క్యాబేజీ అంటే పిల్లలు ముఖం చిట్లిస్తున్నారా? - ఇలా "పాన్​కేక్స్​" ట్రై చేయండి - ఫ్యాన్​ అయిపోతారు!

క్యాబేజీ కూర చూస్తేనే ముఖం చిట్లించే వారికి ఇవి చేసి పెట్టండి!

Cabbage Pancake Recipe : చాలా మందికి క్యాబేజీ కర్రీ అంటే ఇష్టం ఉండదు. ముఖ్యంగా పిల్లలైతే ఈ కూర పేరు చెబితే చాలు ముఖం చిట్లిస్తుంటారు. ఉప్పు, కారం, మసాలాలు చక్కగా వేసినా వండినా తినరు. ఎందుకంటే ఈ కూరగాయ ఓ రకమైన వాసన రావడమే దీనికి ప్రధాన కారణం! మరి మీ పిల్లలు కూడా క్యాబేజీని తినడానికి అయిష్టత చూపిస్తున్నారా? అయితే ఓసారి ఇలా పాన్​కేక్స్​ చేయండి. టేస్ట్ అద్దిరిపోతాయి. క్యాబేజీ వదన్న పిల్లలే ఈ రెసిపీకి ఫేవరెట్​ అయిపోతారు. ప్రిపేర్​ చేసుకోవడం కూడా వెరీ ఈజీ. మరి ఇక ఆలస్యం చేయకుండా క్యాబేజీ పాన్​కేక్స్​ తయారీకి కావాల్సిన పదార్థాలు ? ప్రిపరేషన్​పై ఓ లుక్కేయండి.

కావాల్సిన పదార్థాలు:

• క్యాబేజీ తురుము - 2 కప్పులు
• క్యారెట్​ - 1
• ఉల్లిపాయ - 1
• స్ప్రింగ్​ ఆనియన్స్​ - కొద్దిగా
• అల్లం వెల్లుల్లి పేస్ట్​ - 1 టీ స్పూన్​
• మిరియాల పొడి - అర టీ స్పూన్​
• శనగపిండి - 1 కప్పు
• బియ్యప్పిండి - 1 కప్పు
• ఉప్పు - రుచికి సరిపడా
• పసుపు - పావు టీ స్పూన్​
• వాటర్​ - 1 కప్పు
• నూనె - తగినంత

Cabbage (Getty Images)

తయారీ విధానం:

• క్యాబేజీని సన్నగా తురుముకోవాలి. అలాగే క్యారెట్​ను కడిగి పై తొక్క తీసేసి తురమాలి. స్ప్రింగ్​ ఆనియన్స్​, ఉల్లిపాయ కట్​ చేసుకుని పక్కన ఉంచాలి.
• ఓ మిక్సింగ్​ బౌల్​లోకి క్యాబేజీ, క్యారెట్​ తురుము, ఉల్లిపాయ, స్ప్రింగ్​ ఆనియన్స్​, అల్లం వెల్లుల్లి పేస్ట్​, ఉప్పు, పసుపు, మిరియాల పొడి వేసి బాగా కలపాలి.
• ఆ తర్వాత శనగపిండి, బియ్యప్పిండి వేసి క్యాబేజీ మిశ్రమానికి పట్టేలా బాగా కలపాలి.
• అనంతరం కప్పు వాటర్​ను కొద్దికొద్దిగా పోసుకుంటూ మసాలాలు మొత్తం క్యాబేజీ మిశ్రమానికి కోట్​ అయ్యేలా మిక్స్​ చేసుకోవాలి.

Cabbage Pancake (ETV Bharat)

• స్టవ్​ ఆన్​ చేసి తాలింపు పెట్టడానికి ఉపయోగించే చిన్న పాన్​ లేదా దోశ పెనం పెట్టి లైట్​గా నూనె అప్లై చేసుకోవాలి.
• నూనె కాగిన తర్వాత పిండిని గరిటెతో పోసుకుని సమానంగా స్ప్రెడ్​​ చేయాలి. తాలింపు పెట్టే పాన్​ వాడితే ఒకటి, దోశ పెనం మీద అయితే రెండు పాన్​కేక్స్​ కోసం పిండి వేసుకోవచ్చు.

Cabbage Pancake (ETV Bharat)

• మీడియం ఫ్లేమ్​లో ఓ వైపు కాలిన తర్వాత మరోవైపు తిప్పుకోవాలి. ఇలా రెండు వైపులా తిప్పుకుంటూ ఎర్రగా, క్రిస్పీగా కాల్చుకున్న తర్వాత ఓ ప్లేట్​లోకి తీసుకోవాలి.
• ఇలా పిండి మొత్తాన్ని పాన్​కేక్స్​గా ప్రిపేర్​ చేసుకుని వేడివేడి సర్వ్​ చేసుకుని గ్రీన్​ చట్నీ లేదా టమాట సాస్​తో తింటే అద్దిరిపోతుంది.

టిప్స్​:

• కావాలంటే ఇతర కూరగాయల ముక్కలు కూడా వేసుకోవచ్చు.
• పిండిలో కప్పుకంటే నీళ్లు ఎక్కువ అవసరం పడవు. ఎందుకంటే మిశ్రమం పల్చగా అయితే పాన్​ కేక్స్​ టేస్టీగా రావు.

Cabbage Pancake Recipe (ETV Bharat)