మనం మర్చిపోయిన "దేశీ కూరగాయ" - ఈ కర్రీతో ఎన్నో ఆరోగ్య ప్రయోజనాలు!

కనిపిస్తే వెంటనే తెచ్చి వండుకోండి - అన్నం, చపాతీల్లోకి బాగుంటుంది

CHEMMAKAYA CURRY IN TELUGU : పాతకాలం నాటి వంటలు ఎన్నో మరుగున పడిపోయాయి. వాటి స్థానంలో ఫాస్ట్​ఫుడ్ రుచులు చేరాయి. దీంతో శరీరం అదుపు తప్పి వ్యాధులకు మూలమైపోయింది. ముఖ్యంగా దేశీ కూరగాయ అయినటువంటి చెమ్మకాయ ఈ తరం వాళ్లకు అస్సలు తెలియదు. అదేదో పిచ్చికాయ అనుకుని వదిలేస్తున్నారు. వాస్తవానికి చెమ్మకాయలో పీచు పదార్థం అధికంగా ఉంటుంది. చెమ్మకాయలు, తమ్మకాయలు అని ప్రాంతాల వారీగా పిలుచుకునే ఈ కాయలతో ఆవ పచ్చడి కూడా పెడుతుంటారు. ఎలాంటి పురుగు మందులు వాడకుండానే అక్కడక్కడా పెరిగే ఈ కూరగాయలు ఆరోగ్యానికి ఎంతో మేలు చేస్తాయి. అయితే, వీటిని లేతగా ఉన్నపుడు మాత్రమే వండుకోవాలి. ముదిరినవి ఆరోగ్యానికి అంత మంచివి కావని గుర్తుంచుకోవాలి.

కావాల్సిన పదార్థాలు :

• చెమ్మకాయలు - పావుకిలో
• వేరుశనగ్ నూనె - 2 టేబుల్ స్పూన్లు
• అర స్పూన్ - ఆవాలు
• 1 స్పూన్ - పచ్చి శనగ పప్పు
• 1 స్పూన్ - మినపప్పు
• పావు స్పూన్ - జీలకర్ర

• ఉల్లిపాయలు - 3 మీడియం సైజు
• పచ్చిమిర్చి - రెండు
• కరివేపాకు - 2 రెమ్మలు
• అల్లం పేస్ట్​ - 1 స్పూన్
• టమోటాలు - 3
• రుచికి సరిపడా - ఉప్పు
• కారం - 2 స్పూన్లు
• పసుపు - చిటికెడు

తయారీ విధానం :

• చెమ్మకాయలు శుభ్రం చేసుకుని పీచు తీసేసి చిన్న చిన్న ముక్కలుగా కట్ చేసుకోవాలి. మధ్యలో గింజల్లాంటి తెల్లటి పదార్థాన్ని కూడా తీసేసి కుక్కర్​లో వేసుకోవాలి. నీళ్లు పోసి మూత పెట్టుకుని 1 విజిల్ వచ్చే వరకు లో ఫ్లేమ్​లోనే ఉడికించుకోవాలి.
• అవి ఉడికిన తర్వాత మంట కట్టేసి ప్రెజర్ పోయాక తీసి పక్కన పెట్టుకోవాలి. ఉడికించిన నీళ్లు కూడా కొన్ని తీసుకోవాలి.

• ఇపుడు కర్రీ కోసం స్టవ్ పై కడాయి పెట్టుకుని 2 టేబుల్ స్పూన్ల వేరుశనగ వేసుకోవాలి. అందులో అర స్పూన్ ఆవాలు, 1 స్పూన్ పచ్చి శనగ పప్పు, 1 స్పూన్ మినపప్పు, పావు స్పూన్ జీలకర్ర వేసుకోవాలి. ఈ పోపు దినుసులు వేగిన తర్వాత 3 మీడియం సైజు ఉల్లిపాయలను సన్నగా తరిగి వేసుకోవాలి. ఆ తర్వాత రెండు పచ్చిమిర్చి చీలికలు, 2 రెమ్మల కరివేపాకు వేసి కలిపి మూత పెట్టుకోవాలి.

• రెండు, మూడు నిమిషాలకు ఉల్లిపాయలు వేగిన తర్వాత అల్లం పేస్ట్​, 3 టమోటాల తరుగు, రుచికి సరిపడా ఉప్పు వేసుకుని ఉడికించుకోవాలి.

• ఇపుడు రుచికి సరిపడా ఉప్పు, కారం, పసుపు వేసుకుని మరో 5 నిమిషాల పాటు మీడియం ఫ్లేమ్​లో ఉడికించాలి. ఆ తర్వాత గ్రేవీ కోసం చెమ్మకాయలు ఉడికించిన నీళ్లనే కొన్ని పోసుకుని మరో సారి మూత పెట్టి 5 నిమిషాలు ఉడికించుకుని కొత్తి మీర తరుగు చల్లుకుంటే సరిపోతుంది.