వెన్నలా కరిగిపోయే "బటన్ బాదుషా" - పైన క్రిస్పీగా, లోపల జ్యూసీగా స్వీట్ షాప్ టేస్ట్ పక్కా!
- చాలా సింపిల్గా ఇంట్లోనే తయారు చేసుకోవచ్చు!
Published : May 1, 2025 at 11:45 AM IST
Button Badusha Recipe at Home: బయట క్రిస్పీగా, లోపల మెత్తగా, జ్యూసీగా ఉండే బాదుషా అంటే చాలా మందికి ఇష్టం. ఎందుకంటే నోట్లో పెట్టుకోగానే అలా కరిగిపోతుంది. పెళ్లిళ్లు, ఫంక్షన్లు ఇలా అకేషన్ ఏదైనా స్వీట్స్లో ఇవి ఫస్ట్ ప్లేస్లో ఉంటాయి. అయితే బాదుషాలు అందరికీ తెలిసిందే. కానీ మీరు ఎప్పుడైనా బటన్ బాదుషాలు తిన్నారా? సేమ్ బాదుషాలాగానే ఉంటాయి కానీ సైజ్లో, టేస్ట్లో కొద్దిగా తేడా ఉంటుంది. మామూలు దానితే పోలీస్తే ఈ బటన్ స్వీట్ టేస్ట్ సూపర్గా ఉంటుంది. మరి ఇంకెందుకు లేట్ ఈ టిప్స్ పాటించి ఇంట్లోనే ఈ బటన్ బాదుషా చేస్తే పాకం కుదరదు అన్న టెన్షన్ ఉండదు. మరి లేట్ చేయకుండా ఈ స్వీట్ రెసిపీని ఎలా చేయాలో ఈ స్టోరీలో చూసేయండి.
కావాల్సిన పదార్థాలు:
- మైదా - 250 గ్రాములు
- నెయ్యి - 50 గ్రాములు
- పెరుగు - పావు కప్పు
- బేకింగ్ సోడా - అర టీస్పూన్
- బేకింగ్ పౌడర్ - అర టేబుల్స్పూన్
పాకం కోసం:
- పంచదార - 300 గ్రాములు
- నీళ్లు - 150ml
- కుంకుమ పువ్వు - చిటికెడు
- నిమ్మ ఉప్పు - పావు టీస్పూన్
తయారీ విధానం:
- స్టవ్ ఆన్ చేసి పాన్ పెట్టి నెయ్యి పోసి మరిగించాలి. నెయ్యి కాగిన తర్వాత స్టవ్ ఆఫ్ చేయాలి.
- ఓ గిన్నెలోకి పెరుగు, బేకింగ్ సోడా, బేకింగ్ పౌడర్ వేసి మిక్స్ చేసుకోవాలి. ఆ తర్వాత మైదా పిండి వేసి పిండిని బాగా కలుపుకోవాలి.
- పిండిని పెరుగు మిశ్రమంలో కలిపిన తర్వాత కాగిన నెయ్యి వేసి వీలైనంత ఎక్కువ సేపు కలపాలి.
- ఇలా పిండి, నెయ్యి కలిపిన తర్వాత కొద్దికొద్దిగా నీళ్లు పోసుకుంటూ పిండిని వీలైనంత మృదువుగా కలుపుకోవాలి.
- ఇలా కలుపుకున్న పిండిపై తడి క్లాత్ వేసి సుమారు అర గంట సేపు పక్కన పెట్టాలి.
- ఈలోపు పాకం ప్రిపేర్ చేసుకోవాలి. అందుకోసం స్టవ్ ఆన్ చేసి పాన్ పెట్టి పంచదార, నీళ్లు పోసి మరిగించాలి.
- పంచదార పూర్తిగా కరిగిన తర్వాత మధ్యమధ్యలో కలుపుతూ జిగురు పాకం వచ్చేలా చూసుకోవాలి.
- జిగురు పాకం వచ్చిన తర్వాత చిటికెడు కుంకుమ పువ్వు వేసి కలపాలి. చివరగా నిమ్మ ఉప్పు వేసి కలిపి స్టవ్ ఆఫ్ చేయాలి.
- ముందుగా కలుపుకున్న పిండిని మరో 5 నిమిషాల పాటు సాగదీస్తూ కలుపుకోవాలి. ఆ తర్వాత కుంకుడుకాయ కంటే కాస్త పెద్ద సైజ్లో ఉండలుగా చేసుకోవాలి.
- ఇప్పుడు ఓ ఉండను తీసుకుని రెండు అర చేతుల మధ్య పెట్టి గట్టిగా అదుముతూ రౌండ్ షేప్లో చేయాలి. ఇలా చేయడం వల్ల పిండిపై పగుళ్లు ఏర్పడవు.
- ఆ రౌండ్ బాల్ను లైట్గా ప్రెస్ చేసి బొటనవేలుతో మధ్యలో నొక్కితే హోల్ పడుతుంది. దానిని ఓ ప్లేట్లోకి తీసుకోవాలి. ఇలా ఉండలన్నింటిని బాదుషాలుగా చేసుకుని పక్కన ఉంచాలి.
- స్టవ్ ఆన్ చేసి కడాయి పెట్టి డీప్ఫ్రైకి సరిపడా నూనె పోసి వేడిచేయాలి. ఆయిల్ లైట్గా కాగిన తర్వాత తయారు చేసుకున్న బటన్ బాదుషాలను సరిపడా కడాయిలో వేయాలి.
- నూనెలో వేసిన వెంటనే కాకుండా ఓ నిమిషం తర్వాత గరిటెతో తిప్పుతూ మీడియం ఫ్లేమ్లో లైట్ గోల్డెన్ కలర్ వచ్చేంతవరకు ఫ్రై చేసుకోవాలి.
- బాదుషాలు లైట్ బంగారు రంగు వచ్చిన తర్వాత మంటను హై ఫ్లేమ్లో పెట్టి గోల్డెన్ బ్రౌన్ కలర్ వచ్చేవరకు వేయించాలి.
- బాదుషాలు రంగు మారిన వెంటనే తీసేసి వేడి పాకంలో వేసి అలానే వదిలేయాలి.
- ఓ నిమిషం తర్వాత పాకంలో నుంచి తీసేసి వేరే ప్లేట్లోకి తీసుకోవాలి. ఇలా మిగిలిన బాదుషాలన్నింటినీ నూనెలో వేయించి పాకంలో కలుపుకోవాలి.
- ఇలా అన్నీ రెడీ అయిన తర్వాత ఓ గిన్నెలోకి వేసుకుని సర్వ్ చేసుకుంటే రసాలూరే బటన్ బాదుషా రెడీ. నచ్చితే మీరూ ట్రై చేయండి.
టిప్స్:
- నెయ్యి బదులు డాల్డాను కూడా వాడుకోవచ్చు. డాల్డా వేయడం వల్ల బాదుషాలు చాలా రుచిగా ఉంటాయి.
- పిండిని వీలైనంత మెత్తగా కలుపుకుంటూనే నూనెలో వేసినప్పుడు లోపలి వరకూ ఉడికి పాకాన్ని పీల్చుకుని సాఫ్ట్గా ఉంటాయి.
- ఒకవేళ మీ దగ్గర కుంకుమ పువ్వు లేకపోతే కొద్దిగా యాలకుల పొడిని కూడా వేసుకోవచ్చు. అయితే దీనిని పాకం మొత్తం ప్రిపేర్ అయ్యి స్టవ్ ఆఫ్ చేసేముందు కలుపుకోవాలి. నిమ్మ ఉప్పు బదులు నిమ్మరసం కూడా కలుపుకోవచ్చు.
- బాదుషాలను ముందుగా మీడియం ఫ్లేమ్లో, ఆ తర్వాత హై ఫ్లేమ్లో ఫ్రై చేయాలి. అప్పుడే లోపలి వరకూ వేగుతాయి. ముందే హై ఫ్లేమ్లో పెట్టి చేస్తే తొందరగా రంగు మారతాయి, కానీ లోపల పిండి ఉడకదు.
90's స్పెషల్ "కొబ్బరి మిఠాయి" - కమ్మని రుచితో తినే కొద్ది తినాలనిపిస్తుంది - పావుగంటలో రెడీ!
మరమరాలతో ముంత మసాలా రొటీన్ - ఇలా "బర్ఫీ" చేయండి - పాకంతో పని లేకుండా 5 నిమిషాల్లో రెడీ!
