"చింతచిగురు నిల్వ పచ్చడి" - ఈ కొలతలు, టిప్స్ పాటిస్తే సంవత్సరం వరకు పాడవదు - రుచి సూపర్ అంతే!
-చింతచిగురుతో పప్పు కాకుండా ఇలా పచ్చడి పెట్టుకోండి! -వేడివేడి అన్నంలోకి అద్దిరిపోతుంది!
Published : June 1, 2025 at 1:32 PM IST
Chintachiguru Nilva Pachadi: నిల్వ పచ్చళ్లు అంటే మెజార్టీ పీపుల్స్కు మామిడికాయ, టమాటా, నిమ్మకాయతో పెట్టినవి మాత్రమే తెలుసు. కానీ ఎన్నో రకాల పదార్థాలతో రుచికరమైన పచ్చళ్లు కూడా పెట్టుకోవచ్చు. అలాంటి వాటిలో చింతచిగురు ఒకటి. ఈ సీజన్లో పుష్కలంగా లభించే ఈ చిగురుతో చాలా మంది పప్పు చేస్తుంటారు. లేదంటే నాన్వెజ్ వంటకాల్లో ఉపయోగిస్తుంటారు. కానీ ఎప్పుడూ చేసేలా కాకుండా ఓసారి ఇలా నిల్వ పచ్చడి పెట్టండి. చాలా బాగుంటుంది. ఈ పద్ధతిలో, ఈ కొలతల ప్రకారం పెడితే దాదాపు సంవత్సరం పైనే నిల్వ ఉంటుంది. వేడివేడి అన్నంలోకి ఈ పచ్చడి వేసుకుని తింటే అమృతమే. మరి లేట్ చేయకుండా చింతచిగురు నిల్వ పచ్చడి ఎలా చేయాలో చూసేయండి.
కావాల్సిన పదార్థాలు:
- చింతచిగురు - 3 కప్పులు
- వెల్లుల్లి పాయలు - 4
- మెంతులు - పావు టేబుల్స్పూన్
- పల్లీ నూనె - 1 కప్పు
- పసుపు - పావు టీస్పూన్
- ఉప్పు - పావు కప్పు
- కారం - అర కప్పు
తాలింపు కోసం:
- ఆవాలు - 1 టేబుల్ స్పూన్
- శనగపప్పు - 1 టీస్పూన్
- మినప్పప్పు - 1 టీస్పూన్
- జీలకర్ర - 1 టీస్పూన్
- కరివేపాకు - గుప్పెడు
- ఎండుమిర్చి - 2
- ఇంగువ - పావు టీస్పూన్
- నిమ్మకాయలు - 2(మీడియం సైజ్)
తయారీ విధానం:
- ముందుగా లేత చింతచిగురు తీసుకుని అందులో ఉండే పుల్లలు, కాడలు తీసేసుకోవాలి. ఆ తర్వాత ఓ రెండు మూడు సార్లు శుభ్రంగా కడిగి జల్లెడలో వేసుకోవాలి.
- నీరు మొత్తం పోయిన తర్వాత కాటన్ క్లాత్ మీద వేసి తడి పోయేంతవరకు ఫ్యాన్ గాలికి ఆరబెట్టుకోవాలి.
- ఈలోపు వెల్లుల్లి రెబ్పలపై లైట్గా పొట్టు తీసేసి పక్కన ఉంచాలి. స్టవ్ ఆన్ చేసి పాన్ పెట్టి మెంతులు వేసి లో ఫ్లేమ్లో దోరగా వేయించి స్టవ్ ఆఫ్ చేసి పక్కన పెట్టాలి.
- ఇవి చల్లారిన తర్వాత మిక్సీజార్లో వేసి మెత్తని పొడిలా చేసి ఓ గిన్నెలోకి తీసుకోవాలి. అదే మిక్సీజార్లో వెల్లుల్లి రెబ్బలు వేసి కచ్చాపచ్చాగా గ్రైండ్ చేసి తీసుకోవాలి.
- స్టవ్ ఆన్ చేసి పాన్ పెట్టి అర కప్పు నూనె పోసుకోవాలి. నూనె కాగిన తర్వాత కడిగి ఆరబెట్టుకున్న చింతచిగురు వేసి లో ఫ్లేమ్లో మగ్గించుకోవాలి.
- చింతచిగురు మగ్గి నూనె పైకి తేలిన తర్వాత పసుపు వేసి కలిపి మరో 2 నిమిషాలు మగ్గించి స్టవ్ ఆఫ్ చేసి పూర్తిగా చల్లారనివ్వాలి.
- చిగురు మిశ్రమం పూర్తిగా చల్లారిన తర్వాత అందులోకి గ్రైండ్ చేసిన మెంతి పిండి, దంచిన వెల్లుల్లి మిశ్రమం, కారం, ఉప్పు వేసి బాగా కలుపుకోవాలి.
- ఈ పచ్చడికి తాలింపు పెట్టుకోవాలి. అందుకోసం స్టవ్ ఆన్ చేసి మిగిలిన అర కప్పు నూనె పోసుకోవాలి. అంటే మొత్తంగా ఈ పచ్చడి కోసం కప్పు నూనె పడుతుంది.
- కాగిన నూనెలో ఆవాలు, జీలకర్ర, శనగపప్పు, మినపప్పు వేసి లో ఫ్లేమ్లో వేయించుకోవాలి.
- తాలింపు గింజలు ఎర్రగా వేగిన తర్వాత కరివేపాకు, ఎండుమిర్చి వేసి చిటపటలాడించాలి. చివరగా ఇంగువ వేసి వేయించిన తర్వాత చింతచిగురు మిశ్రమం వేసి బాగా కలుపుకుని ఉప్పు, కారం సరిపోయాయో లేదో చూసుకోవాలి. తక్కువైతే యాడ్ చేసుకోవచ్చు. స్టవ్ ఆఫ్ చేయాలి.
- ఈ మిశ్రమం పూర్తిగా చల్లారిన తర్వాత నిమ్మరసం పిండి కలిపి గాజు సీసాలో పెట్టి మూత పెట్టి ఓ రోజు మొత్తం ఊరనివ్వాలి.
- మరుసటి రోజు మూత తీసి కలిపి సర్వ్ చేసుకుంటే కమ్మగా ఉండే చింతచిగురు నిల్వ పచ్చడి రెడీ. నచ్చితే మీరూ ట్రై చేయండి.
చిట్కాలు:
- ఈ పచ్చడి కోసం ఉపయోగించే చింతచిగురును లేతది తీసుకోవాలి. పుల్లలు మొత్తం తీసేసి శుభ్రంగా కడిగి తేమ లేకుండా ఆరబెట్టుకోవాలి. చిగురు ఏ మాత్రం తడి ఉన్నా పచ్చడి పాడవుతుంది.
- మీరు ఏ కప్పుతో అయితే చింతచిగురు కొలుచుకుంటారో అదే కప్పుతో ఉప్పు, కారం, నూనె వంటివి పైన చెప్పిన కొలతల ప్రకారం తీసుకోవాలి.
- ఒకవేళ మీరు ఎక్కువ మొత్తంలో పెట్టుకోవాలనుకుంటే పైన చెప్పిన పదార్థాలను పెంచి తీసుకోవాలి.
- పచ్చడి కోసం ఉపయోగించే గిన్నె, గాజు జాడీ వంటివన్నీ పొడిగానే ఉండాలి. అలాగే పచ్చళ్ల ఉప్పు, కారాన్ని ఈ పచ్చడి కోసం ఉపయోగిస్తే రుచి మరింత బాగుంటుంది.
ఈ ముద్ద వేసి "చేపల పులుసు" చేయండి - నీచు వాసన లేకుండా కమ్మగా ఉంటుంది!
