితే మీరూ ట్రై చేయండి.
చిట్కాలు:
- ఈ రెసిపీ కోసం పొడి బియ్యప్పిండి వాడాలి. అలాగే బియ్యప్పిండిని మరీ ఉడికించాల్సిన అవసరం లేదు. కేవలం మరుగుతున్న నీటిలో వేసి కలిపి స్టవ్ ఆఫ్ చేసి మూత పెట్టి చల్లారనిస్తే సరిపోతుంది. ఎందుకుంటే గిన్నె వేడికే పిండి ఉడుకుతుంది.
- పిండిని ఇడ్లీ ప్లేట్స్లోకి వత్తుకునేటప్పుడు మరీ మందంగా, మరీ పల్చగా కాకుండా చూసుకోవాలి.
తప్పక తినాల్సిన పాతకాలం నాటి "తిమ్మనం" - నోట్లో వేసుకోగానే ఐస్క్రీమ్లా కరిగిపోతుంది!
పల్లీలు, చుక్క నూనె లేకుండానే - టిఫెన్స్లోకి "సూపర్ చట్నీ"! - కేవలం 5 నిమిషాల్లో రెడీ!
