కూరల్లో అన్నీ వేసినా రుచి రావట్లేదా? - ఈ పొడి ఒక్క స్పూన్ వేస్తే చాలు ఘుమఘుమలాడిపోతుంది!

కర్రీ ఏదైనా, ఎలా చేసినా చివర్లో ఈ పొడి స్పూన్​ వేయండి - రుచి అద్దిరిపోతుంది

Flaxseeds Karam Podi in Telugu : చూడడానికి చిన్నగా ముదురు గోధుమ రంగులో కనిపించే అవిసె గింజల్లో ఎన్నో రకాల పోషకాలున్నాయని నిపుణులు చెబుతున్నారు. చాలా మంది వీటి ప్రయోజనాలు తెలిసి వేయించి పొడి చేసి లడ్డూలు చుట్టుకుంటారు. పిల్లలు, పెద్దలందరూ ఈ అవిసె గింజల లడ్డూలు ఇష్టంగా తింటారు. ఇప్పుడు మనం సింపుల్​గా అవిసె గింజలతో కూర కారం ఎలా చేయాలో తెలుసుకుందాం. ఇలా అవిసె గింజల కారం పొడి తయారు చేసుకుంటే ఎంతో కమ్మగా ఉంటుంది. ఆలూ కర్రీ, వంకాయ, బెండకాయ, దొండకాయ వేపుడు చేసినప్పుడు చివర్లో గరం మసాలా, ధనియాల పొడి వేయకుండా ఓ స్పూన్ ఈ కారం పొడి వేసుకుంటే సరిపోతుంది. ఈ కారం పొడి టిఫిన్స్​లోకి కూడా తినొచ్చు.

Flaxseeds (Getty Images)

కావాల్సిన పదార్థాలు

• అవిసె గింజలు - కప్పు (100 గ్రాములు)
• ఎండు మిరపకాయలు - 20
• ఉప్పు - రుచికి సరిపడా
• వెల్లుల్లి రెబ్బలు - 20
• శనగపప్పు - పావు కప్పు
• మినప్పప్పు -పావు కప్పు
• ధనియాలు - పావు కప్పు
• టేబుల్​స్పూన్ - జీలకర్ర
• చింతపండు - ఉసిరికాయంత
• నూనె - సరిపడా

Flaxseeds Karam Podi (ETV Bharat)

తయారీ విధానం :

• ముందుగా స్టవ్​పై పాన్​ పెట్టి 2 టేబుల్​స్పూన్లు ఆయిల్​ వేసి వేడి చేయండి. ఆయిల్​ వేడయ్యాక కప్పు అవిసె గింజలు వేసి దోరగా వేయించండి. అవిసె గింజలు హై ఫ్లేమ్​లో కాకుండా సిమ్​లో పెట్టి నిదానంగా వేపండి. అవిసె గింజలు చక్కగా వేయించుకున్న తర్వాత వాటిని ఒక ప్లేట్లోకి తీసుకోండి.
• ఇప్పుడు అదే పాన్​లో మరొక టేబుల్​స్పూన్ ఆయిల్​ వేసి వేడి చేయండి. ఆయిల్​ వేడయ్యాక పావు కప్పు చొప్పున మినప్పప్పు, శనగపప్పు, ధనియాలు వేసి దోరగా ఫ్రై చేసుకోండి. ఇలా వేయించుకున్న పప్పుల మిశ్రమాన్ని అవిసె గింజల ప్లేట్లోకి తీసుకోండి.

Flaxseeds Karam Podi (ETV Bharat)

• అదే పాన్​లో ఎండుమిర్చి, టేబుల్​స్పూన్ జీలకర్ర వేసి దోరగా వేయించి తర్వాత ప్లేట్లోకి తీసుకోండి.
• ఇవన్నీ చల్లారిన తర్వాత మిక్సీ గిన్నెలోకి వేయించిన ఆవిసె గింజలు, పప్పులు మిశ్రమం, రుచికి సరిపడా ఉప్పు, చింతపండు వేసి మెత్తగా పొడి చేసుకోండి.
• అయితే, ఇక్కడ మీరు ఇడ్లీ, ఉప్మా, దోసె వంటి టిఫిన్స్​లోకి కాస్త బరకగా గ్రైండ్​ చేసుకోవాలి. అలాగే మీరు కూరల్లోకి కారం వేయాలనుకుంటే మెత్తగా పొడి చేసుకుంటే సరిపోతుంది.

Flaxseeds Karam Podi (ETV Bharat)

• చివరిగా అదే మిక్సీ గిన్నెలో గిన్నెలో వెల్లుల్లి వేసి కచ్చాపచ్చాగా గ్రైండ్ చేసుకోండి.
• అంతే ఇలా ఈజీగా ప్రిపేర్​ చేసుకుంటే రుచికరమైన అవిసె గింజల కారం పొడి రెడీ!

Flaxseeds Karam Podi (ETV Bharat)

• ఉదయాన్నే ఇడ్లీలు చేసుకున్నప్పుడు చట్నీ చేసుకునే టైమ్​ లేనప్పుడు రెండు చుక్కలు నెయ్యి వేసుకొని ఈ కారం పొడితో తింటే సరిపోతుంది.
• ఈ అవిసె గింజల కారం పొడిని ఎయిర్​టైట్​ బాక్స్​లో స్టోర్​ చేసుకొని ఫ్రిడ్జ్​లో పెట్టుకుంటే రెండు నెలలపాటు నిల్వ ఉంటుంది!