మరమరాలతో "గుంత పొంగనాలు" - అప్పటికప్పుడు చేసుకోవచ్చు - ఇడ్లీ, దోశ పిండితో పనిలేదు!

Gunta Ponganalu with Puffed Rice: గుంత పొంగనాలు అంటే చాలా మందికి ఇష్టం. తక్కువ ఆయిల్​తో టేస్టీగా ప్రిపేర్​ చేసుకునే వీటిని పిల్లల నుంచి పెద్దల వరకు ఇష్టంగా తింటారు. అందుకే చాలా మంది ఇంట్లో ఇడ్లీ లేదా దోశ పిండి ఉంటే అప్పటికప్పుడు ఉల్లిపాయ, పచ్చిమిర్చి వంటివన్నీ మిక్స్​ చేసేసి పొంగనాలు వేస్తుంటారు. అయితే ఇకపై ఇంట్లో పిండి లేనప్పుడు కూడా ఎంచక్కా గుంత పొంగనాలు చేసుకోవచ్చు. అందుకోసం మరమరాలు ఉంటే సరిపోతుంది. మీరు విన్నది నిజమే. ముంత మసాలా కోసం ఉపయోగించే మరమరాలతో రుచికరమైన పొంగనాలు చేసుకోవచ్చు. ప్రిపరేషన్​ చాలా ఈజీ. మరి లేట్​ చేయకుండా కమ్మని, రుచికరమైన మరమరాల గుంత పొంగనాలు ఎలా చేసుకోవాలో చూసేయండి.

మరమరాలు (Getty Images)

కావాల్సిన పదార్థాలు:

• బొంబాయి రవ్వ - అర కప్పు
• పెరుగు - 2 టేబుల్​స్పూన్లు
• మరమరాలు - 2 కప్పులు
• ఉల్లిపాయ - 1
• క్యారెట్​ - 1
• పచ్చిమిర్చి - 2
• కరివేపాకు - 2 రెమ్మలు
• కొత్తిమీర తరుగు - కొద్దిగా
• ఉప్పు - రుచికి సరిపడా
• జీలకర్ర - అర టీస్పూన్​
• బేకింగ్​ సోడా - పావు టీస్పూన్​

రవ్వ (Getty Images)

తయారీ విధానం:

• మిక్సింగ్​ బౌల్​లోకి బొంబాయి రవ్వ, పెరుగు తీసుకుని ఓసారి కలపాలి. ఆ తర్వాత పావు కప్పు వాటర్​ను కొద్దికొద్దిగా పోసుకుంటూ పిండిని మిక్స్​ చేసుకుని కొద్దిసేపు పక్కన పెట్టాలి.
• ఈలోపు ఉల్లిపాయ, పచ్చిమిర్చి, కరివేపాకు, కొత్తిమీరను వీలైనంత సన్నగా కట్​ చేసుకోవాలి. అలాగే క్యారెట్​పై పొట్టు తీసేసి సన్నగా తురుముకోవాలి.

పెరుగు (Getty Images)

• ఓ గిన్నెలోకి మరమరాలు తీసుకుని తగినన్ని వాటర్​ పోసి ఓసారి కలిపి 5 నిమిషాలు నాననివ్వాలి.
• మరమరాలు మెత్తగా అయిన తర్వాత కొద్దికొద్దిగా తీసుకుంటూ నీటిని గట్టిగా పిండేసి మిక్సీజార్​లోకి తీసుకోవాలి. అన్నింటిని ఇలానే పిండి తీసుకోవాలి.
• అదే మిక్సీజార్​లోకి నానబెట్టిన రవ్వ మిశ్రమం వేసి వీలైనంత మెత్తగా గ్రైండ్​ చేసి గిన్నెలోకి తీసుకుని అంతా కలిసేలా మిక్స్​ చేసుకోవాలి.
• ఇప్పుడు మరమరాలు, రవ్వ మిశ్రమంలోకి ముందుగానే కట్​ చేసుకున్న ఉల్లి, పచ్చిమిర్చి, కరివేపాకు, కొత్తిమీర తరుగు, క్యారెట్​ తురుము, జీలకర్ర, రుచికి సరిపడా ఉప్పు వేసి పదార్థాలు అన్నీ కలిసేలా మిక్స్​ చేసుకోవాలి.

ఉల్లిపాయలు (Getty Images)

• చివరగా బేకింగ్​ సోడా వేసి మరోసారి కలిపి పక్కన ఉంచాలి.
• స్టవ్​ ఆన్​ చేసి గుంత పొంగనాల పాన్​ పెట్టి వాటిల్లో నూనె పోసుకోవాలి. నూనె కాగిన తర్వాత ప్రిపేర్​ చేసుకున్న పిండిని కొద్దికొద్దిగా వేసుకోవాలి.
• పాన్​కు సరిపడా వేసుకున్న తర్వాత మంటను లో టూ మీడియం ఫ్లేమ్​లో పెట్టి మూత ఉంచి కుక్​ చేసుకోవాలి.

కొత్తిమీర (Getty Images)

• పొంగనాలు ఓవైపు ఎర్రగా కాలిన తర్వాత రెండో వైపు తిప్పి కాల్చుకోవాలి. ఇలా రెండు వైపులా కాలిన వాటిని ప్లేట్​లోకి తీసుకోవాలి. మిగిలిన పిండితో కూడా ఇలానే పొంగనాలు వేసుకోవాలి.
• ఈ విధంగా ప్రిపేర్​ చేసుకున్న వాటిని ప్లేట్​లోకి తీసుకుని పల్లీ చట్నీ లేదా కొబ్బరి పచ్చడితో సర్వ్​ చేసుకుంటే ఎంతో టేస్టీగా ఉండే మరమరాల గుంత పొంగనాలు రెడీ.

గుంత పొంగనాలు (ETV Bharat)

చిట్కాలు:

• మరమరాలు మరీ ఎక్కువ సేపు నీటిలో నానాల్సిన పనిలేదు. ఎక్కువసేపు నానితే మరీ మెత్తగా అవ్వడంతో పాటు నీటిని కూడా ఎక్కువ పీల్చుకుంటాయి. దీంతో గ్రైండ్​ చేసినప్పుడు మిశ్రమం లూజ్​గా మారే అవకాశం ఉంటుంది.
• పుల్లటి పెరుగు అయితే పొంగనాల రుచి బాగుంటుంది. అలాగే బొంబాయి రవ్వ లేకపోతే దాని ప్లేస్​లో సేమ్యా అయినా వాడుకోవచ్చు.
• కేవలం ఉల్లిపాయ, క్యారెట్​ మాత్రమే కాకుండా క్యాబేజీ, క్యాప్సికం సహా మీకు నచ్చిన కూరగాయలను సన్నగా తరిగి వాడుకోవచ్చు.

సండే స్పెషల్​ "బగారా రైస్​ విత్​ చికెన్​ కర్రీ" - ఈ పద్ధతిలో చేస్తే రుచికి ఫిదా అవ్వాల్సిందే!

చేదు లేకుండా టేస్టీ "కాకరకాయ కారం"! - నెల రోజులు నిల్వ!