ఆంజనేయుడు మెచ్చే "బెల్లం అప్పాలు" - రేపు స్వామి జయంతి వేళ ఇలా చేసి నైవేద్యంగా పెట్టండి!

మారుతికి ఇష్టమైన బెల్లం అప్పాలు ఇలా సులువుగా చేయండి!

Hanuman Jayanti Special Bellam Appalu: రాముల వారి ప్రియ భక్తుడు, అంజనీపుత్రుడు హనుమాన్​ జయంతిని ఏటా చైత్ర మాసం శుక్ల పక్షం పౌర్ణమి రోజున జరుపుకుంటాం. ఈసారి మారుతి జయంతి ఏప్రిల్​ 12వ తేదీ శనివారం వచ్చింది. ఈ రోజున స్వామిని సింధూరం, తమలపాకు దండలతో పూజించి నైవేద్యంగా పండ్లు సమర్పిస్తారు. వీటితో పాటు మినప్పప్పుతో చేసిన వడలను మాలగా వేసి బెల్లం అప్పాలను నైవేద్యంగా పెడుతుంటారు.

బెల్లం అప్పాలు చాలా రుచికరంగా ఉంటాయి. కేవలం నిమిషాల్లో ప్రిపేర్​ చేసుకునే వీటిని పిల్లల నుంచి పెద్దలు వరకు చాసా ఇష్టంగా తింటారు. అతి తక్కువ పదార్థాలతో ఎంతో రుచికరంగా తయారు చేసుకోవచ్చు. మరి లేట్​ చేయకుండా హనుమంతుడికి ఇష్టమైన బెల్లం అప్పాలు ఎలా చేయాలో ఈ స్టోరీలో చూసేద్దాం రండి.

Bellam Appalu (ETV Bharat)

కావాల్సిన పదార్థాలు:

• పొడి బియ్యప్పిండి - 1 కప్పు
• గోధుమ పిండి - 1 కప్పు
• బెల్లం తురుము - 2 కప్పులు
• బొంబాయి రవ్వ - అర కప్పు
• ఉప్పు - చిటికెడు
• నెయ్యి - పావు కప్పు
• నూనె - వేయించడానికి సరిపడా
• యాలకుల పొడి - కొద్దిగా

Bellam Appalu (ETV Bharat)

తయారీ విధానం:

• ఓ బౌల్​లోకి బియ్యప్పిండి, గోధుమపిండి, బొంబాయి రవ్వ, ఉప్పు, యాలకుల పొడి వేసుకుని బాగా మిక్స్​ చేసుకుని పక్కన పెట్టాలి.
• స్టవ్​ ఆన్​ చేసి మందపాటి గిన్నె పెట్టి రెండున్నర కప్పుల నీళ్లు పోసుకోవాలి. అంటే తీసుకునే పిండికి సమానంగా నీళ్లను తీసుకోవాలి.
• ఆ నీటిలోకి బెల్లం తురుము వేసుకుని కలుపుతూ కరిగించాలి. బెల్లం పూర్తిగా కరిగిన స్టవ్​ ఆఫ్​ చేసి వడకట్టాలి.
• స్టవ్​ ఆన్​ చేసి మరో పాన్​ పెట్టి వడకట్టిన బెల్లం నీటిని పోసుకుని మరిగించుకోవాలి. నీరు మరుగుతున్నప్పుడు ముందే కలుపుకున్న పిండి మిశ్రమాన్ని కొద్దికొద్దిగా పోసుకుంటూ ఉండలు లేకుండా మిక్స్ చేసుకోవాలి.
• పిండి మొత్తం పాకంలో కలిసే విధంగా కలిపిన తర్వాత స్టవ్​ ఆఫ్​ చేసి మూత పెట్టి చల్లార్చుకోవాలి.

Rice Flour (Getty Images)

• 15 నిమిషాల తర్వాత పిండిలో కొద్దిగా నెయ్యి వేసుకుని సుమారు 5 నిమిషాల పాటు చపాతీ పిండిలా సాఫ్ట్​గా కలుపుకోవాలి.
• స్టవ్​ ఆన్​ చేసి కడాయి పెట్టి డీప్​ ఫ్రైకి సరిపడా నూనె పోసి వేడి చేసుకోవాలి. నూనె కాగేలోపు కలిపిన పిండిని కొద్దికొద్దిగా తీసుకుంటూ గుండ్రంగా చేసుకుని లైట్​గా అప్పాలుగా వత్తుకోవాలి. ఇలా పిండి మొత్తాన్ని ప్రిపేర్​ చేసుకోవాలి.
• ఇలా చేసుకున్న వాటిని కాగుతున్న నూనెలో వేసుకుని మీడియం ఫ్లేమ్​లో రెండు వైపులా ఎర్రగా కాల్చుకోవాలి.
• రెండు వైపులా కాలిన తర్వాత ఒక్కొక్కటి తీస్తూ మరో గరిటెతో లైట్​గా ప్రెస్​ చేసి ఓ బౌల్​లోకి తీసుకోవాలి. ఇలా అప్పాలను కాల్చుకున్న తర్వాత దేవుడికి నైవేద్యంగా పెట్టుకుంటే సరి.

Jaggery (Getty Images)

టిప్స్​:

• పిండిని ఎంత ఎక్కువ సేపు కలుపుకుంటే అప్పాలు అంత సాఫ్ట్​గా వస్తాయి.
• పిండిని అప్పాలుగా చేసుకునేటప్పుడు క్రాక్స్​ లేకుండా వత్తుకోవాలి. లేదంటే నూనెలో వేసినప్పుడు పేలే అవకాశం ఉంటుంది.
• ఈ అప్పాలకు పాకం పట్టాల్సిన అవసరం లేదు. కేవలం మరిగించుకుంటే చాలు.