"వంకాయ తక్కాళి" రోటి పచ్చడి - ఒక్కసారి తింటే మీ ఫేవరెట్ లిస్టులో చేరిపోతుంది!

ఎన్నడూ తినని రుచిలో అద్దిరిపోయే వంకాయ పచ్చడి - సింపుల్​గా ప్రిపేర్ చేసుకోండిలా!

Make Delicious Vankaya Pachadi at Home : వంకాయ పేరు చెప్పగానే చాలా మందికి నోరూరిపోతుంది. అయితే, మీరు ఇప్పటివరకు వంకాయలతో ఎన్నో రకాల వంటకాలు ప్రయత్నించి ఉంటారు. కానీ, ఓసారి ఈ కొలతలతో "వంకాయ తక్కాళి పచ్చడిని" ప్రిపేర్ చేసుకొని చూడండి. వేడి వేడి అన్నంలో ఈ పచ్చడిని కాస్త వేసుకొని తింటుంటే అద్భుతః అనాల్సిందే. ఒక్కసారి తిన్నారంటే మీ ఫేవరెట్ కర్రీ లిస్టులో చేరిపోతుంది! అంత రుచికరంగా ఉంటుంది ఈ పచ్చడి. అన్నంలోకి మాత్రమే కాదు చపాతీ, రోటీ వంటి వాటిల్లోకి ఇది సూపర్​గా ఉంటుంది. మరి, ఇంకెందుకు ఆలస్యం దీన్ని ఎలా ప్రిపేర్ చేసుకోవాలి? అందుకు కావాల్సిన పదార్థాలపై ఇప్పుడు ఓ లుక్కేద్దాం.

తీసుకోవాల్సిన పదార్థాలు :

Vankaya Pachadi (ETV Bharat)

• వంకాయలు - మూడు
• టమాటాలు - మూడు
• ఉల్లిపాయ - చిన్నది ఒకటి
• ధనియాలు - 2 స్పూన్లు
• జీలకర్ర - 1 టీస్పూన్
• నూనె - ఫ్రైకి సరిపడా
• ఎండుమిర్చి - ఆరు
• చింతపండు - కాస్తంత
• వెల్లుల్లి రెబ్బలు - ఐదు
• పసుపు - హాఫ్ టీస్పూన్
• ఉప్పు - తగినంత

తయారీ విధానమిలా :

• ఇందుకోసం వంకాయలను కడిగి, కాండం కట్ చేసి, నచ్చిన సైజులో ముక్కలు చేసుకొని ఉప్పు నీటిలో వేసి పక్కన ఉంచాలి.
• స్టౌ మీద ఒక పాన్ పెట్టి జీలకర్ర, ధనియాలు వేసి సువాసన వచ్చే దాకా వేయించాలి.
• ఇవి వేగిన తర్వాత ఎండుమిర్చిని కూడా ఫ్రై చేయాలి. ఇవన్నీ ప్లేట్‌లోకి వేసుకొని చల్లారనివ్వండి.
• అదే బాణలిలో కాస్త ఆయిల్ వేసి, వేడెక్కిన తర్వాత వంకాయ ముక్కలను వేసుకోవాలి. పసుపు వేసి బాగా కలపాలి.
• మీడియం ఫ్లేమ్ మీద వంకాయలు కొద్దిగా రంగు మారే దాకా వేయించుకోవాలి. తర్వాత తీసి పక్కన పెట్టుకోవాలి.
• అదే పాన్​లో మరికొద్దిగా నూనె వేసి చింతపండు, టమాటా ముక్కలు వేసి మెత్తగా అయ్యే దాకా ఉడికించుకోవాలి.
• తర్వాత రోలును శుభ్రంగా కడిగి క్లాత్​తో తుడిచి ముందుగా వేయించిన ధనియాలు, ఎండుమిర్చి, జీలకర్ర, ఉప్పు, వెల్లుల్లి రెబ్బలు వేసి మెత్తగా దంచాలి.
• అనంతరం చింతపండు, టమాటా ముక్కలు వేసి మెత్తగా దంచుకోవాలి.
• ఆ తర్వాత ఫ్రై చేసుకున్న వంకాయ ముక్కలు, ఉల్లి ముక్కలు వేసి, కాస్త పలుకుగా ఉండేలా దంచాలి.

తాలింపు కోసం :

Vankaya (Getty Images)

1. నూనె - రెండు స్పూన్లు
2. ఆవాలు - హాఫ్ స్పూన్
3. జీలకర్ర - హాఫ్ స్పూన్
4. శనగపప్పు - ఒక స్పూన్
5. ఎండుమిర్చి - రెండు
6. వెల్లుల్లి రెబ్బలు - మూడు
7. కరివేపాకు - రెండు రెబ్బలు

• స్టౌ మీద చిన్న కడాయి పెట్టి నూనె వేడి చేయండి.
• ఆవాలు, జీలకర్ర, శనగపప్పు, ఎండుమిర్చి, వెల్లుల్లి రెబ్బలు, కరివేపాకు వేసి వేసి ఫ్రై చేయాలి.
• ఈ తాలింపుని పచ్చడిలో కలిపితే చాలు. ఎంతో టేస్టీగా ఉండే "వంకాయ తక్కాళి పచ్చడి" రెడీ!

ఈ టిప్స్​తో మరింత రుచికరం :

• మసాలా దినుసులను వేయించేటప్పుడు లో-ఫ్లేమ్​లో వేయించుకోవాలి.
• ఈ పచ్చడిని మిక్సీలో కంటే రోట్లో రుబ్బుకుంటేనే టేస్టీగా వస్తుంది.
• నీలం రంగు లేదా తెల్ల వంకాయలు చక్కగా ఉంటాయి.