పాతకాలం నాటి "దోసకాయ చికెన్" - ఉల్లిపాయలు అవసరం లేదు! - ఘుమఘుమలాడిపోద్ది!
- దోసకాయతో పప్పు, పచ్చడి, కూర కాకుండా చికెన్తో కలిపి చేయండి! - అద్భుతమైన రుచితో తినేకొద్దీ తినాలనిపిస్తుంది!
Published : June 13, 2025 at 1:29 PM IST
Dosakaya Chicken Curry: ఆదివారం వచ్చిందంటే ఇంట్లో తప్పకుండా నాన్వెజ్ ఉండాల్సిందే. అందులోనూ చికెన్ అంటే ఇక చెప్పాల్సిన పనిలేదు. ఎన్ని రకాలుగా వీలుంటే అన్ని పద్ధతుల్లో చికెన్ను వండుకుని తింటుంటారు. మరి మీరు ఎప్పుడైనా చికెన్ను దోసకాయతో కలిపి తిన్నారా? లేకపోతే ఓసారి ట్రై చేయండి. ఘుమఘుమలాడే వాసనతో ఎంత తింటున్నామో తెలియకుండా తినేస్తారు. ఈ రెసిపీని ఎక్కువగా అమ్మమ్మలు, నానమ్మల కాలంలో చేసేవారు. మంచిగా మసాలాలు వేసే ఈ కూర రుచి చాలా బాగుంటుంది. పైగా చాలా ఈజీగా, మొదటిసారి చేసినా పర్ఫెక్ట్ రుచితో చేసుకోవచ్చు. మరి లేట్ చేయకుండా ఈ పాతకాలం నాటి దోసకాయ చికెన్ను ఎలా చేసుకోవాలో చూసేయండి.
కావాల్సిన పదార్థాలు:
- చికెన్ -1 కేజీ
- నూనె - 100 గ్రాములు
- పసుపు - అర టీస్పూన్
- కారం - సరిపడా
- ఉప్పు - రుచికి తగినంత
- ధనియాలు - 2 టీస్పూన్లు
- వెల్లుల్లి రెబ్బలు - 2
- దాల్చిన చెక్క - కొద్దిగా
- లవంగాలు - 5
- అల్లం ముక్క - చిన్నది
- ఎండు కొబ్బరి ముక్క - కొద్దిగా
- గసగసాలు - 3 టీస్పూన్లు
- దోసకాయ - 1(పెద్దది)
- కొత్తిమీర తరుగు - కొద్దిగా
- కరివేపాకు - 2 రెమ్మలు
తయారీ విధానం:
- ముందుగా చికెన్ను శుభ్రంగా కడిగి జల్లి బుట్టలో వేసి పక్కన ఉంచాలి. కూరకు అవసరమైన దోసకాయను శుభ్రంగా కడిగి మీడియం సైజ్లో ముక్కలుగా కట్ చేసుకుని పక్కన ఉంచాలి.
- మిక్సీజార్లో అల్లం ముక్క, ఎండు కొబ్బరి ముక్క, గసగసాలు వేసి మెత్తగా గ్రైండ్ చేసి ఓ గిన్నెలోకి తీసుకోవాలి.
- అదే మిక్సీజార్లోకి ధనియాలు, లవంగాలు, దాల్చిన చెక్క, వెల్లుల్లి రెబ్బలు వేసి గ్రైండ్ చేసి పక్కన ఉంచాలి.
- స్టవ్ ఆన్ చేసి పాన్ పెట్టి నూనె పోసుకోవాలి. ఆయిల్ హీటెక్కిన తర్వాత పసుపు వేసి కలపాలి. ఆ తర్వాత కరివేపాకు వేసి క్రిస్పీగా వేయించుకోవాలి.
- కరివేపాకు వేగిన తర్వాత క్లీన్ చేసుకున్న చికెన్ను వేసుకుని బాగా కలిపి మూత పెట్టి హై ఫ్లేమ్లో మధ్యమధ్యలో కలుపుతూ 5 నిమిషాల పాటు మగ్గించుకోవాలి.
- చికెన్ ముక్కలు కాస్త నూనెలో మగ్గి నీళ్లు ఊరిన తర్వాత రుచికి సరిపడా కారం, ఉప్పు వేసి ముక్కలకు పట్టేలా కలిపి మరికొద్దిసేపు మగ్గించాలి.
- కారం మగ్గి నూనె పైకి తేలిన తర్వాత ముక్కలు మునిగే వరకు నీరు పోసి బాగా కలపాలి.
- ఆ తర్వాత ముందే గ్రైండ్ చేసి అల్లం గసగసాల పేస్ట్ వేసి మిక్స్ చేసుకుని మూత పెట్టి మీడియం ఫ్లేమ్లో కుక్ చేసుకోవాలి.
- ముక్కలు సగానికి పైగా ఉడికిన తర్వాత కట్ చేసి పెట్టుకున్న దోసకాయ ముక్కలు వేసి మరోసారి కలిపి మూత పెట్టి ఉడికించుకోవాలి.
- చికెన్ ముక్కలు, దోసకాయ ముక్కలు బాగా ఉడికిన తర్వాత ధనియాల మిశ్రమం వేసి మరికొద్దిసేపు ఉడికించుకోవాలి.
- 5 నిమిషాల తర్వాత కొత్తిమీర తరుగు వేసి కలిపి స్టవ్ ఆఫ్ చేసుకుంటే ఎంతో రుచికరంగా ఉండే పాతకాలం నాటి దోసకాయ చికెన్ రెడీ. నచ్చితే మీరూ ట్రై చేయండి.
చిట్కాలు:
- దోసకాయను మరీ మెత్తగా ఉండకూడదు. మెత్తటి దోసకాయ వాడితే కూర మరో రకమైన రుచి వస్తుంది. అలాగే దోసకాయను ముందే మంచిదో,చేదో చూసుకుని కట్ చేసుకోవాలి.
- దోసకాయను మరీ చిన్నగా, మరీ లావుగా కాకుండా మీడియం సైజ్లో కట్ చేసుకోవాలి. చిన్నగా కట్ చేసి మెత్తగా ఉడికి కూర గుజ్జు అవుతుంది, అదే పెద్దగా కట్ చేస్తే సరిగ్గా ఉడకవు.
- చికెన్ ముక్కలను నూనెలో బాగా ఫ్రై చేసిన తర్వాత ఉప్పు, కారం వేసి మగ్గనివ్వాలి.
- ఈ మసాలా పేస్ట్ నుంచి మిక్సీలో కాకుండా రోట్లో నూరితే టేస్ట్ మరింత బాగుంటుంది. అలాగే కూరను కూడా మట్టి పాత్రలో కట్టెల పొయ్యి మీద వండితే వేరే లెవల్.
రుచికరమైన "సగ్గుబియ్యం పూరీలు" - పిండిని ఇలా కలిపితే బాగా పొంగుతాయి! - నూనె పీల్చవు!
టమాటాతో ఎన్నడూ చేయని కొత్తరకం "కర్రీ" - బ్యాచిలర్స్ కూడా ఈజీగా చేసుకోవచ్చు!
