బ్యాచిలర్స్ స్పెషల్ కమ్మని "టమాటా కర్రీ" - అల్లంవెల్లుల్లి పేస్ట్, మసాలాలు వేయకుండానే అద్భుతమైన రుచి!

Bachelors Special Tomato Curry Making : ఇంట్లో ఇతర కూరగాయలేమి లేకున్నా టమాటాలు మాత్రం తప్పనిసరిగా ఉంటుంటాయి. అలాంటి టైమ్​లో చాలా మంది వాటితోనే త్వరగా అయిపోతుందని ఒకట్రెండు ఉల్లిపాయతో కలిపి కర్రీ వండేస్తుంటారు. అయితే, కొన్నిసార్లు కర్రీ తియ్యగా ఉండడమో, సరైన టేస్ట్ రాకపోవడమో జరుగుతుంటుంది. అలాంటి వారు ఓసారి బ్యాచిలర్స్ స్టైల్​లో "టమాటా కర్రీని" ప్రిపేర్ చేసుకొని చూడండి. అల్లంవెల్లుల్లి పేస్ట్​తో పాటు ఎలాంటి మసాలాలు అవసరం లేకుండా బ్యాచిలర్స్ చేసుకునే ఈ రెసిపీ సూపర్ టేస్టీగా ఉంటుంది. చాలా తక్కువ టైమ్​లో ఇంట్లో ఉండే తక్కువ పదార్థాలతోనే ఈజీగా చేసుకోవచ్చు. ఇది వేడి వేడి అన్నంతో పాటు చపాతీ, రోటీల్లోకి కూడా మంచి రుచికరంగా ఉంటుంది. టమాటా తినని వాళ్లూ ఇలా కర్రీ చేస్తే వద్దనకుండా ఇష్టంగా తినేస్తారు! మరి, ఈ సింపుల్ అండ్ టేస్టీ టమాటా కర్రీని ఎలా చేసుకోవాలో ఇప్పుడు చూద్దాం.

Tomatoes (Getty Images)

అవసరమైన పదార్థాలు :

• మీడియం సైజ్ టమాటాలు - పది
• తగినంత - నూనె
• ఒక చిన్న చెంచా - ఆవాలు
• అరటీస్పూన్ - జీలకర్ర
• ఒక టేబుల్​స్పూన్ - శనగపప్పు
• ఒక టీస్పూన్ - మినపప్పు
• ఐదారు - పచ్చిమిర్చి
• మూడు - ఉల్లిపాయలు(మీడియం సైజ్​వి)
• ఒక రెమ్మ - కరివేపాకు
• పసుపు - పావుటీస్పూన్
• కారం - టేస్ట్​కి సరిపడా
• వెల్లుల్లి రెబ్బలు - 15
• కొత్తిమీర తరుగు - కొద్దిగా(ఆప్షనల్)

ఎన్నడూ చేయని నయా స్టైల్ "ఎగ్ బుర్జీ" - వేడివేడి అన్నంలో అద్భుతమే!

Onions (Getty Images)

తయారీ విధానం :

• ఈ సింపుల్ అండ్ టేస్టీ కర్రీ తయారీ కోసం ముందుగా అందులోకి అవసరమైన టమాటాలను శుభ్రంగా కడగాలి. ఆ తర్వాత వాటిని పొడువుగా చిన్న చిన్న ముక్కలుగా కట్ చేసుకొని రెడీగా పెట్టుకోవాలి.
• అలాగే, ఉల్లిపాయలను పొడుగ్గా సన్నగా, పచ్చిమిర్చిలను సన్నని చీలికలుగా తరుక్కొని పక్కనుంచాలి.
• ఇప్పుడు కర్రీ ప్రిపరేషన్ కోసం స్టవ్ మీద పాన్ పెట్టుకొని తగినంత ఆయిల్ వేసుకోవాలి. నూనె హీట్ అయ్యాక ఆవాలు, జీలకర్ర, పచ్చిశనగపప్పు, మినపప్పు వేసుకొని లో ఫ్లేమ్​లోనే పోపుని వేయించాలి.

Mirchi (Getty Images)

• తాలింపు వేగిందనుకున్నాక అందులో ముందుగా కట్ చేసి పెట్టుకున్న పచ్చిమిర్చి చీలికలు, ఉల్లిపాయ తరుగు, కరివేపాకును వేసుకొని లో టూ మీడియం ఫ్లేమ్​లో ఆనియన్స్ కాస్త సాఫ్ట్​గా మారేంత వరకు మగ్గించుకోవాలి.
• ఇలా ఉల్లిపాయలు వేయించుకునేటప్పుడే అందులో కొద్దిగా ఉప్పు వేసుకుంటే ఆనియన్స్ త్వరగా మగ్గుతాయి.
• ఆనియన్స్ మంచిగా వేగాక ఆ మిశ్రమంలో ముందుగా కట్ చేసి పెట్టుకున్న టమాటా ముక్కలు యాడ్ చేసుకొని ఒకసారి అంతా కలిసేలా చక్కగా కలుపుకోవాలి.
• తర్వాత పాన్​పై మూతపెట్టి లో టూ మీడియం ఫ్లేమ్​లో టమాటాలు సాఫ్ట్​గా మారేంత వరకు మధ్యమధ్యలో కలుపుతూ మగ్గించుకోవాలి.
• టమాటాలు మగ్గి కాస్త సాఫ్ట్​గా మారాయనుకున్నాక గరిటెతో ముక్కలను కొద్దిగా మాష్ చేస్తున్నట్లు కలుపుకోవాలి. ఇలా కలపడం ద్వారా కర్రీ అనేది కాస్త గుజ్జుగా వస్తుంది.

Garlic (Getty Images)

• ఆవిధంగా కలిపిన తర్వాత అందులో పసుపు, రుచికి తగినంత కారం, ఉప్పు వేసుకొని బాగా కలిపి లో ఫ్లేమ్​లో టమాటాలలో నీరంతా ఇగిరిపోయి దగ్గరగా మారేంత వరకు ఉడికించుకోవాలి.
• ఆపై అందులో లైట్​గా దంచుకున్న వెల్లుల్లి రెబ్బలు వేసుకొని మరోసారి బాగా కలిపి మూతపెట్టి నూనె సెపరేట్ అయ్యేంత వరకు లో ఫ్లేమ్​లో మధ్యమధ్యలో కలుపుతూ కుక్ చేసుకోవాలి.
• వెల్లుల్లి పాయలను వేసుకోవడం ద్వారానే ఈ కర్రీకి మంచి టేస్ట్ వస్తుంది. అలాగని మరీ ఎక్కువగా వేసుకోవద్దు. మీరు తీసుకునే టమాటాల పరిమాణాన్ని బట్టి తగినన్ని వేసుకోవాలి.
• అలా ఉడికించుకున్నాక చివర్లో మీ ఇష్టాన్ని బట్టి కాస్త సన్నని కొత్తిమీర తరుగు యాడ్ చేసుకొని కలిపి దింపేసుకుంటే చాలు. అంతే, వెల్లుల్లి ఫ్లేవర్​తో ఘుమఘుమలాడే బ్యాచిలర్స్ స్పెషల్ "టమాటా కర్రీ" రెడీ అయిపోతుంది!

ఉల్లిపాయలతో పకోడీ రొటీన్ - ఇలా కరకరలాడే "బోండాలు" చేసుకోండి! - కమ్మగా ఉంటాయి!

చల్లటి వాతావరణంలో రెస్టారెంట్​ స్టైల్​ "చికెన్ సూప్" - కుక్కర్​లో అప్పటికప్పుడు చేసుకోవచ్చు!