ఎండల్లో నోట్లోకి కమ్మగా వెళ్తుంది! - గుంటూరు స్టైల్​ "టమాటా రసం" - జుర్రుకోవాల్సిందే!

Guntur Style Tomato Rasam Recipe: ఎండాకాలంలో చాలా మంది లిక్విడ్​ ఫుడ్స్​కు ఓటేస్తారు. ఈ క్రమంలోనే అమ్మలందరూ తమ ఇంట్లో వారి కోసం రసం, చారు, సాంబార్​ అంటూ రకరకాల వంటలు చేస్తుంటారు. వీటన్నింటిలో పిల్లలకు విపరీతంగా నచ్చేది టమాటా రసం. కరెక్ట్​గా చేయాలేగానీ ఏకంగా తాగేస్తారు. అయితే ఎక్కువ మందికి ఈ టమాటా రసం చేయడం రాదు. అలాంటివారు ఫీల్​ అవ్వాల్సిన అవసరమే లేదు. ఈ కొలతలతో గుంటూరు స్టైల్లో టమాటా రసం పెట్టి చూడండి. పిల్లలు మళ్లీ మళ్లీ ఇలానే చేయమని గోల చేస్తారు. మరి లేట్​ చేయకుండా ఈ టమాటా రసం ఎలా చేయాలో ఇప్పుడు చూద్దాం.

కావాల్సిన పదార్థాలు:

• టమాటాలు - 4
• చింతపండు - నిమ్మకాయ సైజ్​
• పసుపు - 1 టీ స్పూన్​
• ఉప్పు - రుచికి సరిపడా

రసం పొడి కోసం:

• కందిపప్పు - 2 టేబుల్​ స్పూన్లు
• జీలకర్ర - అర టీ స్పూన్​
• మెంతులు - చిటికెడు
• ధనియాలు - అర టేబుల్​ స్పూన్​
• ఎండుమిర్చి -5
• మిరియాలు - 1 టీ స్పూన్​

తాలింపు కోసం:

• నూనె - 1 టేబుల్​ స్పూన్​
• నెయ్యి - 1 టీ స్పూన్​
• జీలకర్ర - అర టీ స్పూన్​
• ఆవాలు - అర టీ స్పూన్​
• వెల్లుల్లి రెబ్బలు - 10
• ఎండుమిర్చి - 4
• ఇంగువ - పావు టూ స్పూన్​
• కరివేపాకు - 2 రెమ్మలు
• కొత్తిమీర తరుగు - కొద్దిగా

తయారీ విధానం:

• టమాటాలను శుభ్రంగా కడిగి మీడియం సైజ్​లో ముక్కలుగా కట్​ చేసుకోవాలి. ఓ గిన్నెలోకి టమాటా ముక్కలు, చింతపండు, 1 టీ స్పూన్​ ఉప్పు, పసుపు, 2 గ్లాసుల నీరు పోసి కలిపి స్టవ్​ మీద పెట్టుకోవాలి.
• మీడియం ఫ్లేమ్​లో టమాటాల్లోని నీరు సగం అయ్యే వరకు ఉడికించుకోవాలి.
• ఈలోపు రసం పొడి ప్రిపేర్​ చేసుకోవాలి. అందుకోసం మిక్సీజార్​లోకి కందిపప్పు, జీలకర్ర, ఎండుమిర్చి, మెంతులు, ధనియాలు, మిరియాలు వేసి మెత్తగా గ్రైండ్​ చేసుకుని పక్కన పెట్టాలి.
• టమాటా ముక్కలు మెత్తగా మగ్గిన తర్వాత స్టవ్​ ఆఫ్​ చేసి పూర్తిగా చల్లారినివ్వాలి. చల్లారిన తర్వాత ముక్కలను చేతితో మెదుపుకోవాలి. ఆ తర్వాత ఈ రసాన్ని వడకట్టి, టమాటా ముక్కలను పడేసుకోవాలి.
• ఇలా వడకట్టిన రసాన్ని ఓ గిన్నెలోకి తీసుకుని పులుపుకు తగినట్లుగా నీళ్లు పోసుకోవాలి. ఆ తర్వాత గ్రైండ్​ చేసిన పొడి ఓ మూడు టేబుల్​ స్పూన్లు, రుచికి సరిపడా ఉప్పు వేసి కలిపి రుచి చూడాలి. ఉప్పు, కారం సరిపోతే ఏమి లేదు. లేదంటే మరికొంచెం యాడ్​ చేసుకోవాలి.
• స్టవ్​ ఆన్​ చేసి ఈ రసం గిన్నెను పెట్టుకుని మీడియం ఫ్లేమ్​లో 5 నిమిషాల పాటు మరిగించుకోవాలి. రసం మరిగిన తర్వాత సిమ్​లో పెట్టి మరికొద్దిసేపు మరిగించాలి.
• ఈలోపు మరో స్టవ్​ ఆన్​ చేసి కడాయి పెట్టి నూనె, నెయ్యి వేసుకోవాలి. కాగిన తర్వాత ఆవాలు, జీలకర్ర వేసి చిటపటలాడించాలి. అనంతరం దంచిన వెల్లుల్లి రెబ్బలు, ఎండుమిర్చి వేసి మరికొంచెంసేపు వేయించాలి.
• చివరగా ఇంగువ, కరివేపాకు వేసి కలిపి మగ్గించిన తర్వాత స్టవ్​ ఆఫ్​ చేయాలి. అనంతరం ఈ తాలింపు మరుగుతున్న రసంలో పోసి కలిపి మరో 5 నిమిషాలు మగ్గించాలి.
• చివరకు కొత్తిమీర తరుగు వేసి కలిపి స్టవ్​ ఆఫ్​ చేసుకుని సర్వ్​ చేసుకుంటే ఘుమఘుమలాడే గుంటూరు స్టైల్​ టమాటా రసం రెడీ. నచ్చితే మీరూ ట్రై చేయండి.

సమ్మర్ డిష్ : మామిడి అల్లం చారు - తింటే వహ్వా వహ్వా అంటారు మీరు!

మురుగన్ "నిమ్మ చారు" - దెబ్బకి ఒంట్లో పైత్యం మొత్తం వదిలిపోద్ది - జుర్రేస్తారంతే!