Ash Gourd Majjiga Pulusu: చాలా మంది బూడిద గుమ్మడికాయను దిష్టి తీయడానికి, ఇంటి ముందు వేళాడదీయడానికి ఉపయోగిస్తారు. మరికొందరేమో దీనితో వడియాలు పెట్టుకుంటుంటారు. అయితే కేవలం ఈ పనులకు మాత్రమే కాకుండా గుమ్మడితో అద్దిరిపోయే మజ్జిగ పులుసు పెట్టుకోవచ్చు. దీని రుచి చాలా బాగుంటుంది. నార్మల్గా చేసే పద్ధతిలో కాకుండా ఈ మసాలా పేస్ట్ వేసి ఒక్కసారి చేశారంటే మళ్లీ మళ్లీ చేసుకుంటారు. పైగా బూడిద గుమ్మడి ఆరోగ్యానికి ఎంతో మేలు చేస్తుంది. మరి లేట్ చేయకుండా ఈ గుమ్మడి మజ్జిగ పులుసును ఎలా చేసుకోవాలో చూసేయండి.
కావాల్సిన పదార్థాలు:
మసాలా పేస్ట్ కోసం:
- పచ్చి కొబ్బరి తురుము - గుప్పెడు
- మెంతులు - అర టీస్పూన్
- మిరియాలు - అర టీస్పూన్
- ధనియాలు - ఒకటిన్నర టీ స్పూన్లు
- కందిపప్పు - అర కప్పు
- శనగపప్పు - పావు కప్పు
- జీలకర్ర - 3 టీస్పూన్లు
- బెల్లం ముక్క - కొద్దిగా
- పెరుగు - 1 కప్పు
- అల్లం ముక్క - కొద్దిగా
- పచ్చిమిర్చి - 4
మజ్జిగ పులుసు కోసం:
- బూడిద గుమ్మడి కాయ - తగినంత
- నూనె - 2 టీస్పూన్లు
- ఆవాలు - అర టీస్పూన్
- కరివేపాకు - 2 రెమ్మలు
- ఎండుమిర్చి - 4
- ఇంగువ - అర చెంచా
- పసుపు - పావు టీస్పూన్
- ఉప్పు - రుచికి సరిపడా
- కొత్తిమీర తరుగు - కొద్దిగా
తయారీ విధానం:
- ఈ మజ్జిగ పులుసు తయారు చేసుకోవడం కోసం ముందుగా పేస్ట్ సిద్ధం చేసుకోవాలి. అందుకోసం ఓ గిన్నెలోకి కందిపప్పు, శనగపప్పును తీసుకుని సరిపడా నీళ్లు పోసి ఓ పావు గంట నానబెట్టాలి.
- స్టవ్ ఆన్ చేసి కడాయి పెట్టి రెండు టీస్పూన్ల నూనె పోసుకోవాలి. ఆయిల్ కాగిన తర్వాత మెంతులు వేసి చిటపటలాడించాలి.
- మెంతులు వేగిన తర్వాత మిరియాలు, జీలకర్ర అర నిమిషం పాటు వేయించి, ధనియాలు వేసుకోవాలి. ఇవి వేగిన తర్వాత అల్లం ముక్కలు, పచ్చిమిర్చి తుంపలు వేసి ఓ నిమిషం వేయించాలి.
- ఇవి మగ్గిన తర్వాత పచ్చి కొబ్బరి తురుము వేసి కలిపి నానబెట్టిన కందిపప్పు, శనగపప్పు వేసి ఓ నిమిషం పాటు వేయించాలి.
- చివరగా పెరుగు, బెల్లం ముక్క వేసి కలిపి మరో రెండు నిమిషాలు ఫ్రై చేసిన తర్వాత స్టవ్ ఆఫ్ చేసి చల్లారనివ్వాలి.
- ఈ మిశ్రమం చల్లారిన తర్వాత మిక్సీజార్లో వేసి మెత్తగా గ్రైండ్ చేసుకుని పక్కన ఉంచాలి.
- ఇప్పుడు చిన్నది, లేతది బూడిద గుమ్మడి తీసుకుని సగానికి కట్ చేసుకోవాలి. ఓ సగం ముక్కను శుభ్రంగా కడిగి పొట్టు తీసేసి గింజలు లేకుండా చూసుకోవాలి.
- ఆపై చిన్న చిన్న ముక్కలుగా కట్ చేసుకుని పక్కన ఉంచాలి.
- స్టవ్ ఆన్ చేసి అడుగు మందంగా ఉన్న గిన్నె పెట్టి నూనె పోసుకోవాలి. ఆయిల్ హీటెక్కిన తర్వాత ఆవాలు వేసి చిటపటలాడించాలి. అవి వేగిన తర్వాత కరివేపాకు వేసి వేయించాలి.
- ఆ తర్వాత ఎండుమిర్చి, ఇంగువ వేసి ఫ్రై చేసిన తర్వాత కట్ చేసిన గుమ్మడి ముక్కలు వేసి బాగా కలపాలి.
- అనంతరం పసుపు, ఉప్పు వేసి కలిపి ముక్కలు మునిగేలా నీళ్లు పోసి కలిపి మూత పెట్టి ఉడికించుకోవాలి.
- ముక్కలు మెత్తగా ఉడికిన తర్వాత ఓసారి కలిపి గ్రైండ్ చేసిన మసాలా పేస్ట్, ఓ అర కప్పు నీళ్లు పోసి కలిపి ఉడికించుకోవాలి.
- పులుసు ఉడికి మిశ్రమం కాస్త దగ్గరపడిన తర్వాత కొత్తిమీర తరుగు వేసి కలిపి స్టవ్ ఆఫ్ చేస్తే సరి. ఆరోగ్యానికి మేలు చేసే బూడిద గుమ్మడి మజ్జిగ పులుసు రెడీ. నచ్చితే మీరూ ట్రై చేయండి.
చిట్కాలు:
- ఈ మజ్జిగ పులుసు కోసం లేత బూడిద గుమ్మడి అయితే తొందరగా ఉడకడంతో పాటు టేస్ట్ కూడా అద్దిరిపోతుంది.
- అలాగే మసాలా పేస్ట్ కోసం అవసరమైన దినుసులన్నింటినీ కూడా లో ఫ్లేమ్లో మాత్రమే మగ్గించుకోవాలి. హై ఫ్లేమ్లో మగ్గిస్తే సరిగా వేగక పులుసు అంతగా రుచి ఉండదు.
- ఈ పులుసు కాస్త చిక్కగా ఉంటేనే రుచి బాగుంటుంది.
పాతకాలం నాటి "వట్టి తునకల కూర" - ఇలా చేస్తే గరం మసాలా అవసరం లేదు - బాలింతలు, పెద్దలకు చాలా మంచిది!
నీచు వాసన లేకుండా "చేపల ఇగురు" - ఈ పద్ధతిలో చేస్తే చిక్కటి గ్రేవీ - చింతపండు అవసరమే లేదు!
